العنوان: يوميات متحدي

المؤلف: أحمد حنتوب أبو حريرة

تصميم الغلاف: لبنى عصام

ترقيم الكتاب بالمكتبة: 180011171

صفحة الكتاب بالمنصة: https://laylacp.net/webaccess/book_view.php?id=180011171

 

 

جميع الحقوق محفوظة ‫© 2022 منصة ليلى الثقافية

Copyright ‫© 2022 Layla Cultural Platform (LCP)

حول عز تيم

 

عز تيم هو فريق مكون من مجموعة من المدربين الناطقين باللغة العربية في أكثر من ثلاثين مجالٍ مختلف، تشمل اللغات الحية، وتنمية الذات، وتعلم المهارات، وتنمية الموارد البشرية، واﻹدارة، والكتابة اﻹبداعية، وتنمية ذوي الهمم..

 

مقدمة المؤلف

 

هذه يوميات متحدي شارك في تحدي عز تيم اليومي..

 

لزم التنبيه على أن هذا المحتوى ساخر ولا يمت للواقع بصلة، ومن وحي خيال الكاتب، وأي تشابه بين الشخصيات الواردة والواقع هو من قبيل الصدفة..

 

المؤلف

 

اليوم الأول

 

الطبيعي انك تصحى كل يوم بروتين معين.. ومحدِد انك حتعمل شنو..

لكن وبدون استشعار للورطة الانت فيها..

تلقى انك صحيت مخلوع وما عارف الوراك ولا القدامك..

كل العارفو انو في شي اسمه تمام مفترض تعملو..

وفي 1200 رسالة في القروب الرئيسي مفترض تقراها ..

وبين انك تقرا الرسائل وبين تجهز للمهام المفترض انك تسلمها.. تتذكر انو عندك شغل رسمي ومسؤولية..

دي  ورطة شنو يا عز..

وفي لحظة تكون شايل كباية الشاي في ايدك والتلفون في ايدك التانية ومفتاح المكتب في اصبعك وتفكيرك هناااااك.. تلقى الشاي اتكشح ولا انتهى انت ما مركز..

توصل المكتب وتفتح البرنامج وتبدأ شغلك.. وكل دقيقتين تدخل المجموعة تقرا رسالتين وتحدد milestone انت واقف عندو..

وترجع للشغل وتعمل كم حاجة ويقطع تركيزك كباية الشاي البردت وانت ما جايب ليها خبر..

كبايتين شاي ضيعتهم يا عز من الصباح بسبب التوتر..

ترجع تاني للـ milestone وتكمل قراية عشان تعرف الحصل والتفاصيل المهمة المدسوسة نص الونسة..

وبنهاية الدردشة تلقى انك نسيت التاسكات الكنت بتكتب فيها..

ورطة العدو..

انا الدخلني هنا شنو..

وفي اول لحظة تقرر فيها تتخلص من التوتر.. تسمع صوت الآذان..

دة يوم شنو الانتهى قبل ما اشرب شاي الصباح ؟؟

ترجع البيت ترتب نفسك وتجهز لتاسكات الفئات عشان تتمم.. تلقى النت قطع.. شت ياخ انا شغال بواي فاي المكتب..

ترجع بالسرعة الفلكية المكتب في عز النهار عشان تلقط شبكة..

ما عافي ليك يا عز ..

وتعمل تلخيص للمهام المطلوبة منك..

تكتشف انو كل فئة عندها مهام مختلفة وتاسكات مختلفة..

حال السواد..

تفتح المكتب وتشغل الكمبيوتر تاني والشاي تااااني..

كملت باقة ليبتون كلها في اليوم دة..

وترجع ترتب نفسك برواااقة وتصلي على سيدنا النبي صلى الله عليه وسلم وتشتغل المهام واحدة واحدة وبطريقة مرتبة..

وتتابع وترد على الناس وتسأل..

تلقى العصر أذّن.. والله أذّن..

تجمع ملخصك وترسلو للكوتش.. وانت ماشي على المسجد تعمل تمامك.. عشان لو ما عملت التمام ما ح تفهم شي لصلاتك..

ومع نهاية الصلاة تلقى انك جمدت من عدم الاكل.. ((وفي ناس عاملين فئة عشان يوقفوا الاكل)).. حال السواد..

تدخل اقرب بيت بتعرفو وطوااالي المطبخ بعد داك تسلم..

ولو ما لقيت شي في المطبخ ما تسلم..

وبعد ما تشحن طاقتك تعلق على الحاصل..

الواحد لما كان ممتحن شهادة سودانية ما وصل المرحلة دي..

وبنهاية اليوم..

في اللحظة البتقرر فيها انك ترتاح من جوطة السوشيال ميديا والونسات وتاخد راحتك في النوم عشان اليوم التاني.. تلقى عز عامل قائمة..

لو اسمي فيها ح انتحر ليكم هنا..

تقرا القائمة 45 مرة من التوتر..

اسمي موجود..

دقيقة اراجع تاني..

انا اسمي منو..

احمد..

اي..

لا لا حنتوب..

احمد محمد..

لا لا احمد حنتوب..

شكيتك ل الله..

دة حال شنو..

الواحد وصل مرحلة ينسى اسمو..

خلاص تستسلم وتقرر انو البيحصل يحصل..

ايّاهو الايمان بالمكتوب..

ايّاهو ولا ما ايّاهو..

لكن.. وبدون انذار.. تلقى النوم طار من التوتر وخلايا الدماغ وشبكاتك العصبية كلها اتضاربت..

وتسأل نفسك..

هسي انا اكمل معاهم..

ولو كملت ح اكمل انا في نفسي ولا ح اكون بنفس حالي دة..

والتوتر.. ح يكون كل يوم ؟؟

وهل.. وهل..

 

✍ ✍ ✍

 

اليوم التاني

 

بعد الربكة والخلعة والحسرة على الناس الاتحولوا لمجموعة الGold وبين فرحة انك لسة ما نزلت..

وبين التفكير في المهام المنتظراك بكرة.. تلقى الساعة 4 ص..

بسم الله.. متين الوقت بيمشي سريع كدة..

هسي لو مجروح ولا حزين الساعة تحس بيها 10 ساعات..

مع عز التيم اليوم بينتهي قبل ما تشرب شاي الصباح..

وبدون ما تشعر تلقى انك وقعت من تعب اليوم الفات..

وفي صباح اليوم التاني وقبل ما الشمس تطلع تلقى الكوتش مرسلة تاسكات..

يا كافي البلاء..

تاسكات قبل شروق الشمس وقبل شاي الصباح..

نحن عملنا شي غلط في حياتنا عشان نتعاقب بسببو هنا..

هسي الواحد يفتح الاسئلة ويحاول يجاوب عليها ولا يشرب الشاي اول..

وفي نص التفكير يجيك فضول انك تشوف الاسئلة.. ومع أول سؤال أسلاكك تضرب..

دي ياتو لغة ؟؟

والكلام دة موجود في ياتو كتاب ؟؟

دة سؤال شنو الكل اجاباته صاح ؟؟

تعاين لكباية الشاي وما تعرف تشربها ولا ترميها..

هسي انا استعين بقوقل ولا English guru  ؟؟

والكلام دة اصلا تبع اللغة دي من زمان ولا اضافوهو هسي؟؟

نحن درسنا ابتدائي وثانوي وجامعة ومعاهد..

الكلام دة موجود في ياتو مرحلة ؟؟

تسمع صوت عقلك بيقول ((انا ما هنا انا ما انا)) ... ((يداك اوكتا وفوك نفخ)) ((والجاية من السماء تحملها الواطة))..

امورك تجوط وتقنع من الشاي عشان المزاج خرب من صباح الرحمن..

كدة يومين يا عز بدون شاي الصباح..

وفي النهاية تستسلم لانك ما عارف شي وتحاول تجاوب بأي معلومة عندك حتى لو غلط واكيد غلط.. اهم شي الكوتش الكيوت ما تزعل.. اي شي ولا زعلك يا جميل..

هسي لو بتدرسينا انتِ انا برجع من الابتدائي..

وكل سنة اغيب من الامتحانات عشان اعيد السنة وتدرسيني تاني..

لو كل الاساتذة زيك كان البلد اتملت مهندسين ودكاترة وعلماء.. لكن للأسف كلهم زي د. جو.. تسألو سؤال يرد عليك ب 120 سؤال العميقة ديك.. وكل سؤال ممكن يبشتن رفوف المعلومات الانت حافظها كلها.. وبعد دة هو البيزعل..

وبين فرحة انك ارتحت من تاسك اليوم تتذكر انو عندك تاسك تاني.. الكوتش التانية..

الكوتش الرقيقة ودائماً متوفرة عشانك..

عز ذاتو ما راعى لينا..

عامل زي مخرجين الأفلام الرومانسية.. لو ما عجبتك القصة تعجبك الممثلة.. اياهو نحن من كوتش كيوت لكوتش اكثر رقة.. لو ما عجبك التحدي والضغط.. تستحمل عشان الكوتش..

واثناء ما انت منداااح ومشاعرك مكرفسة زي جلابية سيد اللبن في حضارة كوش تتذكر الشغل والفطور..

فطور شنو وانا لسة تحت البطانية..

هسي ياعز دي ايام نشيل فيها هم زيادة..؟؟

ما كفاية هم البرد والغسيل والمكوة والسهر وميزانية المراجعة ؟؟

وفي اللحظة البتقرر فيها تعيش دور المجتهد والدحيح وترتب زمنك عشان ما تكرر جوعة أمس.. تلقى شغل المكتب منتظرك..

تعاين للبطانية وتردد باعلى صوت:

((اشوف وشك بخير))

وتوصل المكتب وتبدأ شغلك ونفس الروتين الأمس..

تحاول تلحق نفسك قبل الصلاة عشان تلحق باقي الأكل ومافي وقت تسخن الأكل وتردد بكل حزن يا حليل أيام الدليفري..

مع عز تيم الواحد بيتذكر ايام معسكرات عزة السودان..

ما باقي الا احلق صلعة..

بعدها تعمل التمام وترمي التلفون وتقعد بكل أدب وهدوء وانت منتظر أسماء المساكين الح ينقلوا من كفالة عز لكفالة كوتش امتثال..

وقلبك في ايدك انو المسؤولين ما يشوفوا اسمك..

لو حولوني من القروب الكبير للgold..

فضوا لي البينش الأول عشان ح اشبع نوم..

 

✍ ✍ ✍ ✍

 

اليوم الثالث

 

مع نهاية اليوم وقراية القائمة الما فيها اسمي لهسي..

وبعد ترتيب مهام اليوم التاني.. قررت بكل جدية وحزم اني انوم بدري.. على الاقل قبل الساعة 2 ص..

رميت التلفون عشان ما اتذكر التوتر والانقلابات المتوقعة..

ومن التفكير الكتير بقيت ما عارف انا وين..

شوية.. سمعت صوت إشعار الواتس..

رسالة من عز..

لقد تم نقلك من الـ platinum للـ gold..

خلعة السواد..

ري آكشن ثور في Avengers End Game لما كابتن اميركا حرك المطرقة..

كنت متوقع والله I knew it..

واثناء ما انت بترسل لعز عشان تفهم تلقى عز اتحول لروبوت..

يمين بالله الرسالة ولا بيفتحها..

وتلفونو مقفول..

وكل دقيقتين ترسل ليهو..

يا عز انا تممت..

تكش اهلي تممت وعملت فيديو كمان..

رصيدي خلص بسبب الرسائل النصية..

اهل الفزعة.. كوتش سارة.. فوفا.. تماضر.. زينب.. شنان.. الحقوني يا جماعة..

اقسم بالله تممت..

ما باقي الا ابكي ليهم.. دة لو اصلا ما كنت بكيت في كل رسالة..

دي ورطة شنو..

ترجع تقرأ الرسائل كلها من (تم اضافتك) للمجموعة لغاية اخر رسالة.. احتمال تكون اتجاوزت واحد من القوانين (الاصلا ما شفناها ولا ظهرت لينا لهسي)..

مافي رسالة هنا..

صوت من هنااك يقول ليك..

اقرا الدردشة تاني..

انت مجنون..؟؟

دي 25 الف رسالة قريتها كلها..

اقراها تاني..

ايام امتحانات الجامعة بشتري الشيت قبل الامتحان بساعات..

اقرأ محادثة فيها 25 الف رسالة مرتين..

انا أمي داعية علي؟؟

الواحد يصحى من صباح الرحمن ويقرا الرسائل كلها..

وقبل ما ينوم يراجعها عشان ما يفوِّت حاجة وبعد دة يخاف تكون راحت ليهو رسالة هناك..؟؟

والله التوتر دة المراة الحامل ما عندها..

طيب اسال منو..

ولا عز  لا الكوتش المعاهو بيردوا..

بالله هم ما صدقوا..

الواحد ترسل ليهو يسفهك كأنك طالب منو راتب سنة..

وكما قال (ألان كاي) انو (افضل طريقة لتوقع المستقبل هو ان تصنعه بيدك) فانا قررت بكل استسلام اقبل بالواقع واشوف الجو هناك عامل كيف..

يا حليلك يا مهتدي..

هسي انا اناضل عشان منو..

وصيتي ليك.. العهد البينا الديمقراطية الحديثة..

استلِم مني راية الثورة ويلا Bella Ciao وفلتحيا المقاومة..

وانا رحلت الـGold وبتابع ثورتنا من هنا..

وبعد ساعة تكتشف انو اغلبهم صامتين وهادئين وكاتلين ضلهم..

يمين بالله الواحد اسمه ما ظاهر من شدة ما هم اصنام..

ديل دخلوا الفئة تبع بيعة قديمة؟؟؟

بيكونوا تبع عقد واتساب مع شركة معينة..؟؟

ديل بيكونوا اصحاب الجنا البرمج الواتساب ونسى يقول ليهم انو باع التطبيق لفيس بوك..

الله اعلم يكونوا بيتكلموا ويتونسوا ويعلقوا زينا كدة..

يا جماعة.. انتوا تممتوا؟؟

يا جماعة.. فيكم واحد هنا عمل مشكلة ولا اتجاوز حاجة معينة؟؟

المجموعة دي مسؤول عنها منو؟؟

الوو..

في واحد هنا فاهم انا بقول في شنو..؟؟

ما باقي الا تقول منو فيكم (هُبل) ومنو (العزى) عشان تتأكد من انو انت في وسط اصنام جد جد..

يا جماعة.. المحل دة مسكون..؟؟

في عقارب هنا ولا عناكب..؟؟

انا ما خايف والله لكن عشان اكون عارف بس زي ما قال أدهم شرقاوي (ليطمئن قلبي) بس..

الاخوان.. الاخوات..

(حكم قرقوش) عندكم وانا ما عارف؟؟

انا ما لبيب وغبي واي شي لكن لو شوفوا لي اشارة استوعب بيها..

ادوني علامة.. لمحة..

اللمبي في زمن الجاهلية ما جاط كدة..

عز طلعني من هنا ان شاء الله ابو زعبل.. ياخ لو سجن ابو غريب ما عندي مشكلة..

عز..

وحاة الله تممت..

انت ليه ما مصدق..

يعني انا اكضب عليك لشنو..

موش هو تحدي..

انا لو ما داير مصلحتي ما كنت جيت هنا صح..؟؟

انا عارف انو انت وامي دايرين مصلحتي لكن مصلحتي ما هنا..

رجعني عليك الله..

رجعني في عرسك بجيب ليك ايمان الشريف..

عارفك ما شكري لكن بخليها تغني ليك..

وحاة الله واقسم بالله وعزة جلال الله انا تممت..

الفيديو ذاتو اختفى يا كافي البلاء..

دي عوارض شنو البتجي في وقت زي دة..

هسي انت كدة بتعاقبني باني اقعد مع الاصنام؟؟

ياخ طلعني من القروب كله احسن..

انا لو ما غادرت من الخلعة بغادر من الكوابيس الهنا دي..

قروب يوم كامل مافيو واحد بيتكلم..

خايف لو ما جنيت من الصمت والهدوء اجن من الكوابيس البتجيني..

عز.. انت قلت في كوتش هنا ح تتكلم معانا وتحفزنا..

يمين بالله ولا صوت..

ولا رسالة..

ياخ الكوتش من الصنم ما بيتفرزوا..

قروب ادمن ذاتو غيرك ما فيهو..

دي مصيبة شنو..

زمان الواحد لو جاع ممكن ياكل الصنم عشان بيكون من عجوة..

ديل ذاتو ما تعرف مصنوعين من شنو..

يا جماعة..

خلونا نتفق على سيناريو..

ان شاء الله نوقع عريضة إعدام..

اهم شي نرتاح..

انتو أحياء يا جماعة ولا دي مقابر ولا انا وين؟؟

عز..

انا لو واحد من الدعم السريع ما بتعمل فيني كدة..

خايف اغادر واخسر التحدي كلو..

وخايف اقعد اهلوس براي..

انا لما كنت بتشاكل في الحلة وبرجع البيت مبهدل لأبوي وعارف انو ح يجلدني لمدة شهر ما كنت بشيل هم زي هم اليوم دة..

دقيقة افتح سورة البقرة ممكن الآيات تطرد الشياطين..

بسم الله..

مع اول آية..

تلقى نفسك في عالم تاني..

المكيف شغال واللمبة مقفولة..

والتلفون في الشاحن..

بسم الله انا وين..

تلقى انك صحيت من كابوس..

وما تعرف تنطط انو دة كان حلم ولا تزعل عشان التوتر وصل أحلامك..

الله اكبر..

ظهر الحق..

الواحد ينوم عشان يحلم بمستقبل مشرق..

مع عز تيم ينوم ويحلم بكوابيس..

وعشان النوم تاني ما ح يجيك..

تقرر تراجع الدردشات احتمال يكون الحلم دة حقيقي..

الزمن دة أي شي متوقع وقت حميدتي ماسك امور دولة ود. جو ماسك فئة ريادة اعمال وانا ما فيها وجائزة في فئة الانجليزي انا محروم منها..

وقبل ما الشمس تطلع تعمل كباية شاي عشان لو الشمس طلعت ح تلقى تاسكات كوتش سارة الكلها ديمقراطية..

وبدون ما تشعر ح تلقى انك ح ترجع لعهد القمع والبطش تاني لباقي التاسكات..

دة شنو..

انا هسي انوم ولا اعمل شاي ولا افطر..

الساعة كم..

الصبح باقي عليهو كم؟؟

اسلاكي ضربت تاني..

بالله اعمدة حلتنا في القرية في الخريف ما بتضرب زي الاسلاك البتضرب هنا..

عز.. من هسي..

انا لو ما تممت شوتني برة..

الحلم دة لو اتحقق انا بخسر شوية العقل العندي..

المشكلة انو مهتدي ما داير يرجع لي راية الديمقراطية..

 

✍ ✍ ✍ ✍

 

اليوم الرابع

 

حبوبة صباح الخير..

حباب ولدي..

حباب الغالي ود الغالي..

تعال لا جاي..

اها قص لي الليلة كتبت شنو..

ما كتبت شي لسة..

مالو وشيشك آ جنا..؟؟

ما في شي لكن امبارح في ناس دايرين يزعلوا كوتش سارة.. وانا ما نمت..

يبقالهم بالخراب وكتيح التراب..

اياها البنية البتدرسك..

اياها..

تجيهم الجات لود سعيد..

ويشمت فيهم القريب والبعيد..

دقيقة يا حبوبة..

هم كويسين..

كواسة العدو والعرب البدو..

وقت بيزعلوا سَرّوية تاني الكواسة ليهم شنو..

قالوا ح يفوزوا عليها..

يفوزوا بالدوا..

ويعدموا الهوا..

شحدت ربي الكريم..

لكن يا حبوبة قالوا عندهم افكار كبيرة ومعاهم كفاءات..

كفاوات شنو الكفوة الما تفكهم ببركة شيخي المكاشفي..

مرّقني على الشمس انصلي ركعتين وادعي عليه اسمو منو..

ما بعرفو والله يا حبوبة..

لكن بيقولوا في كوتش بيتكلم رطانة قال انو ح يفوز عليها وهي ردت عليه..

يفوز على سَرّوية مخير الله.. على شنو..

قالوا البقرأ معاهم بيفهم المسلسلات حقتهم من غير ما يقرا الكلام المكتوب تحت..

عاد كان كدي انمشي على خالتك دار النعيم.. سمعت انها بتتكلم هندي.. اليوم كلو زي ألوان وام بي سي بوليود..

شان كدي متطنقعة.. وليداتها مرخرخين كدة..

انتِ يا حبوبة زمان كنتِ بتحضري مسلسلات..

يا ولدي مالك مقلب علي المواجع ومذكرني جدك حسب الرسول..

عاماً اول يا ولدي انا وجدك سافرنا الخرطوم.. ونزلنا في بيت حبوبتك سعدية..

مرة خالتك أم الحسن كانت بتحضر المسلسل على ناس بتول بت دفع الله.. داك اليوم جات تبكي.. قالت المسلسل انتهى.. وتاني بيجيبوا مسلسل غيرو.. كَجّنت الدش من اليوم داك..

قصدك حبوبة بتول ام عمو مصعب؟؟

اياهو.. المشلهت..

مالو؟؟

جني وجن الجنا المتفنجر..

كل يومين يجينا ناطي..

خالتو سعاد.. انا نازل تركيا..

خالتو سعاد.. تركيا سمحة..

خالتو سعاد.. اجيب ليك شي من تركيا..

اي يخربو.. يخربو كان فاهم شي..

كلهن كلمتين حفظهن من المسلسل الاسمو النور المهند..

اسمو نور ومهند يا حبوبة..

اسكت انت ماك عارف شي..

شي خربكم غير المسلسلات ديل مافي..

بيقولوا انها لغة سمحة وناسها راقين ومرتبين..

آ جنا سماحة شنو مالك علي ما كفاية بنات خالك الحسين وفلهمتن..

مالهن.. ماشاء الله مرتبات ومهندمات..

قدر ما اجي عليهن القاهن حدا الدش ويحضرن في الفلفزيون..

تلفزيون يا حبوبة..

اياهو الشي الخاربكم..

الواحد يقعد حدا الفلفزيون وينسى قرايته..

وبنات خالك الحسين قدر ما اجي عليهن يطنطن بي شيتآ ما بيتنطق..

بيقولن شنو يا حبوبة..

دحين لي شهر ما سمعت منهن غير جوهايدي..

جونايدون يا حبوبة..

وحاة اسم الله ما عارفات غيرها..

قدر ما يجن علي يتراطنن بالكلمة دي..

دايرات يفهمن كلام تركي ويسافرن هناك.. ويقابلن مهند وساركان..

يخربهن.. اياهن ح يعرسن وليدات عمهن الحارسين السوق ولا يشتغلن في الخرتوم في وكالة ود البشير..

مالك محبطة يا حبوبة قالوا البيتعلم اللغات دي بيسافر طوالي ويلقى شغل هناك..

زمان آ ولدي جارتاً لي كانت بتقرأ حدا جامعة في الخرتوم.. بتقرالها لغة كدي الت بلاد الكفر..

الشي الفيها البرج ألليل الكهرباء البيدور يقع الا ما عندهم كتاحة زينا..

برج ايفل..

اياهو بس..

قصدك اسبانيا يا حبوبة..

اتقول اياها..

كانت بدور تبقى دكتورة على فلهمتها..

داك اليوم جاء ود عمها ولقاها تتراطن مع زميلها.. حال العدو قالوا صفقها كف ورجعها بيتهم وعقد عليها..

وبعد اسبوع انتحرت..

لا حول ولا قوة إلا بالله..

البنت بتدور تعيش فلهمة المسلسلات..

لكن الزمن اتغير يا حبوبة..

الرطانة ذاتها كترت..

وبقت في لغات كتيرة..

كلها رطانة ألت الانجليز.. عملولهُن مشاكل في كل حتة.. لهسي مشاكلهن ما انتهت..

حبوبة.. اولاد جدي عبد الله قاعدين يتكلموا معاك؟؟

بالحيل.. كل ما خالك عمر يجي علينا يصورهم لي واسمع صوتهم.. علّ مرات بسمعلهم رطانة زي مشي النمل..

هم في الصين يا حبوبة شغالين هناك..

الصين.. ألت الناس البياكلوا الضفادع والدوابي..

اي..

شغالين شنو آ جنا.. ما يكونوا بياكلوا المرض دة..

واحد منهم مترجم والتاني محاسب..

مترجم كيف.. بيعالج الغنم؟؟

لا لا داك تمرجي البيعالج يا حبوبة..

دة بيتكلم زي الصينين..

شان كدي عيونو بقت دقاااق زي حبات الفتريتة.. داك اليوم في الصورة كان بيتكلم شيتاً زي الشعوذة..

دي لغتهم هناك يا حبوبة..

لغتهم كلها زي نبيح الكلاب ومشاكل الكدايس نص الليل..

اي قريبة ليها..

فلهمة السواد..

هسي أكان رجع على حواشة جدك الحسن ما احسنلو..

انتِ يا حبوبة قريتي لغاية سنة كم؟؟

نان جدك كان مخلينا نطلع من البيت..

عِلّ مرة جونا ناس المحو..

الفكي ود الطاهر ومعاهو العمدة امحمد ود طه..

وجابولون بنية سميحة زي سارة.. بري والله سارة دي مافي شي زيها..

صدقتي والله..

البنية مالها..

قالت بتدور تعلمنا شنزليزي..

انجليزي يا حبوبة..

انتوا قولوا ونحن بناكل..

ما اكل يا حبوبة..

بيتعلموا بيهو الكلام مع الانجليز..

كلام شنو؟؟

زي كلام سارة البتسمعيهو معاي كل يوم..

اياهو شنزليزي لكن كلام سارة سمح براهو ولا هي المسمحة الكلام ماني عارفة..؟؟

اها حصل شنو تاني..

قلتك 15 مرة ما تعاجلني..

حاضر يا حبوبة..

يحضرك الخير..

زمان تتطنطن صباح ومساء..

اليومين دي متغير.. البركة في سارة العلمتك التعامل السمح..

داك اليوم البنية السمحة قالت البيتعلم الشنزليزي دة بيشغلوهو في الخرتوم..

اول شي ساقوا التمرجي ودوهو الخرتوم قعدلو شهرين.. لغاية ما عشة بت حسب الرسول بقت تدي الحقن.. مرة ادتلها ولداً لحاج بخيت حقنة كان يموت.. عِلّ الله شافو.. وقالتلنا البيتعلم بيسوقوهو بلاد برة يشتغل تمرجي هناك..

وقالتنا البيتعلم بيبقى شيتاً كدي بيقولولوا باش ساهب..

باش كاتب يا حبوبة..

باش ساهب حدا الانجليز..

جات من نصيب ود الفاضل..

اشتغل باش ساهب وادوهو عربات وسكنوهو حداهم..

وهديك غنيماتو في المراح و وليداتو جت في بلاد الغربة..

وعاماً اول.. ولداً للسرة بت النجمي مشى الخرتوم مع البنية وبقى شغال في المطار.. بيسوق لهم الطيارة ولا اكان بيلزها ماني عارفة.. فد سنة وساق اولادو جت ورحلهم حداهو..

والبيت الفاضي الجنب المستشفى داك بيت منو..؟؟

بيت اولاد عثمان ابو مكة..

داك اليوم فات مع الفكي والبنية السمحة الخرتوم.. علم وليداتو وجت سافروا بلاد برة وهملوا بيوتهم..

هسي يا حبوبة ديل كلهم اتعلموا انجليزي وانتِ وجدو بتعاينوا ليهم ساي..

عمك الخزين كان ماشي.. علّ جدك حسن اداهو حواشة وقعد..

اياهو تفشخر جدك الله يرحمه.. قدر ما اقول ليه خلى الجنا يمشي على الخرتوم مع البنية السمحة دي يقول لي دي لغة ساهلة وبيتعلمها قدام.. دحين كلهم يتفلهموا بالعربات والحواشات وجدك لغاية ما مات ما خلالنا غير سخيلة وكل يومين مرضانة..

دحين انسألك.. كوتش سارة دي بعد طيبتها وسماحتها ورقتها وكلامها السمح ليكم.. في كوتش عاقل بيتحداها..؟؟

الا ناس الفلهمة ديلك..

احمد آ ولدي بدور اسألك..

ناس الفئات ديل بي..

فيهم كوتش زي كوتش سارة..

لا لا.. واحدة بس زي الملاك..

عندهم مهتدي هناك..

يسمهم.. مافي زيو نهائي..

والبنية البتراجع الاسامي كل يوم معاكم..

اي فوفا.. معانا..

والبنية السمحة ديك البتشبه دكتورة بسمات.. معاكم..

اي اريج الشيخ.. معانا..

ومعانا حسام وهبة ودكتورة لدن وناس كتيرين مهمين..

ديل جت في صف سارة وانت زعلان.. فهم العدو..

لكن بيقولوا انهم حيفوزوا عليها كل مرة..

وقت ديل جت مع سارة.. نان البيخليهم يطلعوا في راسكم شنو..

بيكونوا اتعلموا ال 5 كلمات الأساسية في اللغة في التلفزيون..

امانة عليك يا ولدي قول لاصحابك المعاك ما يمشوا ورا فلهمة الناس البيزعلوا كوتش سارة..

وقول للبيزعلوا كوتش سارة الشي البتتراطنو بيهو دة بنوت السرة في الحلة بيقولنوا..

علّ انسألك تاني سارة دي بتتكلم معاكم صباح ومساء..

اي.. كل يوم كلامها واسلوبها سمحات زيها..

دحين آولدي ما تكونوا بتزعلوها.. لكن تزعلوها كيف انت ومهتدي.. اولاد السرور انتوا.. قلت لي بقوكم رسميين في المجموعة الرئيسية..

اي..

اياها بركة سارة..

الزيها يا ولدي وين ما يمشي البركة لاحقاهو..

اسندني يا ولدي انقوم ادعي ليها..

 

✍ ✍ ✍ ✍

 

اليوم الخامس

 

أحمد ألحقني.. رُكَبي ساحت..

في شنو؟؟

عملتِ حادث..

لا لا..

جريتي وراء 9 طويلة؟؟

لا لا مشيت 3 ساعات..

مالك.. في موكب؟؟

موكب شنو.. الكوتش قال البيمشي اكتر وزنو بينقص اسرع..

دة وزن شنو البنمشي ليهو 3 ساعات.. انتِ ماكلة قروش يتامى؟؟

قال المشي الكتير بيحرق سعرات حرارية والوزن بينقص..

ما تاكلي فول مدمس بس ولا دكوة..

هسي ما عارفة اعمل شنو..

ترجعي قروش المساكين الشلتيها يا كوزة..

احمد.. انا جادة.. اعمل شنو؟؟

في ياتو حاجة..

عندي حاجات كتيرة دايرة اعملها بس ما قادرة عليها كلها وريني اعمل شنو؟؟

غير انك تركزي على تطوير نفسك في جميع الجوانب ممكن تستعيني بقانون الكفاءة الإجبارية ((مافي وقت عشان نعمل اي حاجة لكن في وقت عشان نعمل اهم حاجة))..

فحددي ياتو حاجة من الحاجات الح تعمليها هي الأهم..

طيب..

بكرة الصباح برسل ليك.. التاسكات نشتغلها سوا..

تمام..

اللخو..

يا مراحب.. بتعرف كوتش المشي الكتير داك..

اي مالو..

ياخ مطلع زيتنا بالمشي الكتير..

أول امس مشى 30 كيلو..

وانا مشيت 3 كيلو جاني هبوط.. هسي وقفت عشان اشرب لي جبنة..

30 كيلو.. لشنو؟؟ البنزين قطع تاني..؟

لا لا.. كان بيحرق دهون..

دهون شنو.. بيكون اتقطع في محل وما عندو قروش مواصلات..

ياخ.. لكن زولك دة ضاغطنا.. هسي انا لو أكلت سلطة دكوة بزيت سمسم بكون كسرت التحدي..

انت كدة كسرت قانون الطاقة النسبية كلها..

هسي ماشي كيف مع التمارين..؟؟

ماشي لشة.. برجع من الشغل مشي.. بوفر شوية من الراتب وبنقص وزن..

انت فيثاغورس قريبك؟؟

ليه..

نظريتك دي عجيبة شديد..

يلا يا عمك.. اكمل وارجع ليك..

 

يا هندسة..

الغالي.. حالك والحياة معاك؟؟

حال ما يطمن والله..

خير؟؟؟

الواحد بقى يصحى بي حال وينوم بي حال..

الواحد خايف ما يتمم ينزل مع قروب الكوتش المرعب داك..

انا لو قعدت معاهو في مجموعة واحدة.. من الرعب ح اتنفخ 4 مرات تاني الا عملية شفط دهون عشان ارجع زي ما كنت..

انت تممت؟؟

انا ما معاكم..

قصدي.. اشتغلت مهام اليوم..

اي.. الكوتش عندنا لو حضرت المحاضرة ح تتمم.. كوتش السرور..

يلا رسل لي رابط القناة عشان نراجع سوا بعدين..

ان شاء الله..

 

يا عمك.. الحق صاحبك..

مالك..

دخلت الـ Comfort Zone ..

دة فيهو جوائز..؟؟ رسل لي الرابط..

جوائز شنو.. المطرطش دة قصدي اني بديت افصل من الدنيا..

امس في الشغل بسأل زميلي ((فطرت)) قلت ليه ((تممت))؟؟..

قبل يومين ابوي سألني مشيت لفلان في المستشفى؟؟ رديت ليه: اي مشيت 5 كيلو..

ابوي كل ما يشوفني يقول لي باقي ليك كم كيلو..

ايييك.. حبوبة ما وصلت مرحلتك دي..

اها في طريقة اقدر الحق بيها نفسي بدري ولا اوقف التحدي..

يا كافي البلاء.. حالتك صعبة والله..

قلنا الرحلة في المسافة..

فانتِ ما تركز على تعبك الهسي.. ركز على انك بتكتسب عزيمة وهمة كل فترة..

ان شاء الله..

يلا.. الفتة جات..

فتة شنو..

كوارع..

وداير تنقص وزنك كيف..

دي بتنقص الوزن اكتر من المشي..

يوم واحد بس و وزني ينقص 3 كيلو..

 

الو.. ياعمك..

يا ابو حميد..

حبيبي والله..

ياخ ممكن طلب..

انت تأمر ياخ..

ممكن تمشي البيت.. في حاجات صورها لي..

مافي طريقة والله.. ما قادر اتحرك..

بيتنا وبيتكم 4 مرابيع..

يا هندسة الواحد بقى من المشي الكتير زي شفع الروضة.. من 8 مساء في غرفتو..

لكن بكرة الصباح كدة بمشي هناك..

 

الكوتش دة جنن نص المتحديين المعاهو..

امس في واحد قال انو فقد سوائل وهو بيمشي كل يوم..

قال لي خايفك تنزل معانا نفتش ليك لدربات.. مع الازمة الصحية وندرة العلاجات ح تموت ساي..

واحدة قالت بقت تحلم انها بتجري وهي نائمة..

شنان خف على الجماعة ديل شوية..

عز.. اعمل للجماعة ديل عروض.. تخفيضات.. مسابقات..

بعد تعبهم دة لو ما فازوا باي جائزة ح يكتئبوا وح يرجعوا لوزنهم القديم تاني..

 

✍ ✍ ✍ ✍

 

ملخص الاسبوع الاول

 

الأخبار العاجلة..

 

·        تحدي ست النفور يسجل رقما قياسياً في أول اسبوع وذلك بعد محافظة اكثر من 94% من المتحديين والمتحديات على وجودهم في مجموعة الـ platinum ..

·        بعد انضام مجموعة من المتحديين والمتحديات من مختلف الدول العربية للتحدي كوتش ريما تغرد: ((كلنا شعبٌ واحد.. لم تكن الشعوب العربية اهلاً للفرقة والشتات))..

·        خلاف كبير بين كوتش سارة وكوتش تماضر بسبب حمدوك فرع السعودية.. والسناري يتدخل..

·        (اترك بالدنيا اثر جميل) يتعهد بحفلة خاصة لكوتش ياسر شنان في حال وصوله للوزن المثالي والمتحدية هبة تعلق: (جيبوا ايمان الشريف)..

·        دكتورة لدن تقرر مغادرة التحدي بعد استفسارها عن الرقم الدولي لدولة استراليا وتعرض سؤالها للكثير من اللا مبالاة والردود غير الجادة وشيماء تكتب: ((ستظل في بعض الأحيان بحاجة لأن ترجئ اتخاذ القرار))..

·        بعد قراءته لأكثر من كتابين في الاسبوع الأول.. المتحدي محمد عبد القادر يغرد: (قراية الروايات دي ظابطة شديد.. اقترحوا لي روايات جميلة) وكوتش ريما ترد: (ركز على الكتابات القريبة لي قلبك)..

·        مجموعة (نحن اصنام) تعبر عن استيائها من كثرة رسائل (اترك بالدنيا أثر جميل)..

·        كوتش مافي زول جايب خبرها تغرد: (انجازاتنا ح تظهر في اسلوب حياتنا)..

·        كوتش ريما وبعد شرحها في فئة القراءة لأهمية استشعار اسلوب تفكير الكاتب تغرد: (الانسان عبارة عن أفكار)..

·        المعروفة بطبيبة العائلة.. اريج الشيخ تغرد (تأكد من شرب الماء بإستمرار)..

·        انضمام الدكتورة الكويتية لتحدي ست النفور يفتح باباً للتساؤل: هل سيستمر احمد في تكرشه على سارة ام سيغير مساره وسارة تراقب باهتمام..

·        بعد أن تم تعيينها رئيساً للجنةِ ازالة التمكين والتمام اليومي داخل التحدي (فوفا) تغرد: ((يا جماعة الناس تتمم مرة واحدة في اليوم)) وعز يعين مساعداً لها..

·        كوتش سارة تفوز بلقب آسِرة قلوب جميع المتحديين وحبوبة (تزغرد) وتعلق (اياها بنتي البريدها)..

·        كوتش زينب تهنئ المتحدية أمل بعد وصول كتابها الجديد ((الجاي خير)) للعالمية..

·        بعد رجعوها مرة اخرى لمجموعة الـ platinum.. المتحدية سارة تحكي تجربتها في مجموعة قولد وتغرد ((كنت في غيبوبة))..

·        المتحدية ميسون تتشاجر مع احدى زميلاتها بسبب رابط التمام..

·        المتحدية روان أحمد تعبر عن سعادتها بعد حصولها على لقب ملكة جمال فئة ادارة الأعمال ومهتدي يعلق (زيتونة التحدي)..

·        اختفاء د. جو يفتح تساؤلاً داخل بعض متحديي فئة ريادة الأعمال ومجموعة OMCT تعتذر عن المشاركة..

·        المتحدية سارة (تحلف بالطلاق) في احدى تعليقاتها وتكتب: (علي الطلاق في عرسك ازغرد ليك) وشيماء تستنكر..

·        بعد حصوله على الاقامة الدائمة في مجموعة الـ platinum.. مهتدي  يعبر عن قلقه عما يحدث في مجموعة الـ bronze..

·        المتحدي عبد الله صاحب الصوت الهادئ والرسالة الواحدة والفئة الواحدة يستمر في صمته مستنكراً كثرة الرسائل في مجموعة التحدي ويغرد (كن متخصص ذو قيمة وليس شخص عام تائه)..

·        في مقدمتها عائلة الشيخ.. ازدياد عدد الاسر داخل المجموعة الواحدة يفتح باباً للتساؤل.. هل سيكون عز تيم البيت السوداني الجديد؟؟

·        فئة الوعي الذاتي تتسبب في اختفاء معظم متحديات ومتحديي عز تيم من المشاركات الاجتماعية نسبة لتوجيهات الكوتش التي تعمل في الخفاء..

·        كوتش فئة (اوريك طبك) تدخل في حالة من الاستياء للمرة الثانية.. وذلك لانتقال جميع مشتركيها لمجموعة الـ bronze ودخولهم في حالات نفسية سيئة بسبب صاحب الصوت المخيف..

·        فئة (اعرف حقك) تتصدر الترند بعد تحدث الكوتش عن حقوق الوالدين وأهمية الدعاء الدائم لهما في كل صلاة..

 

انجازات المتحديين في الاسبوع الأول..

 

·        تحدي ست النفور يتصدر الترند مرة أخرى بعد تحدث خبراء واقتصاديين ومشاهير عن تجربة التحدي السابق واثرها على اسلوب حياتهم..

·        احمد حنتوب أبوحريرة يتصدر قائمة التحدي بفوزه بنجم الاسبوع واحداهن تعلق: (وجناتك سمحة زي كتاباتك)..

·        فئة تحدي الوزن تعلن وصول اكثر من 14 متحدي لنتائج عظيمة بعد خطبة كوتش ياسر العصماء عن مشوار الـ 30 كيلو والتي زلزلت عواطف المتحديات والمتحديين..

·        الكاتبة أمل تعلن عن تعاقدها مع دار بخت الرضا لنشر كتابها الأخير (الجاي خير) وتهدي النسخ الاولى لكوتش ريما وكوتش زينب..

·        محمد عز يتقدم ببرقية تهنئة لكوتش فئة كورسات اون لاين بعد حصول بعض أعضائها على شهادات اون لاين من احدى مراكز السوق العربي..

·        وسيلات وام كلثوم تحصلان على تمويل لمشروعها الجديد من داخل فئة ريادة الأعمال وتعلق وسيلات (صرفة الصندوق) ممكن تفتح مشروع.. الناس تركز على الافكار البسيطة..

·        فئة اطفال عز تستعد لإطلاق منصة (بيتنا واحد) الإلكترونية كواحدة من إنجازات التحدي..

·        مجموعة OMCT تعلن عن تعاقدها مع منصة تكافل الراجحي لتمويل مشروعهم وسحر تغرد: ((الهدف من الحياة هو حياة ذات هدف))..

 

 

 

 

مقابلات

 

ترقبونا غداً الجمعة في مقابلة حصرية مع كوتش سارة الفائزة  بلقب (آسِرة القلوب) والمتحدي مهتدي العائد من (اللا مكان) وبعض الشخصيات المؤثرة كمحمد عز صاحب مبادرة عز تيم وحمدوك فرع السعودية وحديثه عن الديمقراطية الحديثة.. سيكون اللقاء مباشرة بعد صلاة الجمعة على قناة التحدي الرسمية..

 

✍ ✍ ✍

 

الليلة الخميس

 

يعني النوم بدري.. تلحق الجمعة سريع..

الساعة 12 جات..

بداية يوم الجمعة..

وانت بتنزل ستارة الاشعارات عشان تقفل الداتا.. تجي رسالة من الشايقي في القروب..

تقرأ الرسالة تضحك ضحكة طفل اول مرة يجرب نوتيلا..

الشايقي دة مصيبة دقيقة اسلم عليهو..

ياعمك.. مساء الخير عليك ان شاء الله ما مشغول؟؟

انت تتفضل في اي وقت..

اتصل عليك طيب..

الوو.. يا عمك.. انت البلح البتمشي جنبو دة بتعمل منو كريستالات؟؟

ليه..؟؟

كلامك دة ما كلام زول طبيعي..

الله أكبر عليك.. ما تكبر المواضيع..

اها.. بكرة نعمل ستاند اب كوميدي رايك شنو..؟؟

ابشر لكن نقول شنو؟؟

افكر في سيناريو الصباح وارسله ليك.. اتفقنا..

تقرأ رسائل الواتس البقت كتيرة فجأة الساعة بقت 1.. وانت بتقفل تجيك رسالة.. احمد؟؟

معاك..

عندنا مسابقة كتابة بكرة.. عندك حاجة تشارك بيها؟؟

الا اشوف حاجة قديمة..

اتصرف.. رسل لي..

عديلة..

تفتح اللاب توب ما تلقى أي ملف.. تتذكر انو ملفات الكتابات الاخيرة في المكتب..

تفتش التلفون..

ايييك اتورطت.. صفحة الفيس قفلتها لي اسبوعين (أم كلثوم) ضريتيني ضرة العدو..

اكتب جديد.. في باقي الليل دة؟؟.. يا راجل.. شابكنا الشاعر و الفرزدق ما بيلحقك..

طيب..

جانا الليل..

وكم زولاً بجيهو الليل يزيد همو..

في حكايات..

وفي روايات..

اصبروا علي وانجمّوا..

في الشقيان..

صبح ضجران..

بعد ما فات فقد امو..

 

رسالة في الواتس..

يا أحمد وسيلات ح تشارك في موهبة الكتابة..

وسيلات..

اي مشاركة..

طيب.. جاري المسح.. وسيلات دي ح تكتسحني سريع.. احسن لي احفظ كرامتي..

اكتب شنو طيب..

يوميات؟؟ كدة بتكتر..

قصة مزمل وسهى..؟؟ صاحبك نايم مالك عليه..

قصة عن النجاح والفشل.. كرهتنا النجاح بالله البيقرا كتاباتك بيقول انك سايق اخر موديل ومشاريعك تلخم.. اوووف..

رسالة تانية في مجموعة القراءة..

((الملخصات يا جماعة))..

ملخصات شنو؟؟

ملخصي عملتو ولا لسة؟؟

 

اكتب سيناريو حبوبة والسنجك..؟؟

اكتب لكوتش اريج؟؟

اسجل الملخص؟؟

اااااااخ يا يمة.. عفوك ودعواتك..

 

رسالة واتس..

مجموعة القراءة..

((ينتهي باستقبال الملخصات الساعة 11))..

بسم الله.. دقيقة اسجل..

((قريت مرة في كتاب..))

دقيقة 10.. الكلام راح..

Discard ..

من الأول..

قريت مرة في كتاب..

دقيقة 8.. الصوت ما واضح..

Discard ..

تسجيل جديد..

دقيقة 12..

رسالة في الواتس..

تم الرد..

تسجيل جديد..

تسجيل 2..

تسجيل 3..

تسجيل 4..

كفاية لهنا..

الساعة 4..

وااااي..

واااااااااي..

هسي دة كلو عشان شنو..

امس مساهر لغاية 3 ص والليلة الخميس المفترض انوم من 8 القى نفسي صاحي لـ 4..

هسي لو ما شاركت بيقتلوني..

الاجتهاد دة لو كان ايام الجامعة كنت بقيت عميد الكلية هسي..

تبدأ ترتب نفسك..

وتجمع اوراقك وتسجل اخر واحد.. والله تاني كان تطلعوني من التحدي ما اسجل غيرو.. والى للنوم أخيراً..

الساعة 10..

أصبحنا وأصبح الملك لله..

تحاول سريع تنتهي من مهامك الربانية والإنسانية..

يلا نشوف الجديد..

تم فتح الداتا.. تسمع صوت البطارية.. انت جيت خلاص.. يلا استحمل..

تبدأ بمجموعة القراءة..

تقرأ الرسائل كلها.. واهم رسالة..

ملخص الكتاب 5 دقائق بالكتير..

شنو يا عشاي..؟؟

5 دقائق يا احمد..

مساهر من 12 لـ 4 ص مسجل اكتر من 200 تسجيل عشان اطلع بملخص زي الناس.. والصباح تقولي 5 دقائق بس..

اتصرف..

وتسأل نفسك هسي انا اقطع ليك الملف كيف..؟؟

تفتح تطبيق تعديل الاصوات يجيك اشعار ((تم امتلاء مساحة التخزين.. تعذر فتح التطبيق))..

تنطبق عليك السماوات شاحد ربي.. ذاكرة 64 اتملت من كترة التسجيلات والاسكرينات.. يعني الا امسح نص الملفات..

تدخل الـ gallery تبدأ تمسح..

تلقى الساعة 11..

دة شنو..

اخر نص ساعة للتسليم..

وااااي..

وااااااااي..

تنتهي من المسح.. تفتح برنامج تعديل الصوت..

اختيار ملف صوتي.. تعديل.. ((عفواً هذا البرنامج لا يدعم قص الملف الصوتي))..

وانت ليك شهر ما داير تكلمني الا هسي..

قاعد زي منتخبنا في كاس العالم.. كل سنة يخسروا فيهو ملايين ويرجع من البطولة خسران من المباريات كلها..

دحين انا لي شهر ادفع اشتراكك اعلانات صباح ومساء.. ويومي البنتظر منك شغلة زي دي تشبكني ما بدعم.. غور من وشي الله لا حوجني ليك..

تسجيل من الأول.. ((قريت مرة في كتاب..))

4:59 ..

سلام..

حفظ.. ارسال..

الله اكبر.. اخيراً.. العريس في اول يوم ما بيكون فرح زيي كدة..

باقي الدردشات..

كوتش اريج.. وين مشاركتك؟؟ اخر وقت الساعة 12..

ما قادر افكر في شي هسي..

اكتب ان شاء الله ((بمبر مريم رمى مريم رمية)).. المهم انك تكتب..

السنجك.. وين السيناريو..

سيناريو شنو؟؟

انت ما اتكلمت معاي امس..

انت منو..؟؟

بسم الله.. ابو حميد مالك من الصباح..؟؟

اووو اترك بالدنيا اثر جميل.. لسة ما كتبت والله..

لكن اكتب شي وارسله ليك..

جاري الكتابة.. ((حبوبة وولدها ماشيين كريمي؟؟ لا لا)).. دي اتطحنت الفين مرة..

((حبوبة و ولدها ماشيين مكة))..

ايييك دي دايرة عصف ذهني..

انا الخلاني اتصل عليهو في اخر الليل.. زماان قالوا ليك نوم بدري وانت ما سمعت.. اها الخارجيات دي بتجي بعدما طبقة الايونوسفير تقرب من الأرض..

شوية تسمع صوت جارك.. يا احمد.. الجمعة..

جمعة شنو؟؟.. الليلة الجمعة بالله؟؟ الساعة كم هسي؟؟ 12..

ترمي التلفون وحال الشافع الابوهو شايل ليهو الصوت..

تتكشح بالموية وتلحق الصلاة..

تنتهي من الصلاة..

وتفتح باقي الدردشات.. وتبدأ ترد عليها كأنك مكتشف قانون فاراداي..

تفطر وتتغدى وتشرب الشاي سوا..

وتنتظر النتائج وكلك خجل.. وفجأة تتذكر حبوبة..

الو.. السنجك.. والله مافي وقت لسيناريو..

اخد راحتك في الكلام بعدين..

البيحصل يحصل..

تمام..

 

تتذكر انك ما رسلت لكوتش اريج..

اريجنا.. استلمي دة اشتراكي..

والله ما عارف بيتكلم عن شنو.. لكن ما بخذلك..

طيب.. الساعة 4 ح نبدأ..

تمام..

 

وتنتظر الاسبيس وتتفاجأ بالعظمة الفيهو..

تحضر الاسبيس وانت ما فاهم الناس بيقولوا في شنو.. لكنك مستمتع..

 

* * *

 

بعدين ح ارسل ليكم ملخص الاسبيس..

 

✍ ✍ ✍ ✍ ✍

 

أول يوم في الأسبوع الثاني

 

بعدما الاسبيس انتهى وانت عامل فيها فاهم الكلام الكبير السمعتو ..

تقرر انك ح تنوم بدري..

وتقفل الداتا عشان ما تتجهجه زي أمس.. ترمي التلفون وتصحى بدري تلقى 20 دردشة..

كم؟؟..

20 دردشة..

لما كنت ماسك منظمة (نسخة خير) ما جاتني كمية دردشات زي دي..

يا ربي الرقم دة حق بنت وانا ما عارف..؟؟

ناس الواتس نشروا رقمي في موقع مطلقات عظيمات؟؟

دة تلفوني انا..؟؟

انت مجنون.. انت ساكن براك في البيت يعني ح يكون حق منو..؟؟

من متين في زول بيعبرني..؟؟

ولما يعبروني.. يعبروني 20 مرة؟؟ دقيقة..

رسالة من ناس البيت.. ما برد عليكم..

في يوم زي دة انا ما داير اهل..

في 20 نفر عبرني..

دقيقة اشوف..

اول رسالة تلقى صاحبك السنجك مشى 11 كيلو..

كم..؟؟

11 كيلو..؟؟

كيلو شنو..؟؟ سكر ولا بن؟؟

مشى على رجليهو..

مشى 11 كيلو على رجليهو؟؟

اي..

ودفنتوهو ولا لسة؟؟

انا مرة مشيت كيلو واحد..

رجعت البيت وكملت صباعين move في ركبي..

وهو مشى 11 كيلو عادي..

دقيقة اتصل عليهو..

السنجك اخوي.. كفارة ياخي..

مالك في شنو..؟؟

ما عجبني ليك والله..

في شنو يا احمد؟؟

سمعت انك مشيت 11 كيلو.. اها الكلب الكان ساكيك قبضوهو ولا لسة..؟؟

لا لا ما كان في كلب الحمد لله.. اليوم الجو كان سمح وانا صحيت نشيط فقلت اتمشى شوية..

واضح انو شوية..

شنو..

البلح العملتو في الكرستالات..

بلح شنو يا احمد..

مشيك دة ما مشى زول طبيعي..

شكلك كدة بتشيل التمر البتصورو كل يوم وبتعمل بيهو كرستالات.. الشغل دة شكلو اصلي عديل.. وقت بتمشي 11 كيلو لكن سؤال انت كويس هسي؟؟

اي الحمد لله..

الحمد لله.. قلت اشوفك..

كدة اتطمنت عليك.. لكن نصيحتي ليك استغفر كتير.. وانت بتمشي.. على الاقل لغاية ما اثر البتاع دة يطلع..

الرسالة التانية..

تم اضافتك في مجموعة..

الثالثة.. الرابعة.. العاشرة.. الفئات..

البعدها..

سلامات رسل لي الرابط..

دة شنو..

مافي دردشة فيها شي سمح..؟؟

رسالة من الكوتش..

كوتشينا الرايقة..

شكراً ليك شديد ومبروك الفوز المستحق..

انا؟؟ ((ري اكشن محمد ثروت لما (قمر) قالت ليهو انت بتشبه رشدي أباظة.. في (فارس بلا جواز)..))

انتِ مرسلة لي أنا كلام سمح زي دة؟؟

ما عارف فزت بشنو.. لكن بعد التهنئة دي.. لو طردوني من التحدي ما خسران..

البعدها..

الفائز ورافع راسنا..

دة منو؟؟ انا فزت؟؟

دقيقة بس.. انا كنت مشارك بشنو؟؟

الملخص.. السجلتو 200 مرة فاز؟؟

اللجنة ماسكاها اريج؟؟

كيف انا افوز ومهتدي قاعد؟؟.. في شي غلط..

وين مهتدي.. رسالة من مهتدي..

((حبيبنا احمد مبروك الفوز))..

وجع..

مهتدي زااااتو يرسل لي تهنئة..

دقيقة اخد بكيتي اول..

زمان لما كنت بجي الأول.. اسبوعين ما بطلع من البيت..

عشان لو طلعت اولاد الجيران بيدقوني دقة الجبنة عند الحبوبات..

 

مرة عندنا واحد اسمو (علي صبّة)..

الإسم براهو يخوّف..

دة قبل الامتحانات بأسبوع بيحرس شارعنا.. عشان يراقب تحركاتي..

قبل الامتحانات بساعتين بيقول لي لو ما بدلت اوراق امتحانات الا تشوف ليك حلة تانية..

مرة كان عندنا امتحان انجليزي.. وعندنا عرس ود عمتي في نفس اليوم.. انتهيت من اول نص ساعة.. وداير اطلع اتذكرت علي صبة..

علي خليني امشي..

يحدر لي..

علي الناس بيمشوا الصالة ويخلوني..

علي.. عليك الله داير الحق العربية.. بحل ليك امتحانات السنة الجاية..

الواحد مصيره كان مرهون باجتهاد علي وعدم انتباه المراقب..

كانت أيام الامتحانات والنتائج عندي اصعب من أيام التسنين عند الاطفال..

انا ما ارتحت في امتحانات الا بعد ما رحلنا من الحي..

لكن يا علي تنجح كيف اذا انت كل يومك مضيعو في الفارغة؟؟

تنجح كيف لو انت بالظهر نائم وبعد العصر في الميدان.. وبعد المغرب مع المسلسل.. وبعد العشاء في الجبنة وباقي الليل في الفيس بوك؟؟

تنجح كيف.. وانت كل نقاشاتك مع الناس عن ميسي ونيمار؟؟

تنجح كيف وانت ما فتحت كتاب ولا ثقفت نفسك..؟؟

تنجحي كيف لو دايرة تنومي اليوم كلو..؟؟

اعفو لي.. انفعلت شوية..

 

غايتو يا مهتدي ارد عليك بشنو ما عارف.. لكنك زي اسمك..

مهتدي دائماً..

وانت تستحق كل نجمة موجودة في التحدي..

 

رسالة من فوفا..

الليلة..

رسائل لجنة ازالة التمكين والتمام اليومي دي محتاجة لمزاج رائق وانا بالتوتر دة بغادر براي احسن من خلعة تم ازالتك..

وجعة تم ازالتك أحرّ من وجعة تم طعنك..

تحس انك فجأة بقيت في السهلة ومافي واحد ح يسعفك..

 

دقيقة اشغل قرآن عشان القلب يطمئن..

قبل ما تقرأ الرسالة يجيك اشعار ((تم ازالتك))..

 

يتبع..

 

✍ ✍ ✍

 

اليوم التاني في الاسبوع الثاني

 

جزء 2..

 

قبل ما تقرا الرسالة..

تم ازالتك..

ان شاء الله يكون ازالة من قروب العائلة..

ان شاء الله من قروب الجامعة..

ان شاء الله من قروب المؤسسة..

لكن البلاتينيوم لا..

 

فوفا قامت بإزالتك مرة اخرى..

يا جماعة فوفا دي زعلها شين..

الوصلها المرحلة دي منو..؟؟

ما سمتعو زحزحة لما قال:

((يا حضرة العشاق

الريدة ماها ورق

مين شتر الاحساس

جدع الحجارة فلق

من دق سمحتنا

والسمحة ما بتندق))..

 

اها فوفا دي ما بيزعلوها..

ساعة ونص ازالة لا كلت ولا ملت ولا يدها تعبتها..

فوفا.. لجنتكم دي اتهكرت؟؟

يا عز..حصل انقلاب..

ذكرى.. في شنو؟؟

رؤى.. مافي رد..

الرابعة المعاهم اسمها منو..

فاطمة سارة هالة يا سهى..

أنادي يا حصة منيرة جواهر يا مها..

على بالي تضرب ويطلع معايا اسمها..

الصفقة فووووووق..

 

الرسالة البعدها:

((احمد..؟؟))

الليييييلة.. دي الحركات الما ايّاها..

زول ما بتعرفو وهو بيعرفك..

لو واحد داير يتونس..؟؟ مافي وقت.. الأيام دي أيام انجازات..

لو مدير شركة وشاف شغلي في موقع الوظائف..؟؟

مع فلس اليومين دي اي شغل بشتغلو.. لكن ح اوقف شغل عز تيم.. لا لا..

لو واحد من عمال المؤسسة هنا..؟؟

ترد عليهو يسألك من مشاكل اكتر من مشاكل فوفا وعز على نتائج التمام اليومي..

الخوف تطلع بنت..

هنا مشاعرك تتكرفس..

ترد عليها باسلوب سمح تتكبشر وتضيع هيبتك..

لو دي صاحبة تمبوش مرسلاها عشان تختبرك..؟؟ وهنا امورك العاطفية تجوط..

وممكن تكون الاكس القديمة.. اتذكرتك بمناسبة الفلانتاين..؟؟ دي مرحب بيها في أي وقت لكن تتأكد كيف..

حال السواد..

هسي دي رسالة ليك؟؟

((احمد..)) طيب كمل ولا كملي الجملة..

في داعي للشحتفة دي..؟؟

ما برد عليك..

الا اعرف انت منو..

الرقم ذاتو ما مميز عشان اتوقع انو شخصية عظيمة..

 

على قول سلمى المصباح:

((المقدمات الكتيرة ما بتوصلنا لشي

ادخل في الموضوع طوالي..))

 

وفي النهاية..

ترد بكل احترام:

نعم احمد..

سؤال لو ما عندك مانع.. لجنة ازالة التمكين والتمام اليومي دي شنو..؟؟

دي لجنة مسؤولة من تخفيف اعداد الموجودين في التحدي..

بيطردوا منو؟؟

الناس الما بيشتغلوا مهامهم..

وبيشتغلوا بالليل لشنو؟؟

عشان مرة ازالوا مهتدي بالنهار ولقوا التروس واقفين.. بقوا يشتغلوا بالليل عشان الناس بيكونوا نايمين..

المسؤول منها منو..؟؟

ثلاثي اضواء البنشر..

شنو؟؟

ثلاثي اضواء البنشر.. عشان شغالين صيانة يومية..

الاعضاء منو بالضبط؟؟

فوفا وذكرى ورؤى..

اسماء زي اسماء حيوانات المقابر..

اسماءهم عكس الحاجة البيعملوها..

 

فوفا الحجر.. رئيس اللجنة والشايلة وش القباحة..

دي من الصباح للمساء احلى زولة..

قبل وقت الازالة بتتحول ((لثانوس)).. شغلها انها تقلل عدد الموجودين في المجموعات كلها..

لو بدت ازالة ما بتقيف الا النت يقطع..

عاملة زي ناس المخابرات.. اليوم كلو يتونسوا معاك ويقولوا ليك فعلا كلامك صح..

وبالمساء تلقى التاتشر قدام بيتكم..

 

وذكرى..

دي جاسوسة قديمة.. كانوا ح يعدموها قبل سنتين لكن..

عز اتدخل وانقذها..

بقت ليهو في رقبتو..

هسي شغلها في معرفة المشاغبين في الفئات.. عشان دي الحاجة الوحيدة البتعرفها.. ماسكة ملفات الناس الما بيتمموا.. تكتب اسمهم ورقم تمامهم ورقم تلفونهم واسم الفئة الهم فيها وشغلهم وعنوان بيتهم وأولاد أهلهم المغتربين وبنات اعمامهم الما متزوجات.. حتى اصحابهم الفي الروضة..

عندها خبرة كبيرة في التعرف على الناس من شكلهم.. كانت شغالة مع جهاز أمن الثورة ((منبرشات)) أيام ثورة ديسمبر..

انا بقيت بغيّر رقم تلفوني كل يومين عشان ما تعرف شي عني..

 

ورؤى..

الما عندها حس..

دي مرة استاذتها في الجامعة كانت بتسألها عن شي معين وما كانت مركزة.. اتنمروا عليها لغاية ما حاولت تنتحر.. وما ماتت.. عز انقذها وعشان صوتها راح قعدها في محل ما بتتكلم فيهو..

هسي هي قاعدة في الفئات كلها..

وفي المجموعات كلها..

ولا بتشارك ولا بتتمم..

عندها رسالة واحدة قبل الساعة 12 بـ 10 ثواني..

ترسل اموجي الجنا الواقف في الشارع وما عارف يقعد لا عارف يقوم..

ومافي واحد معبرها لهسي..

مرات بحن عليها عشان التنمر الاتعرضت ليهو..

ومرات بقول تستاهل عشان غتيتة.. و كاتلة ضلها..

لا اجتماعية وبتكضب علينا زي فوفا..

ولا بتذكر الناس بي شي زي ذكرى..

ولا بترسل رسائل زي الباقين..

اليوم كلو صانّة..

وقت التمام بترسل رسالتها الواحدة ديك..

 

وفي ناس شغالين تحت تحت برضو.. بس ما ظاهرين..

ديل بيكونوا مدسوسين نصنا وبينقلوا الأخبار لعز..

طيب انا مفروض اعمل شنو.. عشان ما يزيلوني؟؟

تنجزي مهامك في وقتها وتتممي بدري عشان لو ازالوك من المجموعة دي.. ح تمشي الـ gold وديك اول منازل عذاب القبر..

طيب.. رسّل لي رابط التمام..

موجود في وصف المجموعة..

تمام..

رسالة لفوفا..

مافي رد..

ذكرتيني كلام زحزحة تاني..

يا فوفا..

((نشيطة رحتِ

مالك رجعتِ معسمة

زادوك ملح

ولا انزلقتِ من السماء))..

 

(رسالة من فوفا)..

أخيراً.. يدك وجعتك..

احمد انت الدخلك القروبات دي كلها شنو..؟؟

قالوا عندهم اصنام دايرين واحد يرد فيهم الروح.. الواحد يعمل فيكم خير تخلعوهو كدة..؟؟

اسمك اتكرر علينا وما عرفنا انت تبع ياتو مجموعة.. انت متمم ولا لا..؟؟

اتمم لشنو وانا حصلت على الاقامة الذهبية في البلاتينيوم؟؟ بالله التقول اقامة في مدينة الشيخ زايد ..

خلاص.. دقيقة ارجعك..

لا لا.. ما داير ارجع للأصنام تاني.. خليني مع البلاتينيوم دة بس..

قاعد معاهم يومين مافي واحد رسّل رسالة.. ارسل ليهم صباح ومساء مافي واحد فيهم علق.. محل ساي أشرب فيهو قهوة مافي..

لكن بعد خلعتك دي الا آخد اجازة يومين من الشغل..

اشعار رسالة تاني..

يارب ما يكونوا ازالوني تاني..

اييك رسالة من امي.. لي اسبوع ما اتكلمت معاها..

ودعتكم الله..

 

اتفقدوني كل يوم إحتمال يزيلوني بسبب اليومية دي..

 

✍ ✍ ✍ ✍

 

اليوم الرابع في الاسبوع الثاني

 

رسالة من كوتش سارة:

الما بيحضر سيشن بكرة ح يطلع من فئة اللغة الانجليزية..

 

رسالة من كوتش زينب:

اي واحد ما قاعد يشارك هنا ولا عمل اي ملخص ح تتم ازالته..

 

رسالة من كوتش شنان:

اي واحد بيمشي في اليوم اقل من 8 كيلو.. يغادر الفئة سريع..

 

كوتش ريما:

اي طفل ما بيغني ماما جابت بيبي ح نجيب ليهو الشرطة..

 

كوتش خالد:

اي واحد ما بيغني Bella Ciao ح نطرده..

 

أي واحد ما طلع موكب ح يتم استبعاده..

أي واحد ما دخل في علاقة وفشل ح نطرده..

اي واحد ما بيعرف يركب الفراشة  لناس البيت ح نطرده..

أي واحدة جارتهم طلقوها وما شالت جبنتها ومشت اخدت بكيتها معاها تطلع من هنا..

أي واحد ما حافظ بنود اتفاقية جنيف يطلع سريع..

أي واحد ما حافظ يوميات حنتوب ح نوديهو البرونز..

أي واحد ما عارف حبيب طوكيو اسمو منو ح تتم ازالته..

أي واحد ما قرأ كتاب الرجال من المريخ والنساء من أمبدة ح يتحرم من نجم الفئة..

أي كوتش ما بيعمل ازالة للناس ديل ح تتم ازالته..

أي كوتش بيعلق على كلام السنجك بيتحرم من حق الفيتو..

 

الحصل شنو يا جماعة..

عز عمل قوانين جديدة..

مالو فجأة قلب قيس سعيد..؟؟

 

140 رسالة في ربع ساعة..

احمد رابط التمام وين؟؟

احمد التاسك اليومي دة شنو؟؟

احمد عفاف دي منو..؟؟

احمد.. جارتكم طلقوها ليه؟؟

احمد.. طريقة طباخة البامية المفروكة لو ما مشغول..

احمد السوسيو الأمس مات من عدم الأكل ولا انتحر عشان السنجك قال انو لونه بنكك؟؟

احمد.. امس عز قال (مي عمر) بدل (رؤى).. قصدو يرسل رسالة خفية لرؤى ولا كان بيحضر في مسلسل لؤلؤ؟؟

احمد..

احمد..

هسي ارد على منو..

 

الحاصل شنو يا عز..

مافي رد..

الكوتشِس السافهنّي.. م ح يردوا كلهم..

الكوتش الكيوت..

مالكم قلبتوا علينا فجأة..؟؟

عز عمل قوانين جديدة..

قوانين شنو يا كافي البلاء؟؟

قوانين عشان تشتغلوا زي الناس..

القوانين اتوضعت عشان تنظم الحياة.. ما عشان تقيد الواحد..

وين التقييد هنا..؟؟

الازالات البتعمل فيها فوفا الحجر دي ما بتخلع؟؟

بيني وبينك انا ككوتش مرات بسأل انا تممت ولا لا.. طريقة فوفا دي بتخلع بصراحة.. لكن لازم تتم ازالات عشان الناس تجتهد..

طيب الواحد لو داير يستفيد في فترة التحدي وعنده وقت.. م ح يستفيد منّو.. عشان طبيعة التحدي الاتغيرت والقوانين الظهرت فجأة دي..

كيف..؟؟

في ناس قالوا فوفا أزالتهم وهم بيتمموا كل يوم..

متأكد.. اي..

فوفا جنّت ولا بقت حقارة فجأة..؟؟

وفي ناس قالوا طلعوهم من التحدي رغم انوا رسلوا ليها وما ردت عليهم..

متأكد..؟؟

والله جد..

في حاجات كتيرة تانية..

قبل يومين سألت كوتش فئة تانية انا ما مشارك فيها اني احضر معاهم السيشن.. قالت عز ح يطردنا..

اي عز اتغير فجأة..

سالتوهو.. ممكن تمبوشتو مزعلاهو..

ما بيحتاج نسألو..

معروف دكتاتوري قديم.. هسي المانع شنو اني اكون مثلا في فئات اللغة الانجليزية كلها اذا كل واحد شغال بطريقة مختلفة.. اكيد الفائدة ح تكون اكتر..؟؟

لكن الموضوع فيهو منافسة..

ممكن اتنازل عن الجائزة لو السبب المنافسة.. وفي فئات مافي تنافس بيناتها..

اسأل عز..

وحياة عيونك السمحة دي عز ما بيرد..

طيب انا ما عندي شي اعملو.. بعتذر ليك..

عديلة..

 

عفاف الحجر..

مالك مع الجماعة..؟؟

مالي؟؟

قلبتِ حياتهم كلها.. في مجموعة من المتحديات قالوا انك طلعتيهم من البلاتينيوم وهم بيتمموا كل يوم..

قلت ليهم رسلوا لي بياناتكم وما رسلوها..

ممكن ما شافوا الرسالة؟؟

دة ما عذر..

طيب والحل..؟؟

يبدوا من البانك زون ويطوروا نفسهم لغاية ما يوصلوا البلاتينيوم..

هم مشاركين في Arab Got Talent ؟؟ والناس الطلعتيهم من التحدي..

احمد.. اولاً مافي شي بيخليك تتكلم باسم الناس..

وثانيآ.. لو عندك حاجة قولها لعز..

عز ما بيرد.. والناس كلها عارفة..

معليش.. مابقدر اعمل شي..

 

رسالة جديدة..

احمد.. أشرح لي التاسك العندنا اليوم..

التطبيقات.. يوتيوب.. رابط القناة.. نسخ الرابط.. جاري الإرسال..

احمد ملخص الدرس الاخدناهو اليوم..

فتح Word document..

الدرس الرابع..

تحديد.. نسخ.. ارسال..

 

احمد.. السيناريو وين..

احمد.. تعال التلغرام..

احمد.. الاسبيس بدأ في تويتر..

احمد.. احمد..

انا الورطني شنو في الحاجات دي كلها..

ما كفاية الميزانية البدت تطلع كلها اخطاء.. بالله الاكسل ذاتو بقى بتاع حركات..

بعد شوية تسمع التلفون يقول ليك ((انت لو ما باقي على صحتك انا باقي على نفسي))..

مالك انت برضو؟؟

((انت ما بتحس انت ليك يومين شغال فيني ضغط.. اديني 10 دقائق اطلع من الضغط العاملو لي دة.. ليك يومين تنطط من واتس لماسنجر ليوتيوب لـ pdf reader لـ office documents انا ذاتي ما عرفت انت بتعمل في شنو.. بتكتب ولا بتقرأ ولا بتخطط.. ارسى على شي معين عشان ما انفجر ليك.. تاني اليوميات المكرهنا بيها الا تكتبها على الورق))..

طيب اصلي وارتب نفسي عشان خالتو روضة قالت لي الصلاة بترتب الواحد..

وبالمرة أنوم متوضي.. عشان النوم على وضوء بيخلي الملائكة تستغفر ليك للصباح..

تتوضأ وتبدأ تصلي..

وانت في نص صلاتك تتذكر انك اصلا صليت..

دة شنو؟؟

وقت عارف اني صليت بتذكرني في الركعات الأخيرة..؟؟

هسي انا اكمل ولا اوقف..؟؟

اشعار في الواتس..

يارب ما يكونوا ازالوني تاني..

 

((السلام عليكم ورحمة الله.. السلام عليكم ورحمة الله))

ما تعرف انك قطعتها ولا تعرف انها انتهت..

المهم انك ما قاعد في المصلاية..

 

احمد.. عملت شنو؟؟

اتكلمت مع فوفا واعتذرت..

طيب.. انا ح اغادر..

وانا م ح اتمم..

ح يطلعوك من البلاتينيوم..

حتى لو من التحدي..

ودعتكم الله..

 

✍ ✍ ✍ ✍ ✍

 

آخر يوم في الاسبوع التاني

 

الو.. يا ابو حميد..

حباب اخوي السنجك..

ان شاء الله بخير..

الحمد لله..

يا زول ما تشيل هم.. شدة وتزول ان شاء الله..

اها جديدك؟؟

الزهراء جايطة مع تجهيزات الحلو مر.. وقالت دايرة قريشات.. وانت عارف الشهر في بدايتو لسة.. ويخربها كان تقتنع.. بتقولي بتكمل قروشك في الأكل وانا 24 ساعة اعاين للأكل واتذكر كوتش شنان..

اها.. واخبار القروب..؟؟

فوفا عندها امتحان.. وانت عارف عز ما بيقدر يعمل قانون جديد..

للأسف.. عارف..

الناس هناك كيف..؟؟

شايف في تحركات لتعديل الدستور العاملو عز.. نسبة المتضررين بدت تزيد.. بعدما الناس عرفو حكاية انك في القولد عشان الناس الما بيتمموا في تمام عز اليومي ومافي واحد بيرد عليهم ويشرح ليهم شي.. ظهروا متضررين كتيرين..

غايتو عهدنا الديمقراطية حتى لو ح اكون انا الضحية..

اها الثورة والثوار كيف؟؟

شايف في تململ وسط القوات النظامية..

قصدك الكوتشِس..؟؟ ديل اصنام ساي.. تصدق لهسي مافي واحد قال لي كفارة.. غير كوتش ريمة.. ولهسي متابعة معاي..؟؟

ممكن ما عارفنك..

ممكن..

اها.. الاخبار السمحة.. عندكم..

أمس كانوا بيتكلموا عن الزواج الجماعي ألليّل التحدي..

اها والقرعة وقعت لمنو؟؟

ما بعرف كل الناس.. لكن مهتدي وقعلو في بنية من بنّوت الشركات ديل وهسي يجهز في البدلة

وكوتش خالد بيشا حظو السمح وقع في احلى كوتش في التحدي.. ما تقول لي كوتش ريمة.. حال السرور اريتو كان حضرت معاكم..

وكوتش الفئة ألّت القروش قدر ما يجي على القرعة البنوت يغادرن.. بيقولن نرجسي..

وزولتك.. الخاينة.. ما صدقت ودوك القولد مشت لا عند حسام وبدت تكسرلو في التلج وتنبرشلو انبراشاً شين..

اصلا.. ايّاها حركات البنات من بدري..

ربنا يقوي قلبك..

اها.. هسي الاجراءات الح تعملوها شنو..؟؟

الناس ما عارفين مطالبك شنو لهسي..

طلبت انهم يرجعوا الناس الازالوهم بدون قانون رسمي..

كيف بدون قانون رسمي؟؟

في ناس نزلوهم القولد عشان م رسلوا لفوفا بياناتهم.. رغم انو دة غلط اداري ما غلط المتحدي..

اها وتاني..

وفي ناس ما تمموا.. و ازالوهم بدون ما يعرفوا ما تمموا ليه..

زي منو؟؟

كتيرين من ضمنهم أمي اسماء..

أستاذة اسماء ازالوها..؟؟

ازالها عز رغم انها رسلت ليهو.. ورسلت لكوتش سارة ورسلت لفوفا الحجر.. وجت ما ردوا عليها.. تصدق انها ما شافت رقم التمام حقها الا بعد ما ازالوها.. وما عارفة ازالوها لشنو.. هي كل يوم بتشتغل تاسكات كوتش سارة ومعانا 24 ساعة..

عندك ادلة ولا طلس ساي..؟؟

والله كلو باسكريناتو وتسجيلاتو..

بحاول اجيب ليك محامي كارب..

عليك الله جيب لي اميتاب باتشان عشان في فلم pink ابدع ابداع شديد..

قال شنو..

قال no means no..

الرفض يعني الرفض حتى ولو كان من واحد اقل منك..

الغلط لا.. حتى لو كان من أي بني آدم..

فهسي قول لعز احمد قال ليك نو يعني نو.. ما بتمم مالم تشوفوا حل للناس البتزيلوهم من غير ما تسمعوا منهم..

خليك عارف انو بكرة ح ينقلوني البرونز.. والسبت ممكن امشي البتاع القبل الاعدام داك.. فسلم عليهم كلهم.. وقول لمهتدي والسناري وباقي الشباب انو القانون الما بيتطبق على الناس كلها ما مفترض نحترمو..

 

وحددت مطالب ولا لسة؟؟

بالحيل..

1/ اعادة المفصولين والمتضررين من تصرفات فوفا الفردية أو معاقبتهم في حضور الدستوريين كلهم..

كيف يعني؟؟

المحاكمة تكون في البلاتينيوم ونسمع من المتهمين ومن هيئة المحلفين بحضور مجلس الشيوخ والاصنام والكوتشِس..

2/ تحديد كوتش اسمو مدير علاقات.. ودة مسؤول من الرد على الاستفسارات 24 ساعة.. ممكن تكون ذكرى بالصباح ورؤى بالمساء.. بدل ماهم بيظهروا ساي والشغل كلو على فوافا وكوتش سارة..

3/ حصر ادوار فوفا ولجنتها الدكتاتورية في رفع التقارير لكوتش العلاقات وهو بيحدد الاعذار الممكنة وغيرها وفقاً لدستور عز تيم..

طيب.. ح نقدم عريضة قضائية فيها الطلبات دي وبديك خبر..

اها بعدين بجيب ليك الغداء وباقي الحاجات.. داير شي..؟؟

عليك الله بطانية تقيلة عشان القولد هنا تكييفه مركزي..

تمام..

 

الو.. حبوبة كيفك..

يحبك برص.. دة شنو العملتو دة..؟؟

مالك.. يا حبوبة؟؟

قالوا لي عملت مشكلة مع فوفا وعز و ودوك الاصلاحية..

اي ودوني..  لكن يا حبو..

البيخليك تتشاكل مع الناس ديل شنو؟؟ ماك عارفهم ناساً فوووق وعلاقاتهم واصلة؟؟

تاني ما بتشاكل يا حبوبة.. لكنهم ازالوا امي.. استاذة اسماء..

ازالوا الاستاذة البتعلم الشفع فوق الحلة..؟؟

اي والله..

تصرف اليابة والتابة..

عز ما بيعملها..

والله يا امي قالوا عز هو الازالها بايدو..

بيكون غلطان..

هي كلمتو وما رد عليها كالعادة..

ربنا يرجعها بالسلامة ويطمنا عليك يا جناي..

آمييين..

دحين هسي بتنوم كيف..؟؟

والله يا حبوبة لقيت هنا السراير فاااضية والتكييف صباح ومساء.. وحات الله يا حبوبة مافي اي ازعاج هنا.. لا هسي  مدير السجن ما اتكلم معانا.. بيكون نائم لسة مع الجو البارد دة.. المسؤولة اسمها امتثال بيقولوا طيبة شديد وبتطلع الناس براءة.. داك الأسبوع  فتحت للناس الباب وقالتلهم اطلعوا براكم..

ربنا يكتب لها السعادة يا جناي..

امييين..

معاك منو من الناس البتعرفهم..

معانا امجد ود حاج عبد الله..

ما عرفتو..

ود حاجة نفيسة بت علي..

اااا القوالة ديك؟؟

اي..

مالو.. ما كان كويس.. الخربو شنو؟؟

صاحبو مهند قال ليهو بتمم ليك وما تمم ليهو.. هسي مقبوض في شيك تمام يومي.. قبضتو فوفا الحجر.. جابت الناس العليهم شيكات تمام جت ولا واحد ما خلتو.. مرة واحد كان مدسوس في نص الصلاة.. قالوا ذكرى الجاسوسة كانت مراقباهو.. داك اليوم حدرتلو وقبضتو.. يمين بالله يا حبوبة لامن الإمام وقع من الخلعة..

ومعانا علي ود طه.. كان في الدهب يومين ما عندو شبكة.. جات فوفا قبضتو من الميناء البري..

ومرة ودوني الاصلاحية حقت البنوت اكلمهم عن المستقبل المشرق المنتظرهم برة القولد.. لقيت واحدة اسمها سارة ولا اسرار ما عارف.. جاية في سرقة.. داك اليوم سرقت من جارتها تلفون راجلها المغترب وكان يبقالها بطلاق.. الليلة المديرة بتطلعها.. قولي لناس حلتنا الفي البلاتينيوم يحذروا منها..

ومعانا واحدة كدة صااانة ما بتتكلم شكلها قتلت ليها جنى في بطنها..

ولقيت ريان الانصارية.. وحاة الله بتتمم كل يوم.. الا فوفا قصدتها عشان سمحة وشاطرة..

ولقيت بت سعدية بت جاه النبي قالت لقوها ماشية ساي في الشارع جابوها هنا..

حال العدو.. فوفا دي جنت خلاص انشوفلها فقير يعالجها..

قالت الناس ديل ما بيرسلوا ليها بياناتهم..

من متين يا ولدي الطالب بيمشي بيت الاستاذ..؟؟ هدول الجهلة كلهم بيتلموا في بيت العمدة والأستاذة بيجوا يسألوهم.. والما بيرد بيمشوا بيتهم يسألوا أهلو..

لا لا.. فوفا دي مركبة مكنة مدير منظمة الصحة العالمية..

FOW..

فاو شنو المطرطش دة.. ديك الليّل الاكل..

هي صاح WHO..

وقت جبت سيرة الأكل ان شاء الله الأكل هناك كويس؟؟

الحمد لله.. يعني.. اياهو الرز والجداد 24 ساعة..

دة في السجن؟؟

ونان في البلاتينيوم بتاكلوا شنو؟؟

امس كوتش ريما جابت لي اكل كدة ما عرفتو.. اكل زي الكان في عرس ود المعتمد القديم..

بري بري.. ما تاكل منو.. داك اليوم في عرس ود المعتمد القديم الجهلة جت اتسمموا..

قالت اسمو كاراميلا بالشاميل معاهو ساخن بارد فيهو فرالوة بالحليب..

لا لا.. دة اياهو البيسمم ذاتو.. من اسمو الما بيتنطق دة..

السنجك قال بيجيب لي عمود فيهو قراصة بي تقلية ومعاهو مكرونة بالجبنة وتيرمس جبنة..

ربنا يغطي عليهو..

آميييين يا حبوبة.. طيِّب خلاص كان شفتيهو.. امس متشاكل مع الزهراء بسبب الحلو مر..

ذكرتني رمضان يا عشان.. ان شاء الله تحضروا معانا..

قريب ان شاء الله معاكم..

هسي قالوا بتاخد كم يوم في الاصلاحية دي؟؟

باقي لي الليلة بس هنا.. ما عارف كان اطلع براءة ولا كان ينقلوني محل تاني..

ناس البلاتينيوم ما عينولك محامي..؟؟

لسة مافي شي.. قالوا المحكمة مقفولة عشان فوفا في الامتحان.. امانة تدعيلها انها تنجح..

طيبة قلبك دي هي المضيعاك.. بعد العملتو فيك بتقولي ادعيلها..؟؟

ياحبوبة قالوا الناس بتمر بيهم مراحل وضغوطات ما بيقدروا يشوفوا ابعد من ظلهم.. ممكن فوفا منهم..

عديلة يا جناي.. اتصل علي كل يوم.. بدور اطمن عليك..

ان شاءالله.. بعدين بشوف السنجك واكلمك.. دعواتك يا حبوبة..

تنعدل عليك وتطلع بالسلامة.. وربنا يحفظك ويقويك على رد حقوق الناس..

آمييين..

 

✍ ✍ ✍ ✍

ملخص الاسبوع الثاني

 

·        تململ كبير وسط فئة الانجليزي بعد انشغال كوتش سارة والسناري يغرد.. افضي لينا شوية..

·        كوتش ريما تغرد بعد أول اسبيس لها.. شكراً عز تيم.. انتم أهلي..

·        الفائزة بنجمة الشعر.. الكاتبة أمل تكتب في حمدوك فرع السعودية..

·        كوتش خالد بيشة يستلم شهادة اللغة الاسبانية من السفير الاسباني وأسرة عز تيم تحتفل..

·        السنجك يفوز بلقب صاحب اكتر شخصية متوفرة على مجموعة البلاتينيوم..

·        صاحبة الاسمين سارة و اسرار تقوم بعملها المعهود وهو التنقل بين القولد و البلاتينيوم..

·        خلال 4 مواسم من التحدي احمد حنتوب يصبح أول من يتنقل بين القولد والبلاتينيوم اربع مرات في اسبوع واحد..

·        بعد الضجة التي صاحبت النشاطات الأخيرة داخل التحدي.. كوتش ريما تغرد ((الثورة تصرف خاطئ)) وكوتش اريج ترد ((الثورة سلاح الاقوياء))..

·        المتحدية هبة تعلن نقصان وزنها بمقدار 2 كيلو في اسبوعين واحمد يعلق.. ((لو قروش الأكل دي تعبانة فيها ما بتتخلي عنها بالساهل))..

·        الانبراش داخل المجموعة يطال كوتش خالد بيشة واحداهن تعلق لغته الاسبانية احسن من حياتي كلها..

·        المتحدية ريان تستيقظ من نومها لتجد أنها في القولد رغم انها قامت بعمل التمام ولجنة التمكين والتمام اليومي تستنكر..

·        د. جو المعروف بصاحب الشخصية النرجسية يغني في احدى اسبيسات عز تيم واحداهن تعلق.. صوتك سمح لكن قلبك حجر..

·        كوتش فئة اوريك طبك تجمع اوراقها استعداداً لمغادرة التحدي وذلك بعد نزول جميع مشتركيها للبانك زون..

·        اصابة السيوسيو الشهير داخل التحدي باكتئاب حاد بعد أن وصف السنجك لونه بالبنكك..

·        كوتش احمد عبد القادر يبدع من جديد ويوجه رسائل صباحية للمشتركين..

·        علماء كيميائيون.. رسائل عز تيم الصباحية تؤثر على الدماغ كتأثير هرمون الدوبامين المسؤول عن السعادة والنشوة..

·        اختفاء كوتش روان عن الواتس يؤثر على بعض المتحديين وغرد احدهم: بنستمد طاقتنا من ونستك..

·        انشغال مهتدي يفتح الباب على مصراعيه للمنافسة على لقب نجم تحدي ست النفور..

·        كوتش سارة تقوم بتقييم حسام الدين باعلى الدرجات في المخاطبة واحمد حنتوب يعلق.. شكلي كدة ح اقيّم نفسي براي..

·        المتحدي أشرف يفوز بنجم فئة اللغة الانجليزية في اسبوع التحدي الثاني وذلك لأنه اول من قام بتثبيت مجموعة اللغة الانجليزية على الواتس واحمد حنتوب يبتسم..

·        خلاف بين عضو لجنة ازالة التمكين والتمام اليومي رؤى وعز بعد تكرار اسم مي بدلاً عنها وتكتب: ((لو عاجباك مي.. جيبها لي))..

·        مجموعة من الفئات تسجل اختفاء تام وذلك لانشغال جميع اعضائها بالجري وراء كوتش شنان..

·        السنجك يتمشى 15 كيلو في بداية الأسبوع الثاني وصديقه احمد حنتوب يكتب.. ((ان شاءالله البيكرهوك يسكهم كلب بوليس))..

·        الزهراء ترسل رسائل للسنجك وكوتش ريما تعلق.. مرتك مالي مالها دي نتيجة اهمالها..

·        دكتورة لدن تدير أول سيشن انجليزي بدون كوتش سارة وسرونا تعلق.. انا دايرة ابقى كوتش..

·        المعروف بانشغاله الدائم.. المتحدي حسام الدين يتعرض لهجوم عنيف من المتحديين وذلك بقبوله طلب صداقة محبوبة احد زملائه..

·        انضمام المتحدية فاطمة من المملكة العربية السعودية في الاسبوع الثاني يجدد التأكيد على وحدة الشعوب العربية..

·        مجموعة OMCT تقوم بعمل اول اسبيس لها على تويتر واريج تعلق.. نتائجنا ح تظهر قريب..

·        رئيس لجنة ازالة التمكين والتمام اليومي تدخل في حالة من الخوف بعد امتحانها الأول واحداهن تعلق.. ((ضوقي من نفس الكاس البتشربينا منو..))

·        نجاح وسيلات وام غيث في امتحانات السمستر قبل الأخير والمتحدية فاطمة تكتب: ((دائماً وينرس))..

·        ذكرى الجاسوسة تتعرض لمضايقات من بعض المتحديات وذلك بعد عرض التقرير عن لجنة ازالة التمكين والتمام اليومي..

·        محمد عز يفوز بلقب صاحب أفضل شخصية ادارية في التاريخ الحديث..

 

تساؤلات..

 

·        هل سيحافظ اصحاب نجوم فئات الاسبوع الأول على نفس تقديرهم أم لا و احدهم يعلق.. ((تقييم الكوتش ما بستند على شي علمي))..

·        هل سيتوقف كوتش ياسر شنان عن المشي خلال هذا الاسبوع أم أنه سيواصل مشوار الـ100 كيلو..

·        هل سيستمر احمد في تكرشه على سارة؟؟

·        هل ستستمر الديمقراطية داخل التحدي أم أن الانقلاب يشوى على نار هادئة..

 

✍ ✍ ✍ ✍

 

اليوم الأول في الاسبوع الثالث

 

أخيراً ارتحت من جوطة البلاتينيوم.. والجمعة للنوم بس..

اشوف اخبار محمد عز.. الكلام معاهو عالم تاني..

تم فتح البيانات..

تسمع البطارية..

جيت خلاص..

استحمل الراجيك..

 

احمد.. صباح الخير عليك..

حبيبنا.. صباحك زين..

احمد.. الحق.. السنجك عبر..

احمد.. الووو..

يا ابو حميد..

لقيتوا العقودات الجديدة واتغيرتوا علينا..

احمد..

ياخ رد علينا ساي..

يا احمد.. مالك ما بترد..

الواحد مما يبقى جلابي يعاين للناس بطرف عينه..

بسم الله..

في شنو..

 

اول رسالة..

مبروك العقد الجديد.. ان شاء الله موفقين دائماً..

الرسالة دي لي انا..

 

ابو حميد..

عجبنا ليكم والله تستاهلوا..

 

في شنو يا جماعو..

 

آآاي.. اآآي..

اعمل فيها ما عارف عشان ما نسألك..

ما دايرين منكم شي.. اصلا القروش بتغير النفوس.. غلطان انا الرسلت ليك..

في شنو..

تم حظرك..

يا جماعة الحظر دة اسوأ فعل ممكن يعملوا بني آدم.. الحظر دة هروب من قبول اعتذار غيرك..

ادونا فرصة معاكم.. نبرر ليكم..

 

الرسالة البعدها..

في شنو يا عمك؟؟

قالوا انو جاكم عقد من جلابة البلاتينيوم 2 والسنجك وقع معاهم العقد..

دقيقة اشوف السنجك..

 

سلامات.. الحصل شنو..

مافي رد..

اتصال 1..

مافي رد..

اتصال 2..

مافي رد..

اتصال 14..

مافي رد..

 

مكالمة من حبوبة..

يا وليدي.. كيفنك..

الحمد لله.. انت كيفك..

نحمدو تب.. فوف نعم..

وين صاحبك السنجك.. قول ليهو الغسالة والثلاجة وين؟؟

قال بيجيبهم ليك..؟؟

أيي.. داك اليوم قال لي بجيب ليك غسالة وثلاجة ومكوة.. وبالمرة قول ليهو جيب لي الغاز البيشتغل بالكهرباء.. العمدة قال الشهر الجاي بيجيب لنا الكهرباء..

طيب بشوفو وارد عليك..

ما عارفة يا حبوبة  السنجك.. سنجك سنو البيجيب ليك غسالة..

 

انرجع الرسائل..

الكلام دة الجابوا ليكم منو؟؟

محمد عز..

دقيقة اسالو..

 

يا عزنا..

حبابك والله.. الف مبروك ليكم..

تستاهلوا فعلا..

نستاهل شنو..

عقد في البلاتينيوم 2 بالدولار..

لكن السنجك شال القروش براهو..

كيف يعني؟؟

قام بالضلام وهسي ما بيرد علي..

دقيقة اشوفو..

منتظرك..

 

رسالة من الزهراء..

احمد..

السنجك دة كان معاك قول ليهو رد..

ما جنبي والله..

بيكون عندو شوية شغل..

عارفة الضغوطات البتجيهو فجأة..

لما يرجع بكلمو ليك..

عديلة..

يا كافي البلاء..

مرتو باعها..

دة يتعاملوا معاهو كيف؟؟

ياعز.. اها جديدك..

اخوك دة قال انو ماعندو ليك اي شي..

كيف؟؟

قال العقد دة خاص بيهو بس.. وفيهو بند انكم تخلوا البلاتينيوم ستارز 1 وعارف انك ح ترفض..

برفض لو مافيهو قروش.. لكن لو فيهو قروش بيتنا زاتو بطلع منو.. لكن ليه ما بيرد علي؟؟

دقيقة بس.. رسل لي فيديو هسي.. شكلو مشى المالديف..

متين بالسرعة دي؟؟

بيكون مشى مع د. جو..

اصلا النرجسيين ديل همهم انو يفرقوا بين الناس.. المرة الفاتت فرق ناس فئة المال والأعمال لمجموعات داخلية وكل مجموعة شغالة براها.. كيفن ما يفرق بيناتنا شكيتو لي الله..

طيب هسي بخلي السنجك يرسل ليك..

منتظرو..

 

السنجك..

الووو.. ابو حميد..

الحمو الليلايسك..

مالك..؟؟

دة شنو العملتو دة..

عارف انك ما ح تقبل..

اقبل شنو؟؟

انك تخلي البلاتينيوم 1..

بالفلس العلي دة اتنازل عن عيوني ذاتها خليك من قروب على الواتس..

لكن فيهو بند تاني..

انك ما تكتب يوميات هناك وتكون حصر عليهم بس..

لا حول ولا قوة إلا بالله..

دة بند شنو المعولق دة..

عشان كدة قلت انك ما ح توافق وح تفوت علينا الفرصة دي..

ومابترد على الزهراء مالك..

الزهراء منو..؟؟

وااااااي انا منك.. كيف الزهراء منو؟؟ الزهراء بت الزين.. أم وليداتك..

عليك الله ما تذكرني الماضي الأليم دة.. هسي انا في نص البنوت الصفر ديل والشعر الواصل الركب والوش انضف من جامع الحلة.. تقول لي الزهراء.. خليها مع العواسة وقعدات الجبنات ألت نسوان الفريق..

ما كلمتك بالأكل.. قبيل د. جو وداني محل كبدة ألت الإبل.. وبعدها مشينا شية ضان.. علي الطلاق لحمة زي حلاوة قطن.. تقول لي لحمة المعزة ألت الحلة تقول ماكلة تسالي..

طيب.. والحل هسي؟؟

بعد ما اشبع من القريشات دي برجع.. لكن ما تخاف حقك محفوظ..

انت كملتها لحمة وكبدة.. خليت فيها شي تاني يتحفظ..

خليت ليك شوية قريشات في الحساب حق الفرقة..

كان كدي خلاص..

وناس البلاتينيوم.. عشرة ما عندك نهائي؟؟ كوتش ريمة من أمس مصدعة.. وكل ساعتين مركبين ليها درب salt غير حبوب الضغط.. وام غيث قربت تطلع من المجموعة وصاحبتها وسيلات كل دقيقة تجيبها من الباب وهسي أهلها كلهم حارسين الباب.. ولو شفت ود عمر  وصدفة.. ديل كل دقيقتين يجيبوا لي جبنة واكل خايفين علي من الهبوط.. عليك الله ارجع..

لكن الناس ديل انا وعدتهم اني اشتغل معاهم ومعاهم عسجد وسهيل.. يجيبوا لي فطائر.. حاجة زي القراصة بالروب.. لكن طعمها براهو.. الزهراء لامن تموت ما بتطبخ زيها..

وقت عندهم الحاجات السمحة دي ممكن نعمل اتفاقية سوا.. تضمن انو كل الناس تكون رضيانة..

عديلي لكن.. قول لناس البلاتينيوم مافي ليهم هدايا..

ليه؟؟

القريشات دي بتكمل ساي وسط الحروم الكتار ديل..

انا منتظرك في البلاتينيوم..

شوية كدة واجي عليك..

 

��������

 

اليوم الثاني في الاسبوع الثالث

 

رسالة صباحية..

باش مهندس.. عندنا شوية تعديلات في المكتب.. اذا امكن ممكن تجي بدري شوية..

صباح الخير..

احمد التصويت بدأ..

ممكن تتابع معاك الناس البيعملوا تصويتهم بطريقة غلط..

طيب..

تم التصويت..

خطأ في طريقة التصويت..

جاري الرد في الخاص..

تم التعديل..

حل تاسك اليوم..

فتح الرابط..

خطأ في التصويت..

ارسال الرد في الخاص..

تم التعديل..

حل التاسك..

خطأ في التصويت..

جاري الرد..

مكالمة..

تم ارسال الرد..

((اطبع لي الفاتورة الرسلتها ليك))..

اغلاق الواتس..

جاري الطباعة..

فتح الواتس..

13 رسالة استفهام..

((دة شنو؟؟)) ومعاها برايفت ربلاي..

فتح الرسالة..

محتوى مسئ..

 

انا كتبت الكلام دة؟؟

ولمنو.. لحسام؟؟

دقيقة الحق حسام..

مكالمة.. الخط مشغول..

مكالمة 2.. الخط مشغول..

الواتس..

ياعمك.. لو حلفت بالكتب السماوية كلها اني ما عارف رسلت الرسالة دي كيف ما ح تصدقني..

تم الحظر.. الحظر دة ساهل كدة يا جماعة..؟؟

 

رسالة من عز..

((احرجتني))..

انا.. انا احرج زول..

انا العشت حياتي كلها تضحية عشان ما اكون سبب في زعل غيري.. اسمع كلمة أحرجتني قدام الناس..

احمد الكان الطالب المثالي في كل المراحل التعليمية وكل سنة شهادة تكريم.. يقولوا ليهو احرجتنا؟؟

ابوي كان شاف الرسائل دي بيخليني ارعى غنم عماتي شهرين كاملات..

 

رسالة من حسام..

الو..

ياعمك.. اقسم بالله الرسالة جاتك ناقصة..

تكش اهلي ويبقالي بالفلس والرزق النقص كان قاصد الحاجة الاترسلت دي..

لا عادي ياخ.. لكنها كانت غلط بطريقتها دي..

العفو ياخ..

ما بيستاهل ياخ..

عديلة.. الحمد لله انها كانت في حق حسام الطيب.. لو دة علي صبة كان جاء مشوار وعمل عركة ماليها حد.. وقت زي دة انا في المستشفى وبعمل في العملية الخامسة من عمليات الصيانة..

قالوا الواحد لو اخطأ الناس بتدعمو عشان يتجاوز.. لكن في ناس لما تغلط بتتجاوزك انت وناس زي حسام بتتجاوز الغلط..

الواحد لما يعمل شي صح.. الناس بتشكك في الحاجة العملها.. لكن لما يغلط مسبقاً بتكون حكمت عليو.. انو هو جاهل وسلبي وما محترم او ما مربى..

ما كل واحد ظهرت منو اساءة في لحظة معينة فهو بيقصدها..

بيل كلينتون عندو عبارة جميلة بيقول فيها.. او فيما معناها..

لما نكون شايلين طفل ويصرخ في وشنا.. ما بنقول الطفل دة شايل في قلبو تجاهنا.. وبنقول انو الطفل دة محتاج لرعاية اكتر او تغذية أكثر أو لشي معين فمن الأجدر انك تعامل الناس العاقلين بالطريقة دي..

والحمد لله اني بتعامل مع حسام..

المشكلة هسي منو الحيصدق اني كنت بكتب في شي برايفت..

الليلة بقت علي حكاية النجار القبضوهو في دولاب غرفة النوم..

 

القصة.. في واحدة ساكنة جنب محطة القطر وكل ما القطر يمر بشارعهم باب الدولاب يفتح.. جابت شيخ يقرأ ليها قرآن.. لسة الحال زي ما هو..

مشت لنجار.. جاء عدل ليها وزنة الدولاب و وعدها انو تاني الباب ما يفتح..

اليوم التاني.. القطر جاء والباب فتح زي كل مرة..

رجعت تااااااني للنجار..

النجار جاء عمل تعديلات ومسامير زيادة.. و حلف ليها انو الدولاب ما بيفتح براهو تاني..

اليوم الثالث.. القطر مر بالشارع.. الدولاب فتح..

مشت للنجار تاااااااني.. بعد استغراب و تفكير كتير قرر انو يدخل الدولاب وينتظر وقت القطر ويشوف السبب..

وفعلا.. المرة قفلت النجار في الدولاب وطلعت على جاراتها تشرب جبنتها..

وعلى حظ النجار الأكعب من حظي.. القطر اتعطل في اليوم داك..

اليوم عد والشفع رجعوا من مدارسهم والنجار لسة في الدولاب..

صاحب البيت رجع بيتو و طوالي على الدولاب عشان يغير ملابس الشغل بملابس البيت.. فتح الدولاب واتفاجأ بالنجار.. فقال النجار كلمته الشهيرة.. ((لو حلفت ليك بشنو ما ح تصدق اني منتظر القطر))..

 

فانا لو حلفت ليكم بشنو ما ح تصدقوا اني كنت بكتب في حاجة فكاهية وداير ارسلها لحسام برايفت..

الحاصل شنو في حياتي؟؟

الضغوطات دي كترت فجأة ولا دة رد فعل طبيعي لتراكم المهام العندي..

انا دخلت عز تيم عشان ارتب نفسي ولا اضغط نفسي زيادة؟؟

 

رسالة جديدة.. اخ أحمد.. 

((شكراً لأنك موجود..

وجودك خلق جو فكاهي بالتحدي.. موفق ان شاء الله))..

 

وااااي الكلام السمح دة لي انا..

لي 14 يوم مافي رسالة زي دي..

الرسائل البتجيني كلها كانت..

عدل لي الملفات دي دايرها بعد نص ساعة..

ابو حميد..

الطبخة في النار.. ظبطها معاك..

ابو حميد..

دايرين نحلب البقرة.. جيب معاك جردل..

ابو حميد..

عندنا واحد عيان شوية تعال اقتلو وريحنا منو..

ابو حميد..

ثلاجتنا ما بتعمل تلج.. تعال اتأكد من انو الكهرباء قاطعة..

ابو حميد..

عندنا واحدة ما بتصلي.. تعال احرقها عشان تخاف من نار جهنم..

ولو ما رديت فانت مفتري ومصدق نفسك..

واحدة من أكبر اسباب فشلك في علاقاتك انك ما تعرف تقول لا ( الفكرة الرئيسية لكتاب لا بطعم الفلامنكو)..

 

رسالة جديدة..

عارفين انك طيب.. لكن ما تعمل كدة تاني..

جاري الكتابة..

50 رسالة اعتذار.. للكوتشِس..

لعز..

لحسام..

لكل واحد رسل لي..

رسالة اعتذار لحبوبتي سعاد في البلد عشان الحكومة ما وصّلت الكهرباء لسة..

رسالة اعتذار لأستاذ العلوم الزعلان مني عشان ما قفّلت المادة وما عارف اني بحب التاريخ..

رسالة اعتذار لجارتنا الكانت بترسلني الدكان وكنت بلعب وانسى اني مرسل..

رسالة اعتذار لـ(علي صبة) الكان عامل لي هاجس في حياتي..

رسالة اعتذار لفلسطين عن عدم قدرتنا على عمل اي شي..

رسالة اعتذار لأوكرانيا عن العدوان الروسي على اراضيها..

رسالة اعتذار ليكم عن النيزك الحيجي يخمنا كلنا..

يعميني كان اعلق تاني على شي..

رسالة إعتذار.. يدي وجعتني..

انا ماشي خلاص..

اعفو لي يا جماعة..

 

��‍��‍��‍��‍��‍

 

اليوم الثالث في الاسبوع الثالث

 

حبوبة كيف حالك..

حبااااابو الغالي.. حباب عشاي..

ان شاء الله طيبة..

نحمده ونشكره فوق نعم.. تعال حداي يا جنا..

اها.. احكي لي..

التحدي ماشي كيف.. ومهتدي واصحابك كلهم..

الحمد لله.. كلهم طيبين.. لكن اليومين دي في ضغوطات نفسية مالية التحدي.. غير المهام الكتيرة..

كيفن ما تكون في ضغوطات وقت لجنة التمكين والتمام اليومي كل راس ساعة مرسلة رسالة زي ناس المطافي.. داك اليوم لما شفت رسالتهم الكلها نيران دي ركبي خدرت.. ماعارفة الناس ديل مستمحلين كيف.. زكرتني أيام المعتمد القديم.. كان لما يجي من البندر.. يجيب عربات البوليس الما بتسكت ديك.. وكل شوية تصفر كانت تطرش اضاننا.. والجهلة كلهم يبكوا من الخوف.. الحمد لله المعتمد رحل مننا وريحنا.. ان شاء غيروا ليكم المدير الكان بيخلعكم بالرسائل ديك..

عز عمل تعديلات وهسي جاب لينا كوتش من كوكب زمرد.. صوتها براهو ينسيك الهم.. رسائل التنبيه كلها ورود وكلام ايجابي..  وعندها رسالتين يومياً في الصباح تعدل المزاج  زي جبنة خالتو أمنية..

كان كدي تاني ما بجيكم شي..

لكن الضغوطات وصلت الكوتشات برضو.. قبل يومين في كوتش رقيقة سألت متين الواحد بيمشي للطبيب النفسي..؟؟

وبعدو كوتش رقيقة تانية سألت لو دايرة تغير الحالة النفسية البتمر بيها تحضر شنو..

وتاني في واحدة الرقة قاتلاها تب قالت انو الضغوطات وصلتها مرحلة انها تقطع علاقتها بالسوشيال ميديا.. الضغوطات دي بتجي من وين؟؟

نان البيعملو فيهن عز دة ما ضغوطات نفسية.. كل يومين اسبيس في الشي الاسمو توتر داك..

تويتر يا حبوبة..

على زمن جدك الحسين كان ديوان العمدة لامّي الحلة جت.. وما بيمرقوا الا بعدما يشبعوا تب.. علّ عز بيمسكهم بالساعات في التوتر دة وموية ساي ما بجيبها ليهم.. المرة الجاية جيبهم على ديوان جدك الحسين.. وانا بكلم البنوت يطبخنلهم.. واكان سارة جات جيبها التقعد حداي هنا.. سارة دي اقدملها باقي عمري جت يا ولدي..

ربنا يطول في عمرك يا حبوبة..

هسي يا حبوبة.. الواحد لما يمر بضغوطات نفسية.. بيطلع منها بالساهل ولا بيفقد شي من شخصيتو المرحة والفكاهية..؟؟

ان بقى عاقل وعرف يتصرف ما بيحصلو شي.. وان اتمسك بالزعل بجيلو ضغط في آخر أيامو وبلحقو أمات طه.. في جنا اسمو زحزحة قال..

((الوجعة باردة على الببوح

وبتسد رويحة البكتمها..

والروح بتمرق ما بتموت

والجتة بتقيم ماتما))..

يعني البيخت في قلبو بيمرض.. والبيفضفض للناس ما بيحصلو شي.. فقول للكوتشات ما تكتمن في قلبكن.. وانت ابقالهن سند زي جدك الحسين.. عارفاك مطرطش وعقل ما عندك لكن حاول اتكلم معاهن..

انتوا يا حبوبة زمان ما في انترنت ومسلسلات متوفرة في أي وقت لما كنتوا بتمروا بضغوطات بتعملوا شنو؟؟

ونان راكوبة حبوبتك ام الحسين قاعدة لشنو.. كل يومين كانت بتعمللنا الجبنة والشعيرية.. داك اليوم يتلمن عليها بنوت الفريق ويغسلهن الملابس جت ويكونها ويطبخن غداهن.. وقت ذاتو عشان يلقن فيهو ضغوطات مافي.. علّ بري بري من جيلكم دة.. جيلكم دة فاضي ساي وما عندكم شيتاً تعملوهو غير كتابة الكلام السلبي.. والزعل الكتير..

انتو ياحبوبة الزعل دة بتكون اسبابو شنو..؟؟

ماني عارفة.. لكن زمان البيزعل كل الناس بيجوا عليهو ويشوفوهو.. اكان مفلس بيدوهو قروش واكان مديون بيحلوا ليهو ديونو.. واكان داير يعرس بيعرسوا ليهو.. لكن جيلكم دة كعب تب.. ما معروف بيزعل من شنو..

انتِ يا حبوبة زعلانة من حبوبتي بت جاه الرسول لشنو..؟؟

الله لا عادها.. استغفر الله.. يكتب لها الرحمة..

هي حية لسة يا حبوبة.. الحصل شنو بيناتكم..؟؟

ذكرتني الما بتتذكر يا جناي.. داك اليوم كانت في بيت حبوبتك أم الحسين مع البنوت.. وقلت ليها ما تعلي صوتك عشان الوليدات ما يسمعوك.. فت زعلة لا يوم الليلة لا سلام لا كلام..

ما رجعتي ليها تاني ولا رسلتي واحدة تعرف زعلها دة سببو شنو؟؟

رسلتلا خالتك بتول وبنات عمك سعاد وكل يومين اعزمها على بيتي ما بتجي.. تاني قنعت منها.. علّ يا ولدي.. بقول لك نصيحة.. ((البيزعل منك من غير سبب ما تبراهو تاني))..

نصيحة غالية تب..

وصيتي ليك.. قول لعز.. الشي البتسوي فيهو دة كبير شديد عليك براك.. وربنا يجزاك فيهو خير.. علّ خِف على البنوت ديل.. ودخل معاهن وليدات في شغلتكم دي اليساعدوكم..  وقولو الدراع الاخضر بيشتغل احسن من الدراع الأملس..

كيف يعني..؟؟

يعني الوليدات بيشتغلوا اكتر من البنوت.. والوليدات ما بيمروا بضغوطات نفسية كتيرة زي البنوت.. فخليهم يساعدوك شوية..

وقول للبنية الجديدة حبوبتي قالت لك يسلم قلمك و اسلوبك السمح.. ولو ما قلبي وهبتو لسارة.. اكان بوهبو ليك.. واعزمها على البلد بعدما التحدي ينتهي..

بكلمها ليك يا حبوبة..

يلة.. ودعتك الله..

سلم لي على سرّوية وقول ليها..

طال الغياب..

وهواك غلاب..

عشمان في ضي عينيك..

واكان جات.. هنا ندراً علي اضبحلها سخيلتي الواحدة دي.. واشبعها مرارة وكبدة..

ودعتك الله يا جناي.. شحدت ربي يبعد منك الضغوطات النفسية والمشغوليات الكتيرة.. ويخليك لأبوك وأمك وأهلك جت..

وتبقالنا ضي زي عز وتحل مشاكل الناس كلهم..

 

✍ ✍ ✍ ✍ ✍

 

اليوم الرابع في الاسبوع الثالث

 

يومين وانا قاعد لي في قروب فيهو 240 مشترك..

البيعلقوا 2 بس..

وتحس بيهم بيعلقوا من طرف اصبعهم.. التعليق زي عدمه لا بيقدم لا بيأخر.. تعليق معسم زي لعيبة الصومال في نهائي امم افريقيا..

قالوا الضيف بيجي 3 ايام راحة وبعد داك بيعاملوهو زي الباقين..

لكن المحل الانا قاعد فيهو دة لهسي ما فهمت هو شنو..

منفى ولا سجن ولا اسلوب من اساليب العقاب الجديدة..

الناس ديل ضيوف شرف ولا متحديين..؟

هسي اقبّل وين..؟؟

خايف اسألهم يطلعوا رعاة التحدي وافوت فرصة الجائزة..

وخايف اقعد معاهم يطلع دة البانك زون وانسى اتمم القى نفسي برة التحدي..

انا لو قعدت هنا حيجيني اكتئاب..

ولو رجعت البلاتينيوم 1 حاطرشق من كترة الرسائل..

طيب ارجع ولا اقعد؟؟

اقعد ولا ارجع؟؟

الراس حيطرشق خلاص..

ما باقي الا صلاة الاستخارة..

لما جيت اخطب ما صليت استخارة.. اصليها عشان اعرف ارسل لمنو..؟؟

دي ورطة شنو..

يا عز.. انا غيرت رأيي راجع البلاتينيوم تاني.. ناسك ديل صامتين ياخ.. انت مرة راميني في القولد.. ومرة في البلاتينيوم 2 ومرة انذار بالطرد.. انا مزعلك في شي..

الووو..

ولا بيرد..

عنده رد واحد في اليوم.. فرصة واحدة بس..

فكرة انك تعمل شات معاهو دي ما موجودة عندو..

لو فرصتك ما استغليتها صح الا تنتظر اليوم التاني.. عامل زي صرافات الخرطوم زمان.. تصرف 2000 في اليوم.. لو قروشك في البنك وعندك قروش ايجار بيت حتدفعها الا تصرف قبل الشهر بشهر.. قروش شهر 8 تبدأ تصرفها من يوم واحد تمنية.. كل يوم 2000 لغاية ما مرتبك يخلص.. وفي النهاية تلقى انك كملتها مواصلات.. يلة دة حال التعامل مع عز في اليومين دي..

 

هسي انا اقبّل وين..

ذكرى الجاسو..

لا لا..

د. ذكرى ساي..

دي بتكون عندها علاقات واسعة..

ذكرى.. الدكتورة..

الباش مهندسة..

والطبيبة النفسية..

والأستاذة..

الأم الفاضلة والبنت العظيمة والأخت المافي زيها.. محور الكون كلو في اللحظة دي.. اي صفة فيها تلجة لازم تقولها..

سؤال كدة بطرف الورقة..

المحل الانا قاعد فيهو تبع وين..؟؟

ورئيسو منو..؟؟

وبيعملوا فيهو شنو..؟؟

ولو عقاب حينتهي متين؟؟

ولو انقلاب حتعدموني متين؟؟

مافي رد..

كأنك بترسل لواحد من الهنود كلام باللغة التركية..

اها.. اشوف منو تاني..

بسسسس..

زولة الفزعة..

رئيس لجنة ازالة التمكين والتمام اليومي..

اختااااااه..

((اتيتك منكسراً))..

باش مهندسة..

أستاذتنا المبجلة..

ممكن طلب..

زهجت من الكآبة والرتابة والصمت المخيم على البلاتينيوم 2..

يومين مافي واحد فيهم رسل حاجة..

ولو انا رسلت مافي واحد بيعلق..

الناس الأنا في نصهم ديل متحديين ولا ضيوف شرف..؟؟

داير ارجع البلاتينيوم 1 لكن داير اتأكد من شي أول..

لو انضغطت تاني ممكن ارجع هنا..

ممكن اعمل سفريات هنا ولا خلاص؟؟

تقرأ رسالتك ولا بتشتغل بيك..

الووو.. انتِ معانا؟؟

سفهان شديد..

بالله تقول بيناتنا قضية طلاق ولا نفقة..

في واحدة بيقولوا اسمها معاهم في التقرير اليومي..

رؤى..

رؤى ولا مي؟؟

عز ذاتو ما عارف اسمها وانت داير تتشالق..

الخوف تمشي تكشح ليها ثلج اسبوعين وتقول ليها رؤى وتطلع مي.. والبلوك هنا اول خيار..

واحتمال انها تقرأ رسالتك وتطلع زولة كويسة وترد وممكن تساعدك..

هي اسمها منو اصلا..

اتأكد كيف لكن..؟؟

رجعنا تاااني لتوتر المرة الحامل..

الحل يا جماعة..؟؟

الأصنام المعاي..؟؟

ما بيردوا..

والكوتشِس..؟؟

سافهني سفه مدراء الشركات للعمال..

وعز مشغول في اسبيسات تويتر..

ولجنة ازالة التمكين والتمام اليومي رافعين علي قضية ازالة تمكين مع وقف التنفيذ..

بقت علي قصة حشوة التلج..

زمان واحد جاء من قرية ما فيها كهرباء.. ما بشوفوا الثلج الا في رمضان.. والعيش عندهم بيجي بعربات الخضار كل اسبوعين.. الظروف سفّرتو الخرطوم.. وأول ما وصل لاقى واحد من اولاد اهلو الساكنين الخرطوم.. ود الخرطوم على شلاقتو سأل الجنا.. ارح الفطور والجبنة..

لا لا ما داير..

كيف يعني ما داير..

ما داير شي.. لكن لو داير تكرمني.. احشي لي عيشة بثلجة..

 

يلا دة حالي حالياً.. ما داير شي منكم.. لكن لو ممكن تجمعوني مع ناسي في البلاتينيوم 1 من غير ضغوطات زي زمان..

مافي رد..

عدم الرد دة محرج اكتر من الرد السلبي..

زي ما قال هناي داك:

((افضل وسيلة للرفض هي عدم الرد))..

 

ديل كلهم انا خارب علاقتي معاهم؟؟

حال السواد..

قالوا الماعندو اخو الحياة حتفرمو..

السنجك.. الحق أخوك..

داير ارجع البلاتينيوم لكن مافي واحد برد علي..

الناس ديل كلهم ما ردوا عليك..؟؟

للأسف..

طيب..  انا بديك الاخبار المهمة في البلاتينيوم كل يوم.. لغاية ما ترجع..

هسي.. اخر الاخبار عندكم..؟

صدقة قالت ظهرها انتنى من الشغل والتاسكات الكتيرة..

وهبة وزنها نقص النص من الجري وراء كوتش شنان..

وام غيث من تعب مشاوير د. جو نست تتمم وهسي سجنوها في القولد..

وريمة من الضغوطات طلعت من عز تيم..

واسرار ولا سارة ديك مخلوعة لهسي من أجواء القولد وما قادرة تركز في شي..

هنو.. نست هي جاية عز تيم لشنو..

ومحمد عمر وسهيل اتشاكلوا أمس بسبب تاسك..

والزهراء لهسي زعلانة عشان ما رسلت ليها قريشات الحلو مر..

عديلة تب.. سلم عليهم.. وقول ليهم في محاولات لاني اطلع من هنا قريب.. ولو ما جيت بيكونوا اعدموني..

ودعتك الله..

 

✍ ✍ ✍

 

اليوم الأخير في الاسبوع الثالث

 

رسالة من كوتش سارة..

Guys...

Good evening...

Are you ready today...

We have a ...

 

اها.. رجعنا تاااني..

الواحد كان مرتاااح ومعديها رسائل كوتش فاطمة البترد الروح.. يرجع تااني لـ we have.. ترجع تاااني للأسئلة العميقة وكلام الكفار داك..

لو حضرت ح اكون زي الضيف..

ولو ما حضرت ح يشيلوا مني النجمة وانا مكلم ناس الحلة كلهم باني شلت لي نجمة في تحدي الانجليزي.. اقول ليهم شالوها مني عشان ما حضرت.. امي تطردني من البيت عشان الحلاوة الوزعتها لما سمعت الخبر..

والعجب كمان لو عمتي القالت دايرة تبيع النجمة وتجيب لي بدلها هلال عرفت.. الا اشوف لي بيت تاني..

اعمل شنو هسي؟؟

ادخل اسلم عليهم وتاني اقول ليهم الشبكة كعبة.. 

بسم الله..

بدينا..

Are you here..

حسام يرطن..

لدن تشغل مكنة الطباعة..

اريج تقلد اوبرا وينفري..

هبة تغني لليدي غاغا..

احمد انت وين..؟؟

معاكم لكن الشبكة بس..

مكالمة واردة.. 

بعد 5 دقائق..

تم اضافتك..

ترجع تلقاهم بيتكلموا في كلام اول مرة تسمعو..

دقيقة.. الكوتش قلبت على اسئلة السوق المركزي مالها..؟؟

اسئلة عشوائية واجابات عشوائية..

توتا.. احسن مول مشيتيهو وين؟؟

النيل.. احمد المول دة شنو؟؟

اول مرة اسمع بيهو.. نحن بنعرف ديوان العمدة وسوق الثلاثاء وحواشة جدي الحسين.. باقي الحاجات دي ما سمعت بيها..

بيكون بيت صاحبتها ياخ..

توتا.. مشيت مع بابا مول الواحة وجبنا هوت شيكلت..

اللليلة.. البنت دي عندها مقص صح.. قالت كلمة زي الكلمات البتقلب البطن..

كوتش سارة.. احمد هوت شكلت يعني جبنة شوكلاتة..

الجبنة الواحدة دي؟؟ بقوا يعملوها بالشوكولاتة؟؟

ماني عافيلك يا حبوبة.. البنوت بقن يعملن جبنة بالشوكولاتة وانتِ تقولي لي الشوكلاتة بتوقع سنيناتك.. اها سنيناتي وقعت وانا لسة ما ضقت اي شوكلاتة..

 

هبة.. احسن مشوار مشيتيهو وين ومع منو؟؟

مشيت مع بابا السينما..

انا.. حسام.. البنت دي ابوها كوز؟؟

ليه..

بتصرف قروشو في الفارغة واللغاويث..

 

كوتش سارة ممكن نساعدك؟؟

اتفضل..

اعملي ليهم حاجة زي truth or dare..

اسألي كل الناس عن حاجة معينة ولو الإجابة كانت ((ما عارف)) او ما جاوب يغادر.. والبيكون اخر واحد هو الحيفوز بالنجمة..

موافقين يا جماعة..؟؟

موافقين..

 

احييي من الديمقراطية.. لو كل الناس زيك انتِ وعز كانت البلد وصلت السماء..

ح نعمل ليكم اسئلة في الرياضة والطبيخ.. بكدة الشباب يستفيدوا.. وانتوا تستفيدوا..

من متين البنات عندهم علاقة بالرياضة؟.. بنات عمي كل الحركة البيعملنها هي الجري من المطبخ للمطبخ.. البنات هنا من كوكب زحل؟؟

 

بدينا..

لدن.. نوعية الطبخات البتعرفيها؟؟

دة سؤال شنو يا كوتش..؟؟

بطبخ اندومي..

يحردن امات شلاخ الليلة اكان سمعت بيها.. اندومي دي شنو؟ اصلا بنات الشهادة العربية ديل لما يتزنقن بيجيبن كلام كله انجليزي عشان ما تفهمهن..

ما شاء الله والله.. دي طبخة عالمية صح..

حسام.. عالمية شنو يا احمد.. دي الأكلة البياكلوها الشفع 24 ساعة..

كيس فيهو شعيرية ناشفة.. ما بيطبخوها ذاتو من الكيس للمعدة..

دقيقة دقيقة.. لدن الكلام دة صح؟؟

اي..

بتطبخي ياتو طبخة؟؟

ما بعرف..

لدن غادرت..

 

زينب.. اكتر 4 رياضات مشهورة على مستوى العالم..؟؟

كرة القدم طبعا..

وكرة السلة..

والتنس..

والمصارعة الحرة..

 

طيب.. اريج.. اللاعب المفضل عندك؟؟

انا بشوفهم يوم يستلموا الكاس بس..

 

فاطمة.. ميسي بيلعب وين؟؟

وجععع.. لو جاوبت على السؤال دة انا برسل ليها تهنئة تخليها سعيدة 3 شهور..؟؟

برشلونة..

 

احمد.. فريقك المفضل..

علاقتي بالكورة زي علاقة محمد عز بالبرمجة.. لكن بشجع الكورة النضيفة..

قصدك الدوري الانجليزي..

اي ياهو..

يخربني كان بعرف شي فيهو..

 

أمنية.. افضل لاعب في ريفل بول منو؟؟

محمد صلاح..

حسام.. البنات ديل ما شاء الله ثقافتهن في الكورة بقت احسن مننا..

واحسن هدف ليهو..

لما لعب ضد روما..

الهبوب الـ.. معلوماتك دي محمد صلاح ذاتو ما عارفها عن نفسه..

 

حسام.. فريقك المفضل..

المان يونايتد..

ولاعبك المفضل.. بيكهام..

دقيقة بيكهام دة خلى الفريق دة ليهو 13 سنة.. حسام دة لقط الاسم من وين؟؟

 

هبة..

افضل لاعب افريقي في الدوري الانجليزي..

هبة غادرت..

 

أمنية..

رياض محرز بيلعب وين؟؟

اممم.. 4 دقائق..

تم ازالة أمنية..

 

احمد.. افضل لاعب في دوري الأبطال..

الجنا داك..

نعم؟؟

الجنا البيطير زي كابتن ماجد..؟؟

دة وين يا احمد..؟؟

البيلعب كل سنة في محل.. زي طيور النورس.. مرة في البرتغال مرة في انجلترا ومرة اسبانيا ومرة إيطاليا وهسي رجعوهو انجلترا..

قصدك كرستيانو..

اي.. اياهو بس..

بتشجعو ياتو فريق منهم؟؟

وين ما مشى انا وراهو..

حسام.. لو مشى الخوازيق بتمشي وراهو..؟؟

والله لو خور ابو عنجة وراهو.. لو جابوهو الأمل عطبرة تلقاني شايل التشيرت حقه واشجع..

التشيرت دي جات براها..

 

هالة.. لاعب افريقي شال الكورة الذهبية في دوري أبطال اوروبا..

هالة.. مو صلاح ومرات ساديو ماني..

الكورة الذهبية الشالها منو آخر مرة..؟؟

هالة.. ما عارفة لكن..

تم ازالة هالة..

 

مهتدي؟؟

مدرب فريق السد القطري.. انا زي أحمد ماعارف شي عن الكورة لكن مابعرف اتزاوغ زيو..

تم ازالة مهتدي..

ما كدة ياعمك.. الشغلة بسياسة ياخ.. ابدا ليهم بانك كنت بتلعب وكانت عندكم قناة الجزيرة الرياضية وبعد داك كسرت الشاشة عشان البيت اتملا بالعطالة ووقفت الكورة..

 

كوتش سارة.. شهد كويس انك جيتي..

شهد.. يادوب الوليدات ناموا..

سؤالك.. الاسهل تربية الأولاد ولا البنات؟؟

سؤال يطلع من العدو.. لو قالت الاسهل تربية الأولاد.. بكرة م ح يعمل ليها الجبنة.. ولو قالت البنات أسهل.. عارفة اني ح اكتب عنها يومية تندمها على كلمتها..

طبعا.. يعني.. وفقاً للدراسات..

ايواااا.. سواقة الكيزان زمان.. حينما وعندما وبئسما وان ذلك ثم لو..

لكن..

إجابتك وصلت خلاص.. محاولة بائسة للزوغان..

تم ازالة شهد..

 

باقي احمد وحسام وزينب واريج..

اريج.. اسم 3 فرق قطرية..

القريطات..

السد..

والتالث داك الأهلي ولا شنو ما عارفة..

تم ازالة اريج..؟؟

ليه؟؟

قالت ما عارفة.. والقريطات دي ذاتو ما سمعنا بيهو الا هنا..

قلت ليكم ما تبدوا بما عارف يا جماعة.. شغلوا مكنة الطباعة ديك..

يا حليلك يا اريج..

فرقونا تاني..

 

حسام..

اسم ماركة مكياج عالمية..

تقريباً.. مس.. حاجة كدة..

زينب.. مس بيوتي..

احمد.. مس روز..

حسام غادر.. يا الله على الروح الرياضية..

 

باقي احمد وزينب..

كل واحد منكم يسأل التاني..

 

زينب.. افضل لاعب افريقي في فريق  ريال مدريد..

ما بيلعبوا معاهم افارقة..

 

احمد.. طريقة تحضير طبخة لأسرة كاملة من 3 خطوات..

 

نقطع البصل ونحمرها 10 دقائق..

نضيف الموية والخضار الحنعمل منو الطبخة..

نخفض النار وننتظر نص ساعة او اقل حسب الطبخة..

 

زينب.. ماركة مكياج عالمية خاصة بالـ eye liner..

هدى بيوتي..

 

احمد.. فريق ما شال اي كاس افريقيا رغم انو بيشيل كاس البلد الهو فيها..

الهلال؟؟

 

يا حليلنا نحن الاتغشينا في بنوت عمنا.. البنت ما عارفة غير عواسة الكسرة وغسيل الملابس انا بستسلم تب.. تستاهلي الجائزة والله.. وقت عارفة ديل كلهم..

زينب.. لا لا انت تستاهلها..

لا لا انتِ..

بعد دة نشوف راي الكوتش بس..

 

✍ ✍ ✍

 

ملخص الاسبوع الثالث

 

·        مسرح التحدي يتعرض لاختراق من جلابة البلاتينيوم 2 والسنجك يقبل عرض الرعاية الذي تم التقدم به..

·        كوتش رؤى عمر والمعروفة بلؤلؤ التحدي تغرد.. ادعو لفوفا بالنجاح وسهيل يعلق.. مع انها ما تستاهل.. لكن عشانك ندعو لابليس ذاتو..

·        شهد أم عمرو و أ. أسماء أم احمد يصبحن أشهر أمهات عز تيم خلال الاسبوع الاخير..

·        النيل.. الفائز بنجم القصة القصيرة في الاسبوع السابق يغرد.. عز تيم دة عالم تاني..

·        في سابقة من نوعها.. الكاتبة الامل تهدي منافسها الشرس احمد حنتوب قصيدة وفاء وشكر..

·        لعبة Truth or Dare  تدخل عز تيم وكوتش سارة تغرد.. جايين عليكم يا ناس لعبة الحبار..

·        اختفاء السناري يفتح الباب للتساؤلات عن مصير متحديات فئة اللغة الانجليزية ومهتدي يعلق.. شبكتو كعبة يا جماعة..

·        كوتش ريما ذات الشعبية الأكثر في التحدي تغادر التحدي بدون معرفة الأسباب..

·        بعد انتهاء امتحاناتنا ونجاحها في 4 منها.. رئيس لجنة ازالة التمكين والتمام اليومي تغرد.. اليوم عفو عام عن كل المسجونين..

·        خطأ كبير يتسبب به احمد في حق حسام كاد ان يتسبب في طرد احمد من التحدي وكوتش سارة تصب الزيت على النار..

·        بلاغات في حق طبيبة العائلة اريج الشيخ تم اتهامها فيها بالتعامل دون الرقي المطلوب مع المتحديين واحداهن تعلق.. مضغوطة في بيتهم يا جماعة..

·        احتدام الخلاف بين السنجك والزهراء بسبب تجهيزات شهر رمضان..

·        المتحدية هبة تصاب بوعكة صحية بعد نقصان وزنها 5 كيلو في اسبوع واحد..

·        اختفاء كوتش شنان يتسبب في رجوع نصف متحديي نقصان الوزن لوزنهم قبل بداية التحدي..

·        بعد حصول كل منهما على 3 نجوم في الاسبوعين الاوائل.. احتدام التنافس بين الكاتبة أمل والباش مهندس احمد حنتوب على لقب نجم التحدي وكوتش فاطمة تعلق.. كلكم حبايب قلبي..

·        د. جو  يجد نفسه ((في مهب الريح)) بعد رفض مجموعة OMCT المشاركة في فئة ريادة الأعمال ود. لدن تغرد.. خلي النرجسية تنفعك..

·        كوتش فئة اوريك طبك تنشر تقريراً عن حالتها الصحية السيئة بعد خروج جميع مشاركيها من التحدي..

·        بعد نشرها لمسودة القضاء العالي كوتش فئة اعرف حقك تدخل في موجة من الاستياء بعد فتح بلاغات تم اتهامها فيها بنشر اسرار الدولة..

·        بعد 12 مشوار في الاسبوع الثالث مدير winner's team يغرد.. د. جو دة ما بشر.. 24 ساعة مشاوير من محطة لمحطة وما بيرد على اي مكالمة..

·        الريان المظلومة تغرد.. ح تمشي من ربنا وين يا فوفا.. وذكرى تعلق.. انا بتصرف.. وريان ترد.. ما عندكم غير الطلس دة؟؟

·        أم غيث تصاب بحادث سير اثناء محاولتها اللحاق بد. جو ووسيلات تكتب.. البيمشي وراء د. جو ما بيوصل لمحل..

·        كوتش شنان يرسل برقية تهنئة للسنجك الفائز بنجم الاسبوع السابق والسنجك يعلق.. أن تأتي متأخراً خير من ألا تأتي..

·        كوتش سارة تنشر ورقة علمية عن تأثير مشاهدة الرياضة للنساء وتكتب: ((كأنك بتتفرجي في سيمفونية او لوحة و رسمة مهندس إذا ركزتي في الطريقة اللى الكورة بتتحرك بيها))..

·        محمد عز يتبنى مبادرة السنجك للاصلاح بين أحمد وحسام وتسابيح تعلق.. احمد ما قاصد يا جماعة..

·        كوتش زينب تكتب لنجوم فئات الأسبوع السابق.. كلكم من تحدي القراءة.. دة بيأكد انكم أبطال وين ما كنتوا..

·        التنافس يضرب بأوصاله بين فئة اللغة الانجليزية وفئة القراءة بعد الموافقة على مقترح قراءة كتاب باللغة الإنجليزية كل سبت والنيل يعلق.. انا ح اكون تبع وين..

·        فئة اطفال عز تسجل تباطؤ في تحصيل نتائج الأطفال الدراسية بعد مغادرة كوتش ريما والطفل يوسف يعلق: وين ليما.. ديبوا لينا ليما..

·        لأول مرة منذ بداية التحدي.. كوتش فاطمة الباهي تتحدث في احدى اسبيسات عز تيم واحدهم يكتب.. حارمانا من الصوت الجميل دة ليه؟؟

·        تغيير جذري في نموذج التذكير بالتمام اليومي بعد استلام كوتش فاطمة للتنبيهات وصاحبة الاسمين سارة وأسرار تعلق.. جابوك بعدما فوفا قطعت قلبنا بانذار المطافي..

·        كوتش اللغة الاسبانية خالد بيشة يغرد.. عاملين رحلة لمدريد قريب وايناس تعلق.. النبي فوقك سوقني معاك..

·        اصابة كوتش اللغة الصينية بفيروس متحور واحدهم يعلق.. اقعد باري لي لغة الكدايس لغاية ما تبقى زيهم..

·        مجموعة المال والأعمال تسجل ركود في حضور الاجتماعات وذلك بسبب انشغال اعضائها باتمام مشاوير الكوتش عوضا عنه..

·        بعد عرض اسبيس قصص ملهمة.. محمد عز يتوج بلقب ((الملهم بلا قصة))..

·        أسرة عز تيم تحتفل بانتهاء الخلاف بين احمد وحسام والسنجك يعلق: اخواني الما برضى فيهم..

·        كوتش الوعي الذاتي تنشر ورقة علمية عن تأثير كتم المشاعر السلبية وتكتب.. واحدة من اسباب الأمراض النفسية انكم تكتموا في قلوبكم.. فضفضوا يا جماعة..

·        ترشيح محمد عز وسيطاً للأزمة بين روسيا و اوكرانيا وعز يرفض التدخل..

·        المتحدية صدفة تغرد.. انا اتعلقت بيكم.. عليكم الله ما توقفوا التحدي..

·        احمد حنتوب أبوحريرة يحصد نجمة جديدة في تحدي عز بعد فوزه بنجم فئة اللغة الانجليزية في الاسبوع الثالث ويعلق.. التلفون لو اقل من Iphone 13 ما بقبلو..

·        المتحدية عسجد تكتب.. حميدتي لما مشى روسيا مالقى واحد يستقبلو.. ودة بسبب انو عز تيم مافيهو لغة روسية.. وعز يرد.. الدول المافيها ديمقراطية ما بندرس لغتها..

 

✍ ✍ ✍ ✍

 

اليوم الأول في الاسبوع الرابع

 

تم اضافتك للمجموعة..

دة شنو؟؟

عز طلع قرارات جديدة تاني؟؟

ملخص أمس زعلو فقرر يعاقبني؟؟

عز ذاتو ما موجود هنا؟؟

يارب ما يكونوا ودوني البرونز..

عز.. رجعني..

تاني ما بعمل ملخص..

عز.. وعد رجال ما اجيب اسم كوتش تاني في يومية..

عز.. عليك الله رد..

والله عدم الرد دة احر من الازالة..

امس فرحنا لفوفا عشان كملت امتحاناتها.. فالاضافات دي بتعملوها كيف..

دة انقلاب على فوفا ذاتو..

ذكرى.. لؤلؤ.. كوتشياتنا الرقيقات..

أهل التحدي..

يردن كيف وكيف انا لساني شغال 24 ساعة فيهن..

زماان قالوا ((لسانك حصانك.. لو صنتو صانك ولو خنتو خانك))..

هسي انا حصاني وصلني وراء الشمس..

الناس تمسك عليها لسانها تاني..

مافي واحد بيدعمني في اللحظة دي؟؟

اتوكل واقرأ المعوذات وأواخر سورة البقرة وادخل برجلي اليمين..

السلام عليكم اهل البيت..

بسم الله..

كلهن طرح..

فيكم شنب هنا؟؟

اهل البيت..

دي مجموعة ولا داخلية بنات يا جماعة؟؟

مافي جلابية حايمة هنا يتكلموا معاها؟؟

قروب كلو عبايات..

واريج تقول ليه البنات بيفوزن بكل النجوم..؟؟

كيف ما يفوزن وقت كل قروب فيهو 99 بنت و شاب واحد..؟؟

ما غريبة فاطمة الشهراني شالت 3 نجوم في اسبوع واحد..؟؟

هسي انا لو قعدت هنا بيعتبروني منافس ليهن؟؟

خايف افوز بنجمة يتلمن علي يعدمني العافية..

دقيقة..

سامع صوت شخير..

الله اكبر..

في آدم هنا..

اي والله..

آدم..

حي يرزق كمان..

الحمد لله..

قوم قوم..

خش بالحضن..

انا ما عارف انت بقيت كدة ليه.. لكن وقت قاعد هنا الفترة دي كلها براك بتكون فقدت حنان وأمل والعائلة كلها..

زمان كنت هميم ونشيط وبتشتغل 10 شغلات في اليوم.. مالك بقيت كدة؟؟

بطرف عينو..

ونايم بالطريقة دي.. دة معناتو انت قنعان من التحدي نهائي..

انت سامعني ولا بتكلم براي..

لوح بإيدو..

عديلة تب..

كويس انو في روح آدمية هنا..

بكرة لازم اوديك الفحص الطبي نشوف النوم الكتير دة سببه شنو..

تاني بيلوح..

قنع السواد..

دة فقد الأمل نهااائي..

 

يا كوتش..

انا أول لي يوم هنا..

وما عارف جيت لشنو..

لكن عشان احفظ كرامة آدم وريني مفترض اعمل شنو وانا بتحمل البيحصل..

على الأقل اونس اخوي الكاشف القاعد براهو..

 

طيب يا احمد.. مفترض تنجز لي المهام القديمة أول..

ابشري.. مهام بس.. دي لعبتي.. قولي يا مهام.. باقي اليوم دة اسلمك ليهم.. افووو انا اخوك يا السنجك.. مهام بس.. قولي متطلبات التحدي كلها..

 

اتفقنا.. شوية وارسل ليك يا احمد..

اخوك جاء يا الكاشف.. اخليك براك..

والله اكان نموت سوا..

بعد 5 دقائق..

تم استلام 18 رسالة.. 18 ملف..

دة شنو..؟؟

ديل المهام المفترض تشتغلهم..

18 مهمة؟؟

اي..

نعم يا اختي؟؟ ((بصوت عادل امام)).. ديل انجزهم ولا اقراهم بس؟؟

تشتغلهم كلهم قبل الخميس..

كلهم.. و قبل الخميس..

انتوا فوفا بقت بتحرش الكوتشات علي وانا ما عارف؟؟

18 مهمة اشتغلهم ليك كيف..

وكمان قبل الخميس؟؟ قولي لي ارجع ساي.. عشان كدة اخوي الكاشف قنعااان وظهرو معسم واليوم كلو نائم..

بيكون جاء بهمة عالية ورسلتِ ليهو 12 تاسك خلعتيهو بيهم.. واليوم داك بيكون السوق كعب معاهو ومافي مواصلات.. قنع من التحدي وبقى قاعد في المجموعة زي الضيف..

تاني لو اريج اتكلمت عن اسباب فوز الفراشات بالنجوم بجيب ليها اخوي الكاشف تتأكد..

زمان كانت عنده همة عالية خلاص..

قبل ما يجي هنا كان بيجري 120 كيلو..

مما جاء هنا اتغير وحيلو اتهد.. الفراشات الهنا خلعنو.. والكوتش ما راعت ليهو..

هسي انا اعمل شنو..؟؟

لو ما اشتغلتهم.. سمعة آدم الفي التحدي ح تتبشتن..

ولو بديت اشتغلهم ح اتبشتن انا..

واااااي انا داير أمي..

ما عارف ليه.. لكن دي اللحظة الوحيدة الحسيت فيها اني ما عندي سند..

 

رسالة لفوفا..

ياخ قالوا انك اتخرجتي.. مالك معاي تاني؟؟

ما اتصافينا أمس في الاسبيس؟؟

ما قلت انننا بشتغل شغلنا بدون نزعل غيرنا؟؟

طيب محرشة علي الكوتش ليه؟؟

الوووو..

ولااااا بترد..

اها يا الكوتش.. مافي طريقة اقسمهم على اسبوعين؟؟

مافي طريقة عشان ح تسلم المهام الجاية برضو..

مهام شنو تاني..؟؟

المهام اليومية..

انتوا عندكم مهام يومية برضو؟؟

في فئة مافيها مهام يومية..؟؟

18 مهمة قديمة ومهام يومية؟؟

الحرشك علي دة مكانتو اكبر من فوفا وعز شكلو كدة.. وما بقدر اتكلم عشان ما يزيلوني..

لكن ح اتوكل على الله  اشتغل عاد..

اعمل شنو..

شكلي ح ادخل معسكر عشان الحق قبل الخميس..

اخوك يا السنجك ح يختفي الاسبوع دة..

ابقى عشرة على البلاتينيوم..

وقول ليهم احمد مسجون تاني..

فوفا وقت ما عرفت ترجعني القولد شكتني شكوة كبيرة خلاص..

وهسي رمتني في محل اكعب من القبر..

وقول ليهم ما يزعلوها تاني..

وانا هسي بكتب ليكم في الرسالة دي والتلفون ح يصادروهو مني..

العفو والعافية..

 

����������

 

اليوم التاني في الاسبوع الرابع

 

رسالة مسائية..

تم اضافتك..

بسم الله..

تاااني مجموعة جديدة..

التكتيك دة جديد علي..

الكيزان ما كانوا بيعملوا كدة..

علي قال ليكم ((شوت تو كيل))..

ما تعمل بيهو مروحة كل يوم يا عز..

ولا بيعبرني..

السفهان دة مقبول من سارة..

لكن عز دة سافهني ليه يا جماعة..

بقت عادة خلاص..

ادخل القروب بس..

واسأل..

معاكم منو هنا..؟؟

يا جماعة انا وين؟؟

انت في قروب اللغة الاسبانية..

والجابني هنا شنو؟؟

 

في قذيفة طائرة..

بسم الله.. قذايف شنو في أيام زي دي؟؟

الحرب بين اوكرانيا وروسيا..

الجابها اسبانيا شنو..؟؟

في شنو يا ناس؟؟

 

الناس بدت تتجارى..

قذيفة تاني..

دة شنو؟؟

شكلها الحرب هنا مدورة..

في باب فاتح هنا؟؟

انلحق الباب هناك..

 تووشك.. قفل الباب في وشي..

بالله لقطة انتحار في فلم ((طير انت)) لما الكبير جاء البلد.. الجوة بيتو جوة والبرة بيقتل نفسه خوف من الكبير.. يلة ديل اتضايرو زيو كدة..

 

ايييك هناك في باب جنبو شافع..

الحق..

يا حليلك يا عشاي..

انت الجابك هنا شنو..

الباب مقفول لكن في شباك..

تلب يلا..

اخيراً بقيت تحت حيطة..

 

ديل منو يا ولدي البيرموا قذايف كدة في نص الليل..؟؟

في حرب دايرة بين حزب طوكيو وحزب نيروبي..

احزاب عديل؟؟

والمحل دة كان اسمو سوق الجمعة..

بعد الحرب بقى الصراع هنا.. كل يومين القذايف بتجينا هنا..

 

رؤساء الأحزاب ديل منو؟؟

شيماء وميسون..

دنقر دنقر..

في قذيفة من حزب شيماء..

 

الحرب دي بدت متين؟؟

والسبب شنو؟؟

 

الاتنين كانوا صاحبات ومكرشات على الكوتش.. وكل واحدة مندااحة وبتخطط لمستقبلها معاهو..

في النهاية شيماء اكتشفت انو ميسون شلبت منها الكوتش فاستعانت بحزبها..

لما يتقابلن.. كلامهن كلو على زي كدة..

 

هييي يا الخفيفة زي الريشة..

جيت عليك ولقيتك مافيشة..

 

اقفل اضانك.. في قذيقة جاية من هناك..

 

انا..  يا الدايرة تبقي زينا..

انا.. يا *** يا مبشتنة..

 

لا حول ولا قوة إلا بالله..

سكتوهن سريع يا اخوانا..

فجأة السوق صنّ..

يمين بالله 5 دقائق القروب دة اتضاير كلو..

في شنو؟؟

فتحي جاء..

فتحي منو..؟؟

فتحي دة.. كان بيكرش على شيماء من بدري.. لما الحرب قامت بقت فرصة انو يقرب من شيماء..

لكن ميسون وقعتو ولعبت بيهو عشان تكسر قلب شيماء..

هسي لافي زي مروحة السقف..

يوم مع حزب نيروبي ويوم مع حزب طوكيو..

والبتدفع أكتر بيجيب جيشو ويقيف معاها..

ومرات بيرمي قذايفه في الجهتين لو السوق كعب..

أمس رمى قذيفة ما عارفنها تبع وين..

 

الخاين الرمة..

انا جاي حالف ليك..

شوف ناسك اتلمّ..

 

طيب مافي واحد بينهي الحرب دي؟؟

في طبعاً..

منو..؟؟

الكوتش خالد.. السبهللي..

وليه لسة ساكت؟؟

عشان الحرب دي بتجيب ليهو تعويضات كتيرة بيستفيد منها..

مرات لما يكون مافي خلاف و الدنيا هادئة.. بيعمل فتنة بيناتهم..

بيرسل رسالة لحزب طوكيو بخط ميسون ومرات بيكتب حزب نيروبي بخط شيماء والحرب بتدور تاني..

 

مرة رسل لميسون..

من شيماء.. رئيس حزب طوكيو..

الى ميسون.. الخفيفة..

المعولقة البتشبه الليفة..

الما بتسوى في الحياة تعريفة..

 

أما بعد..

ما يغرك وجود فتحي في صفك.. ((ومن أمن المكر فقد خسر الحرب..)) ونقصي الأكل الكتير عشان الزرافات الزيك شينات بدون وزن زائد.. ولا سلام عليك والبينا موووت وان شاء الله تجيك الجات لحبوبتي انت وخالد الخفيف زي الريشة..

 

ومرة رسل لشيماء..

من ميسون.. رئيس حزب نيروبي..

الى شيماء الرمة القصيرة..

شبيهة الحلة والكفتيرا..

ما يغرك وجود فتحي معاك..

والقصير من يومو ما بشوف ابعد من ضلو..

البسي كعب عالي عشان الزيك ما بيشتاف..

والله يسلمنا منك ومن عولاقك.. والسلام الما يحوم عليك.. ولا على خالد الخفيف زيك..

 

الماشي داك منو؟؟

داك علي.. ما بيتكلم.. رافع ملصقات السلمية كل يوم..  بيتو اتهدم بسبب القذايف وما باقي ليهو واحد من عائلته..

كل معركة بيرفع ليهم ملصقات السلمية.. بيشوفوهو ويوقفوا..

مرات كوتش خالد بيرسل ناسو عشان يمسكوهو في البيت لغاية ما المعركة تنتهي..

اها.. ح تنتهي متين الحرب دي؟؟

في تحركات من اهل سوق الجمعة انهم يتدخلوا.. لكن كوتش خالد بيفتن وكل فترة بيرمي قذايف جديدة..

دقيقة.. شايف الجاي داك..

دة أشرف..

لافي ساي ما من القروب اصلا.. لقى الحرب مدورة ودخل في نصها.. ودة اكعب من كوتش خالد..

دة ضد الناس كلها.. حتى الناس الما عندهم دخل بالحرب بيبشتنهم..

مرة ضد حزب نيروبي..

ومرة ضد حزب طوكيو..

ومرة ضد الكوتش..

ومرة ضد نفسو..

 

دنقر دنقر..

مالك..

تبيان جات..

تبيان دي علاقتها شنو.. وتبع منو؟؟

دي زي فيروسات الصين..

بتحرق الأخضر واليابس..

لو اتكلمت مافي واحد بيقعد في المحل دة..

ايكككك..

قفل اضانك..

 

يتبع..

 

✍ ✍ ✍ ✍

 

اليوم الثالث في الاسبوع الرابع

 

جزء 2..

 

دنقر دنقر..

مالك..؟؟

تبيان جات..

تبيان دي علاقتها بالحرب شنو؟؟

وهي تبع منو؟؟

دي زي فيروسات الصين..

بتحرق الأخضر واليابس..

لو اتكلمت مافي واحد بيقعد في المحل دة ليها..

كانت مديرة المحلية في سوق الجمعة هنا..

ومع القذائف اليومية فقدت مكانتها وهيبتها..

بقت ماشية بمبدأ علي وعلى أعدائي..

بترمي قذائف من طرف..

وقذائفها ما بتتسمع.. الا تقفل اضانك عشان ما تبقى أطرش..

ولما تلقى مافي واحد معبرها بتسوق موكبها وترجع..

مرة قالت للكوتش..

 

وين ما قلبوك بتتقلب..

وان شلبك قرد بتتشلب..

واااي منك يا نافع..

يا العايش بدون قلب..

 

بالعربي طبعاً لأنها ما بتفهم اسباني..

والكوتش ما قدر يرد عشان عارفها حقيقة..

 

بعد ساعتين..

((تيكيرو.. تيكيرو))..

منو البيكورك دة؟؟

بيكون محجوب..؟؟

محجوب منو؟؟

دة بيجي كل يوم يقول ليهم ((تيكيرو تيكيرو..)) بيدعم السلام والتفاوض وممشيها بالحب..

جاتو فليتة من رفع القذايف كل يوم وفي 4 قذايف جلت منو..

مجنون من زمااان ولا الحالة دي جاتو قريب؟؟

لا لا.. كان اعقل واحد هنا.. مرة قال كلمة بالغلط.. رموهو بالقذايف الموجودة في البلد كلها.. جبهتو طارت وعقلو طار.. بقى كل يومين يجي يقول ليهم تكيرو تكيرو ويرجع..

وشيماء كل ما تشوفو تتذكر لما كانت بتقضي الليالي ونسة مع كوتش خالد ويقول ليها تكيرو دي حقت المبتدئين.. انتِ

 mi carazón late

يعني نبض قلبي..

الخائن سبب البلاوي كان بيقول ليها نبض قلبي وهو قلبو زي فنادق الصين لامي فيهو الحلة كلها..

وكل ما شيماء تتذكر الكلمة دي بتدور الحرب تاني..

 

ومافي عمدة في المدينة البائسة دي يحل المشكلة؟؟

وفي واحدة اسمها اوبا.. بدت تحل المشكلة وكل يوم بتجي تشيل بقايا القذايف.. وتكلمهم عن فضائل الأخلاق وتاريخ اسبانيا والاندلس.. وهسي ظهرها معسم من رفع القذائف وما قادرة تتحرك..

في واحدة برضو بيقولوا ليها السيناتور وجن..

كانت زمان مديرة المحلية وبتساعد الناس وكلهم بيحبوها وكلمتها مسموعة.. ولما تطلب شي كلهم بيتكسروا ليها.. حتى شيماء طالبة قربها.. وكل شوية مرسلة ليها ورود وهدايا..

والكوتش باكي فيها لكنها ما معبراهو.. عارفاهو بتاع ملعبة مازول معيشة.. مسمياهو الكوتش السبهللي سبب المصايب..

مرات هي بتبدأ التفاوض بيناتهم.. وكل فترة بيجي واحد من ناس الكوتش يخرب عليهم..

وفي ريم برضو..

دي انتيمة شيماء القديمة..

اكتشفت انها بتشيل الأخبار من شيماء وتوصلها لميسون..

وهسي ممنوعة انها تتكلم..

 

بعد 5 ساعات من القذف..

صوت موسيقى عالي..

في شنو؟؟

الليلة الجمعة.. يوم ديمقراطية بيعلنوا فيهو السلام المؤقت..

وكل الناس بتحتفل مع بعض..

حتى شيماء وميسون بيشربن سوا..

والكوتش خالد وفتحي بيتونسوا..

وتبيان و وجن بيطلعن قرارات جديدة عشان السوق يبقى احسن..

 

دة قروب شنو البيتحاربوا فيهو 6 ايام واليوم السابع ينزلوا يتونسوا ويحتفلوا مع بعض..

 

لسة ما شفت شي.. بعد شوية ح تبدأ النقاشات..

نقاشات شنو..؟؟

كل واحد بيرمي قذائف يوصف بيها حالو.. باللغة الاسبانية..

 

اسمع شيماء بتتكلم مع الكوتش..

اصيح والسيف مزروع بخاصرتي..

والغدر حطم أمالي العريضاتِ..

 

الكوتش ما شغال بيها وبيتكلم مع السيناتور وجن..

خانتك عيناكِ في زيف وفي كذبٍ..

أم غركِ البهرج الخداع مولاتي..

 

ميسون ترسل لفتحي..

ألا شلت يداك إذا..

آثرت قتلي واستعذبتَ أناتي..

 

انتوا أذان الصبح أذن عندكم ولا لسة؟؟

صبح شنو.. دي دولة علمانية..

مافي صلاة هنا وقرآن ودين.. ولو قريت قرآن بيقولوا ليك فيك مس من الشيطان..

لا حول ولا قوة إلا بالله..

سمعت بأرض السافلين..؟؟

اي..

يلا احمد خالد توفيق كان قاصد المجموعة دي..

 

طيب في مخرج هنا.. قبل ما النيزك يجي يخمهم..؟؟

في سرداب زي سرداب أرض زيكولا.. بيفتح بعد نص ساعة.. الناس ديل بيكونوا في نص غفلتهم.. انسحب قبل محجوب يجي..

محجوب منو..؟؟

البيقول ليهم تكيرو تكيرو..

شيماء ح تتذكر الوجع وتقلب الحفلة تاني وح ترمي قذايف تفقع بيها مرارتهم كلهم..

تسلم شديد يا ولدي.. انت تبع منو..؟؟

انا تبع اللغة التركية.. اضافوني بالغلط وبقيت مستمتع بالقذائف دي ومافي واحد عارفني..

عندك معلومة الحرب ح تنتهي متين..؟؟

ممكن تنتهي قريب.. وممكن تستمر.. حسب التنازلات..

شيماء عاطفية.. ممكن تتفاوض لكن حزب نيروبي حالف يجيب تار الشهداء القتلهم حزب طوكيو..

 ومافي حل غير انو الكوتش يضحي بنفسه.. والكوتش دكتاتوري قديم وما بيفرط في رقبته..

عامل زي البرهان.. يحرق البلد كلها ولا يتنازل..

 

باقي كم ساعة عشان السرداب يفتح..؟؟

اتحرك من هسي عشان لو تيكيرو جاء ح تقعد معانا اسبوع تاني..

يلا.. يلا..

Adios ..

يعني شنو؟؟

ودعتك الله..

 

����‍��‍��

✍ ✍ ✍ ✍

 

اليوم الرابع في الاسبوع الرابع

 

الجزء الأخير

 

أحمد.. أحمد..

دي منو البتعرفني..؟؟

خايف التفت القاهو كمين..

وقت فوفا عرفت اني لسة حي والقذايف جلت.. قالت ترسل ناس وراي..

يحلني منك الله يا لجنة ازالة التمكين..

التفت ولا لا..

خايف التفت تجيني قذيفة..

وخايف اكمل جري عشان الحق السرداب تكون دي واحدة محتاجة تساعدها..

افووو..

من متين يا جنا بتخلي البنوت ورانا..

ورطة العدو..

جيتكم راجع يا ولادة الندم..

انتِ منو؟؟ وتبع منو فيهم و الجابك هنا شنو؟؟

رسلني عز.. قال لي خليك وراهو.. وشايفاك ح تطلع.. قلت الحقك..

يا كافي البلاء.. عز دة عامل جواسيس في كل محل.. هسي دي لو جاتها قذيفة.. البيعوض اهلها منو.. قالوا الجواسيس ما عندهم أي سمعة بعدين..

كلمتك يا ذكرى..

اها يا بنتنا.. مفترض اقعد هنا لمتين؟؟

في تفاوض ح يحصل هنا بعدين.. في خطة معمولة عشان يعملوا عقوبات للكوتش..

طيب..

ح نرجع بطريق القذايف تاني؟؟

لا لا.. ح نوديك تتابع التفاوض من غرفة المراقبة..

لا لا.. انا داير ارمي ليهم قذايفهم الجلت مني..

ماشفتي قذايفهم.. مرا فتحي جلاني بي قذيفة كانت ح تقطعني نصين..

خلاص سامحهم.. أجر العفو عن الناس عظيم.. قالوا يوم القيامة بينادي منادي بيقول ((من كان أجره على فليدخل الجنة)).. فاحسن ليك الجنة صح؟؟

عديلة..

فوفا اعفي مني عشان تدخلي الجنة..

اها.. ح نقعد وين لغاية ما الحوار يبدأ؟؟

في بيت السيناريو وجن.. بيتها زي قلبها مفتوح للناس كلها..

عديلة.. لكن انا داير اشوف الحفلة حقتهم..

طيب ح نوديك غرفة المراقبة..

اتفقنا..

 

من داخل الغرفة..

فتحي..

هيي وتاني هي..

يا طويلة زي النخلاية..

وتقيلة زي المخلاية..

لافة من شارع لشارع..

احي منك يا شبه السخلاية..

 

ميسون..

انا..

يا القلبك ما بيحس..

ولسانك ما بيدس..

تمشي من هنا براك..

ولا اقول ليك بس..

 

شيماء لمزن..

يا بتاعة السواطة..

القالوا الفليتة جاتة..

معروفة ما عندك فهم..

يالافة بالاتنين والتلاتة..

 

ردحي السواد..

اريج تعالي اتعلمي..

 

وجن تتدخل..

عيب منكم خلاص..

احترموني انا..

كل الناس ترد ((عشانك يا جميل))..

يلا.. ح نبدأ التفاوض..

ح نقدر حجم الخسائر من كل الأطراف ونعمل تعويض..

شيماء تقاطع.. ((ان شاء الله ما يتهنى بيها نهائي))..

وجن.. كوتش خالد ح يتعاقب طبعا.. عشان مثال سيئ للحب..

كل الأطراف ((طيب كدة موافقين))..

ثانياً.. ممنوع منع بات انو أي تحصل عمليات شلب والبيشلب ح تكون عقوبته النفي من القروب..

مزن ح تغمر..

ولاحظ شيماء بتبتسم كيف..؟؟

ثالثاً.. ممنوع استخدام أي نوع من أنواع القذايف في القروب..

فتحي دة مالو واقف معترض..

وجن.. اقعد يا فتحي..

رابعاً.. ممنوع أي محاولة للتذكير بالماضي الأليم للدولة..

كل الناس تعاين لعلي.. مسكين والله..

خامساً.. بالنسبة لمزن و تبيان وفتحي ح نعمل ليك عفو مؤقت لكن ح تتحرموا من حق الرد على القذايف البتجيكم لمدة اسبوع..

وأخيراً..

ح نعين ليكم محجوب مدير الفترة الانتقالية.. باعتبارو اكثر واحد اتضرر..

أما بالنسبة لأوبا فحنشوف ليها علاج في تركيا..

 

كلنا ح نبني البلد سوا..

والفترة الجاية محتاجين للشباب كلهم..

ح نمسك الشباب ادارة المحليات وسوق الجمعة..

تسقط بس يا برهان..

 

انتهت الجلسة وتم التوقيع بين الطرفين..

الحمد لله..

انا ح اترحل متين؟؟

ح يفتحوا الباب الرئيسي اليوم..

 

البيزعلك يافوفا ان شاء الله لا ينوم ولا يرتاح..

توبة توبة..

بعد شوية تسمع صوت كوتش خالد السبهللي..

انا أعترض.. انا اعترض..

دة مالو؟؟

 

وجن عملت ليهو حبوب في المشروب اليوم وفحط خلاص..

وجن السيناتور.. ح نديكم فرصة أخيرة تطلعوا الفي قلوبكم.. كل واحد في شي في قلبو يقولو..

 

ميسون..

عامان ما رف لي لحن على وتر..

ولا استفاقت على نور سماواتي..

اعتق الحب في قلبي واعصره..

فأرشف الهم في مغبر كاساتي..

 

تبيان..

عانيتُ عانيت لا حزني أبوح به..

ولستِ تدرين شيئاً عن معاناتي..

نفيت واستوطن الأغراب في بلدي..

ودمروا كل أشيائي الحبيباتِ..

 

شيماء لميسون..

أمشي وأضحك يا نيروبي مكابرة..

علي أخبي عن الناس احتضاراتي..

غرست كفك تجتثين أوردتي..

وتسحقين بلا رفق مسراتي..

 

فتحي للسيناتور وجن..

لا الناس تعرف ما امري فتعذرني..

ولا سبيل لديهم في مواساتي..

معذورة أنتِ إن أجهضتِ لي أملي..

ما الذنب ذنبكِ بل كانت حماقاتي..

 

كوتش خالد..

انا اعترض..

انا اعترض..

 

يلا طيب..

طلعوني هسي..

 

يلا.. ح تمشي تركيا..

شنو..؟؟

 

✍ ✍ ✍ ✍ ✍

 

اليوم الخامس في الاسبوع الرابع

 

إشعار صباحي..

يصادف اليوم عيد ميلاد أريج الشيخ.. تمنى لها يوماً سعيداً..

سعادة وأريج.. اصلا الاتنين نفس الحاجة.. ما عارف مارك دة بيفهم كيف..

هسي انا اعمل شنو؟؟

لو رسلت ليها رسالة تهنئة اقل من المتوقعاها.. ح تشيل حالي..

ولو ما رسلت.. ح تشيل حالي برضو..

يعني كدة ح تشيل حالك.. وكدة ح تشيل حالك..

وزي ما قال جلواك.. ((مادام كدة ميت وكدة ميت.. انموت بشجاعة))..

وقت شايلة حالي مهما عملت احسن اني اكتب ليها رسالة عادية..

 

أريج المعولقة..

سنة سعيدة عليك..

تتهنى بيها وتتهنى بيك..

سنة كلها نجاح وتوفيق..

وان شاء الله سنة تشيل تعب السنين القبلها وتبقى دافع للسنين البعدها..

أريج.. طبيبة العائلة والطباخة المافي زيها..

أريج.. زيتونة التحدي والبتشتغل صباح ومساء عشان تظهّر التحدي في ابهى صورة..

أريج.. الرايقة والمجتهدة..

اريج.. رفيقة الفئات والـpartner المشاركاني في كل تاسك..

اريج.. ايقونة الأفكار العظيمة والخبرة المتراكمة في كل شي..

سنة سعيدة عليك وان شاء الله السنة الجاية تكون احسن مما متوقعة..

 

رسالة من اريج..

((معولقه انا يا سيد المعولقين يا احرجوك في قروب عز الأساسي قدام ضيوف الشرف والناس المهمين.. يا المنفى يومين في بلاتنيوم 2..يا الزعلت محمد عز وخليت ضغطو يرتفع وما يقدر يقدم الحلقه.. معولقه انا يا الفازو عليك في التصويت والنجمه طارت عليك.. معولقه انا يا السافهاك  كوتش ساره.. وقاطعه معاك كوتش عفاف.. معولقه انا يا الدقيت بلنتي في القولد وجيت راجع بعد ستين واسطه.. معولقه انا ااااا؟؟؟

احسن اسكت وما اتكلم..

يا خشمي خليتك للجومه ونبذ الحكومه..

احسن امسك لساني لانو الدنيا ليل والليل ستار..

وكمان تقول لي اكون احسن؟؟

مالك علي يا يابا.. شايف علي شنو يا أحمد ابو رقبة طويله..

يا العندو سنين واحد تحت وواحد فوق وساقين رقيقتين زي ساقين الكركي والقدمين مفلطحات وكبار من مشى الحفي..

والضحكه تشبه نهيق الحمار.. وووو.. والوصف يطول..

يلا..))

 

شكيت محنك يا اريج.. دة رد شنو؟؟

انت كاتب لي معولقة ليه..

يعني القصة الطويلة الكتبتها دي كلها ما شفتي فيها غير ((معولقة))؟؟ ذكرتيني قصة كدة.. واحد كتب ((شتموني في ثمانين سطراً ولم تستفزني إلا كلمة يا أعزب))..

هسي يا اريج كاتب ليك 80 كلمة سمحة.. ما شفتِ فيها غير معولقة؟؟

دكتورة لدن.. البنت دي بتأكلوها شنو..؟؟ اتقوا ربنا فيها..

عز.. الزولة دي فحطت خلاص.. شوف ليها مساعد في مواهب التحدي عشان ح تنفجر في واحد مسكين زيي كدة..

اهل البيت.. بنتكم دي خفوا عليها.. شوية وح تخرمج وتجيب ليكم مشاكل.. ادوها يوم إجازة في الإسبوع تكسر الملل الفي حياتها..

ما صدقت طلعت سليم من اللغة الاسبانية ونفدت بجلدي من قذايف فتحي وميسون اجي القى أريج مجهزة لي RBJ..

شكلو كدة فوفا قبل ما تطلع من التحدي حرشت علي المتحدين كلهم..

ان شاء الله تكون أخر قذايف تتوجه علي..

احسن اشوف لي محل مافيهو اي مشاكل تاني..

ومع بوتين القال كاس العالم السنة دي في احتمال انو ما يكون في بن آدم حي عشان يحضرو.. مفترض الواحد يستمتع بحياتو قبل ما طاري النووي يضرب نحاسو.. ونتحول لثاني اكسيد الكربون في حرب الكبار ديل..

 

رسالة للؤلؤ..

لؤلؤ التحدي والداعمة للدمقراطية.. داير اطلع من جو القذايف والردم وازالات منتصف الليل البتعمليها دي.. ممكن تنقلوني محل هادئ شوية..؟؟

طوااالي يا ابو حميد..

ح تمشي تركيا.. كيف معاك؟؟

لا لا؟؟ انا مشتاق لسارة.. طولت منها.. اعملي لينا قروب برانا عشان عاملة لي بلوك من اول اسبوع..

لا لا دي مشاكل عاطفية ما بتدخل فيها.. ناس اللغة التركية عندهم اجواء سمحة هناك.. في فرصة نقل باقي اليوم دة.. ننقلك؟؟

ح الاقي ساركان واراس وهاندا ارتشيل و كرم بورسين؟؟

تلاقي منو يا عشاي؟؟؟ انت ح تمشي تقعد مع د. اسراء وتتعلم الكلام السمح وتجي تعمل ورقة علمية عن اثر الإعتذار على العلاقات..

كلام سمح شنو..؟؟ لغتهم زي صوت الواحد لما يكون عندو تايفود.. كلامهم كلو بغ بغ.. انا ماشي استمتع شوية واغير جو.. وألفلف.. و..

لا لا.. انت ح تمشي مكان محدد..

يعني م ح امشي البارات؟؟

بارات شنو يا فالح.. سفارتنا هناك في حي المسلمين.. ح تسمع خطب عن اثر الكلمة الطيبة و تعمل ورقة علمية عنها وتجي راجع..

واااي الليلة..

ورطة العدو يا شيماء..

الناس بيمشوا تركيا عشان يستمتعوا بالحياة.. وانا امشي اتعلم الاخلاق.. هي بالله في دولة علمانية فيها أخلاق..

عبد الحي تعال راجع..

طيب.. ح امشي متين؟؟

اليوم المساء..

طوااالي كدة؟؟.. ادوني راحة من القذايف دي.. أمس رموني بقذايف وجات اريج كملتهم تاني..

انت مريح الناس عشان ترتاح..؟؟ خليت حسام محبط من كلامك.. بقى لما يسمع صوتو في المكالمات يقفل الخط.. وكوتش خالد كلما يكون داير يسجل محاضرة اول بقى يغير نبرة صوتو بسبب كلامك الأمس.. انت محتاج صيانة لطريقة توصيل المعلومة يا أحمد..

ادوني فرصة اشرح ليهم طيب..

لا لا.. الحق لملم باقي ملابسك.. عشان تلحق..

كيف يعني.. م ح تشتروا لي أي ملابس؟؟

نشتري ليك شنو.. انت قايل دي حكومة البشير؟؟ التذاكر ذاتها ح تتخصم من حسابك الخاص..

كمان..؟؟ ما ماشي...

ما على كيفك... تمشي بس القرار طلع..

انتوا حاسمين في المواضيع دي بس..؟؟

ما دايرين نقاش.. سريع قبل فوفا ترجع وتعمل ليك ازالة بسبب القروبات الكتيرة البتنطط بيناتها كل يوم..

طيب.. جاي عليك يا ارطغرل..

 

✍ ✍ ✍ ✍

 

اليوم الأخير في الاسبوع الرابع

 

سلام عليكم اهل البيت..

جونايدون وجون هايدي ماعارف..

اهل البيت..

صالون الضيوف وين..

بلد ذاتها ما تفهم ليها شي..

غرف النوم وغرف الضيوف كلها واحد..

معاكم شباب اتونس معاهم؟؟

صوت من بعيد.. معانا شاب واحد بس..

طيب.. انتوا بتعملوا شنو هنا.. وليه الأجواء عندكم مافيها مشاكل وقذايف زي الاسبان؟؟

عشان دولة حريات ودمقراطية.. لكن البيرمي قذايف ح يتم اعدامه..

عشان كدة السفارة فيها 4 موظفين بس.. ان شاء الله عندكم جبنة طيب..

اي عندنا..

دقيقة.. انتِ منو والجابك هنا شنو..؟؟

انا عز مقعدني هنا عشان اشوف الناس البيعملوا مشاكل وما بيتمموا ولا بيعملوا تاسكاتهم..

هسي دة فرقوا شنو من تمكين الكيزان.. وقت كل مجموعة فيها عميل من جواسيس عز.. ويقولوا ليك بدعم الديمقراطية..

فوفا تعالي راجعة ساي..

انت احمد الفاكي لسانو..؟؟

تقريبا.. لكن لسان ما بيسكت عن الحق..

حق شنو.. وجاي يد وراء ويد قدام مالك.. ما يكون ناس 9 طويلة قلعوا شنطتك وملابسك؟؟

لا لا.. لؤلؤ قالت لي امشي لي ما بنشتري ليك اي شي..

ومتني كدة مالك؟؟.. وقعت من ولا انزلقت من السماء؟؟

لا لا.. دي من أثار حرب الاسبانيين.. اتصبت في معركتين من المعارك الكانت بين طوكيو ونيروبي..  لؤلؤ قالت لي في رحلة لتركيا وجابوني هنا عشان تعلموني اللغة.. فانا جيت اتعلم لغة الناس ديل وارجع  اتفلهم بيها على بنات حلتنا عشان يعبّرنّي.. وقت مافي واحدة عاجباها كتاباتي.. وبالمرة اشوف علاج لتنية الظهر..

طيب اشرح ليك شوية..

اولا.. هنا ما عندهم لغة تخاطب.. الكلمات هنا ساهلة خلاص تتكلم ببطنك بس..

كيف يعني؟

يعني الاصوات البتطلع ما من اللسان زي باقي اللغات.. الأصوات هنا أصوات ناس دايرين يتشاكلوا لكن خجلانين من بعض بس.. فكل واحد بيقول الكلام البيخطر على بالو.. دي لغتهم كدة..

طيب..  بكرة بجيب لي كلاب اخليهم يتشاكلوا واسجل اصواتهم.. اياها لغتهم صح.. لكن المسؤول هنا منو عشان اشوف علاج لاثار الحرب الطلعت منها.. 

أ. إسراء.. دي المسؤولة هنا.. ممكن تتواصل معاها..

طيب..

 

السلام عليكم يا كوتش..

مي را با..

مي منو؟؟

يعني وعليكم السلام بالتركي..

عليك الله اتكلمي معاي عربي عشان انا يادوووب طلعت من حرب البسوس.. 3 ايام كنت في اللغة الاسبانية لا نمت ولا ارتحت.. واليوم الرابع اريج رمت لي قذايف كسرت فيها مجاديفي لغاية ما عملوا لي جبيرة مستعجلة..

هسي ظهري معسم وداير لي علاج..

طيب.. انت الوادك اسبانيا شنو؟؟

مشيت اتونس معاهم عشان جو الوحدة الموجود في مكتبة غذاء الروح.. ولما حصلت المشكلة بقت علي قصة دحيديحة..

دحيديحة دة منو لكن؟؟؟

دحيديحة دة كان قاعد في بيت جدو..

وجدو كل ما يحصل شي في الحلة يقول لدحيديحة.. اريتني كان ما اتزوجت حبوبتك.. والجنا بيسأل علاقته شنو بالقصة دي ومافي رد..

يلة اياهو حال الشباب الفي اللغة الاسبانية الكنت قاعد معاهم.. بشيلوني ذنب اي شي بيحصل مع اني كنت معاهم وقلبي في محل تاني.. وكل ما يحصل شي يقولوا ابليس قاعد معانا..

كويس انك طلعت منهم.. لكن تاني ما تقابض من طرف عشان ما تبقى عليك قصة سرور..

سرور دة منو؟؟

سرور دة واحد قاعد مع عمو وبيرسلو الدكان كل يوم يجيب ليهو الحاجات الدايرها..

مرة رسلو يجيب طحنية وما لقاها.. جاء راجع لعمو.. قال ليهو ما لقيت طحنية.. عمو زعل وقال ليهو تاني مرة لو مالقيت طحنية جيب جبنة ولو ما لقيت جبنة جيب بسكويت.. ما تجيني فاضي.. سرور ربط الفكرة في راسو..

المرة البعدها عمو رسلو لموس حلاقة.. مشى الدكان مالقى موس.. جاء لجدو يتبسم.. انا ما لقيت موس لكن جبت ليك طحنية..

يلا ما تبقى زي سرور دة..

اعمل شنو يعني..؟؟

ما تمشي ساي من محل لمحل وتتصرف على كيفك.. وخلي انجازاتك هي البتتكلم ما لسانك..

طيب.. ممكن تشوفوا لي دكتور غضروف..

Tamamen..

عليك الله بالعربي..

اياها تمام يا احمد..  بكرة ان شاء الله نوديك الشفخانة نشوف ظهرك معسم ليه.. وبالمرة تشوف المعالم البارزة هنا..

شفخانة دي شنو؟؟

اياها مستشفى الارياف يا احمد..

وانتوا لسة بتسموا المحلات كدة؟؟

ما يكون مكتب الشرطة والسجن اسمو كركون؟؟

اياهو بس..

معناتو لميس تعي لهون لغة تركية جدجد؟؟

لا لا.. ما للدرجة دي..

طيب قبل ما بكرة يجي.. سؤال.. ليه المجموعة هنا فيها شاب واحد بس..

عشان لغتنا دي لغة بنات بصراحة.. ولو جاء واحد من الشباب يقراها ح يكون بينافس على المستحيل.. وبيعوج في لسانو ساي..

ولهسي الشاب المعاكم شال كم نجمة معاكم في الفترة دي؟؟

ما حصل شال نجمة.. اللغة دي دايرة رقة.. وما اظن يشيلها..

يشيلها كيف لكن.. وقت كل جملتين الواحد بيقولهم لازم يستغفر.. وهو المسكين بيدخل المجموعة متوضي..

حال السواد..

لكن انا داير افرق شوية.. عندك رقم هاندا ارتشيل.. داير اقول ليها انتِ احسن من نور..

لا لا..

ما ضروري.. العالم كلو عارف الحاجة دي..

طيب.. رقم عمر الفي مسلسل سنوات الضياع اقول ليهو دور الملك سليمان لايق عليك اكتر..

اول مرة اسمع بالاسم دة.. لكن بنعذرك.. ويا احمد.. نحن هنا بنعلم الناس لغة التخاطب ما لغة تمثيل..

طيب.. ح الاقيهم متين..

تلاقي منو؟؟

ناس ساركان ومهند وجوناي وسونجول..؟؟

يا حليلك يا ولدي.. فحطت خلاص كوتش خالد ما بيلحقك..

ديل ما ح تلاقيهم عشان انت في قروب واتس ما في السفارة السودانية في تركيا..

طيب..

ح نوديك لدكتورة لدن تفحصك..

طوالي.. لكن استعجلوا عشان عندي كلاسات منتظراني وكوتش شنان ليهو يومين جاري وانا داير الحقو..

 

يا دكتورة.. شوفي لينا جبيرة للشاب دة..

انا طبيبة اسنان ما اخصائية عظام..

اشتغلي فيهو بس ان شاء الله تربطي ليهو يدو في لسانو.. اهم شي يرجع لحالتو الطبيعية..

ومالو مدروش كدة وظهرو متني وما قادر يمشي؟؟

دي قذيفة في حرب الاسبانيين الكانت قبل يومين..

طيب.. ادوهو المسكن دة وجيبوهو لي بكرة..

عديلة..

 

 

يتبع..

 

✍ ✍ ✍ ✍ ✍

 

ملخص الاسبوع الرابع

 

·        كوتش خالد يفوز بصاحب اسوأ أغنية في التحدي وحسام في المرتبة الثانية..

·        بعد استلامها شهادة إكمال كورس اللغة الاسبانية في احدى معاهد أمبدة المتحدية شيماء كمال تتلقى عشرات التهنئات..

·        تحدي عز تيم يحتفل بعيد ميلاد أريج الشيخ ود. لدن تهديها كمون وتكتب.. بيسحروك يا زوق يا جميل احسن.. ومن عيون الناس حقو تتحصن..

·        لجنة التمكين والتمام اليومي تحتفل بإكمال فوفا لمسيرتها الجامعية ولؤلؤ تكتب.. انتِ فرحتنا المافي زيها..

·        في بادرة غريبة من نوعها احمد حنتوب يكتب.. رجّعوا لينا (فوفا).. وسهيل يستنكر الإسم.. وسارة تعلق.. الشوق غلاب..

·        الكاتبة أمل تستعد لإطلاق النسخة الأولى من كتابها (الجاي خير) وذلك بعد مراجعته في مكتبة دار الإسكندرية..

·        كوتش اللغة التركية تهنئي المتحدي مصطفى على صبره اللا محدود واستمراره في الفئة حتى الاسبوع الرابع وتقرر منحه زيارة لتركيا ودعاء تزغرد..

·        انباء عن تحسن الوضع الصحي لكوتش فئة اوريك طبك بعد قرار لجنة ازالة التمكين والتمام اليومي بالعفو العام عن جميع المتحديين واعادتهم للبلاتينيوم..

·        ويلات الحرب بين حزبي نيروبي وطوكيو داخل اللغة الاسبانية تتسبب في خروج مواكب في بعض الفئات الأخرى تطالب باعدام كوتش خالد و وجن تتدخل..

·        اختفاء السنجك يفتح تساؤلاً مريباً داخل التحدي وهبة تعلق.. ما تكون الزهراء عملت فيهو شي..

·        محمد عمر الشهير بساري الليل نسبة لرسائلة التي يرسلها والناس نيام.. يغرد.. تعبنا من الجري شوفوا لينا حل.. وصدفة ترد.. ما تجهد نفسك..

·        حسام صاحب الصوت الشجي يغني لوردي (صدفة وأجمل صدفة) ودخول المعجبات في حالة من الاستياء بعد تضارب التعليقات واختلاف وجهات النظر على الاغنية ولحنها..

·        دخول المتنافسين أحمد حنتوب والكاتبة أمل في هدنة وتنازل عن النجوم ليفتحوا لغيرهم فرصة المنافسة لهذا الأسبوع وأمل تغرد.. خليك بحر والناس تعوم..

·        أنباء عن إختفاء السنجك عن اسبيس الجمعة والخلعة تضرب بأوصالها بين متابعي مسرح التحدي..

·        احمد حنتوب يدخل في موجة اكتئاب حادة بسبب إختفاء السنجك وفوفا في اسبوع واحد..

·        انشغال مهتدي خلال الأسبوع السابق يقلل من وتيرة المنافسة داخل اروقة التحدي وفاطمة تغرد: يايما اشتقت ليك.. ياما بكت عيوني..

·        فوفا ويليها ذكرى.. الاختفاء المفاجئ لأعضاء لجنة ازالة التمكين والتمام اليومي يجعل محمد عز في حيرة من أمره..

·        كورسات اون لاين تحتفل من جديد باكمال المتحدية شيماء كورس اون لاين وشيماء تعلق.. ((انا ما تبعكم لكن))..

·        كوتش ياسر شنان يعود لقيادة دفة فئة المشي مجدداً واختفاء السنجك يتسبب في تباطؤ النتائج اليومية داخل الفئة..

·        صاحبة الاسمين سارة و اسرار تغني لعشة الفلاتية واحداهن تعلق.. صوتك عالم تاني.. وشيماء مغنية التحدي الاولى تستنكر..

·        هنيدة ياسين صاحبة بازار التحدي تغرد.. (عروض رمضان ما تفوت عليكم) ومحمد عز أول المستثمرين..

·        اصابة كوتش خالد بيشة بفيروس الاعتراض الدائم وتبيان تعلق.. بشتنوك وانتهوا منك الحاسدين..

·        في سابقة من نوعها.. احمد حنتوب عند تلخيصه لكتاب (نطفة) يغني Bella Ciao وحسام يصطاد في المياه الراكدة..

·        في مقدمتهن وسيلات ومهتدي.. ازدياد ضحايا لجنة ازالة التمكين والتمام اليومي مما يجعل المساءلة القانونية اولى متطلبات الشارع وعز يقرر اعادة تأهيل اعضاء اللجنة..

·        في سابقة من نوعها.. محمد عز يتقدم بعرض توظيف داخل مكتب لجنة ازالة التمكين والتمام اليومي والجمييييع يستنكرون وشهد أم عمرو تعلق.. منو دي.. انا دي.. بري بري بري..

·        السناري يعيد فتح صالون حلاقة التحدي من جديد ويتقدم بعروض خاصة لزملائه في اللغة الانجليزية..

·        في سابقة من نوعها.. فلم when Harry met Sally يدخل اروقة اللغة الانجليزية وأريج تبحث عمن يقدم معها دور Harry وحسام يرفض..

·        د. لدن تعيد نشر اوراقها العلمية عن اسباب الاصابة بالتهاب اللثة وتغرد.. ((ابتعدوا عن الناس العاملين زي البكتريا))..

·        كوتش الوعي الذاتي الذي يظهر كل اسبوعين يقدم محاضرة عن أثر عدم الاهتمام بالنفس وأضرار البقاء في الماضي..

·        روابي الجبير الفائزة بنجمة المشي في اول اسبوع تتعرض لمحاولة سرقة فاشلة من 9 طويلة وانباء عن انتقالها الى القولد بسبب الحادثة السابقة..

·        في السيشن الأخير الذي قدمته.. كوتش سارة تهنئي متحديي فئة اللغة الانجليزية 1 بمحافظتهم على نشاطهم وتختار 3 نجوم في اسبوع واحد.. وكالعادة.. حمدوك يستنكر..

·        احتدام الصراع بين فئتي اللغة الانجليزية وغذاء الروح بعد قراءة متحديي اللغة الانجليزية لسكربت فلمي Tobey Maguire و when Harry met Sally والنيل ومهتدي وفاطمة واحمد حنتوب بين دفتي المنافسة..

·        فئة تدبر القرآن الكريم تهنئ المتحدية أماني باستخدامها طريقة الـ8 puzzles لحفظ بعض الآيات..

 

✍ ✍ ✍ ✍ ✍

 

اليوم الأول في الاسبوع الخامس

 

دكتورة لدن..

صباح الخير..

انت أحمد.. بتاع المشاكل..

انا زول طيب ومسكين والله.. ما عارف الحاصل شنو خلى الناس تغير تعاملها معاي..

طيب.. ظهرك فيهو تنية في السلسلة الفقرية.. انت محتاج عملية غضروف لكن قبلها ح اعمل ليك تحويلة لدكتور ياسر شنان يعمل ليك تمارين للظهر عشان ترجع تمشي زي باقي الناس..

طيب..

ح تقعد معاهو اسبوع تتمرن فيهو وتجي للعملية..

ان شاء الله.. دقيقة.. انتِ دكتورة شنو؟؟

لما جيت داخل شايف في واحدة حامل وشكلها في الشهر الاخير..

وشايف واحدة شكلها ح تعرس قريب ودايرة حبوب زيادة وزن..

وقبل شوية في واحد شكلو واقع من سقالة وكسر سنو زي واحد في كوبر.. انتِ دكتورة شنو بالضبط؟؟

انت ما بتعرف تمسك لسانك عليك يا ولد..؟؟

الواحد ما يسأل يعني؟؟

ما سمعت بحديث العقيدة المشهور؟؟

ياتو حديث؟؟

((من كان يؤمن بالله واليوم الآخر فليقل خيراً او ليصمت))..

فالبتقول فيهو دة خير ولا اولى انك تصمت؟؟

خلاص تاني توبة من الكلام..

انت محتاج نعمل ليك عملية نقفل بيها لسانك 24 ساعة ما تتكلم.. وبعد داك اعالجك..

لا لا.. ح اغادر من البلاتينيوم عشان ما اتكلم.. كدة احسن صح؟؟

اممممم.. ممكن.. لكن لو اتكلمت ح اعمل ليك عملية اربط بيها لسانك من الكلام..

اتفقنا..

دي التحويلة.. امشي بيها لدكتور ياسر شنان..

 

تم اضافتك لفئة الـ 200 كيلو..

يارب يكونوا ناس هاديين عشان ما اتكلم كتير..

قبل ما اسلم اشوف المشاركين منو..

اممم.. كوتش واحد..

كوتش 2..

13 كوتش..

75 كوتش..

 

دة شنو..

دي ادارة عز تيم يا جماعة..

محمد عز الجابو هنا شنو..

ذكرى وفوفا واريج ورباني.. دكتورتنا ذاااتها قاعدة هنا.. وباقي الكوتشِس الجابهم هنا شنو؟؟

ديل جو هنا عشان دة تحدي زيو زي باقي الفئات ولا هنا في شي مختلف؟؟؟

وبيتمموا زينا ولا شغالين بالواسطة..؟؟

هسي ديل اقول ليهم السلام عليكم عادي ولا اقولها وانا واقف وبعد داك اقعد؟؟

خايف ما اسلم وواحدة من الكوتشات تقصدني وتحرمني من النجمة الشلتها.. وخايف اسلم يرجعوني لد. لدن تعمل لي عملية تسكتني تاني..

وااااي واااااااااي..

الكلام حار والسكوت حار..

دة وضع يسكتوا عليتهو لكن..؟؟؟

مواضع الصمت معروفة زي ماقالها د. مصطفى حسني..

((لما واحد يتكلم قدامك..

لما ما تكون عندك اضافة..

لما تتكلم وانت غضبان..

لما يكون في كلام قبيح بيتقال))..

دي مواضع الصمت..

وهسي دي كلها هنا ما موجودة هنا..

احسن ارسل ليهم في الخاص عشان اضمن..

سلامات..

كوتش شنان وين..

فات مدني..

زيارة لاهلو ولا يجيب بضاعة..؟؟

بضاعة شنو؟؟ بالله مدني فيها سوق؟؟

مشى زيارة يعني؟؟

زيارة شنو.. مشى ضمن التحدي..

كيف ضمن التحدي؟؟

بيمشي كل يوم ولاية ويرجع..

قصدك عندو قروش و ماعارف يكملها في شنو..؟؟ بعدين لما يقرر يصيف يمشي مدني؟؟ ما بيعرف جزر القمر؟؟

لا لا ما سياحة بيمشي على رجليهو بس ويرجع..

بيمشي على رجليهو؟؟

أي.. كل يوم ومرات لما يمشي ما بيوقف..

وبيرجع طبيعي ولا في نقالة؟؟ ولما يرجع بيعمل كم عملية في ركبو؟؟ وبيستخدم كم صباع move؟؟

لا لا.. طبيعتو كدة.. متعود يمشي كل يوم بالطريقة دي..

لولا اني خايف من انو د. لدن تعمل لي عملية تمنعني الكلام كنت ح ارسل ليهو كلمتين.. تجيبو لمس اكتاف لكن ماشاء الله تبارك الله..

احسن تسكت يا اخوي.. لسانك دة فالت منك..

هسي البيحل محلو منو عشان اسأل من المقابلة..

اسأل أي واحد من طرف..

كلهم قريبين منو في البيعملو دة..

لا لا.. العولاق البيعملو دكتور شنان دة من مس الشيطان.. ما تتهم الناس ساي..

الله أكبر عليك.. لكن برضو اقعد معانا واتاكد بنفسك..

سؤال.. الناس هنا كلهم بيمشوا ولايات زيو ولا كل واحد وقدرتو..؟؟

م ح تصدقني لو قلت ليك انو اقل واحد بيمشي هنا هو دكتور ياسر شنان.. باقي الناس ديل كلهم بيمشوا اكتر منو.. مثلاً.. فوفا ليها 5 ايام ماشية ولهسي ما وقفت..

ايوااا عشان كدة مختفية.. وما بتظهر زي زمان..

لا لا.. ماشية في زفة تخرجها ولهسي ما وصلت.. وفي دكتورة فاطمة برضو بتمشي كل يوم..

عشان كدة مختفية من المجموعة وما بترسل لينا غير رسالة التاسك اليومي.. أتاريها جارية هنا وما لاقية وقت.. اعفي لينا يا كوتش.. مشغولة ونحن ما عارفين..

تقريباً اغلب الموجودين هنا كوتشِس.. واغلبهم جاريين عشان يلحقوا التحدي..

ايواااا.. ما شاء الله اتاريهم شغالين على نفسهم برضو..

بالمناسبة الساعة كم عندك؟؟

المغرب قرب يأذن..

يلا يلا.. ارح..

وين..؟؟

ماراثون المشي ح يبدأ..

مشي شنو؟؟

المشي اليومي..

كل يوم بيمشوا؟؟

ومرات بيعملوا ماراثون صباح ومساء..

ماراثون صباح ومساء؟؟ الله أعلم.. لكن ديل بيكونوا بياكلوا قروش مساكين.. عشان كدة بيجروا كل اليوم وخايفين ماضيهم يلحقهم لانو دة ما مشي زول عايش طبيعي..

انت لسانك دة مفترض يتربط والله..

خلاص ما بتكلم تاني.. لكن الماراثون ح يبدأ كيف ودكتور ياسر مافي؟؟

سمعت بـ(قام بالضلام)؟؟

لا لا..

يلا ديل بيخلوا د. شنان يطلع وهم بيبدوا مسابقاتهم.. ولما يرجع يقولوا ليهو كنا منتظرنك.. وهم بيشتغلوا تحت تحت.. والمسكين بيصدقهم ويحفز فيهم بالخطب الصماء..

خطب صماء عديل؟؟

اي.. ما سمعت بخطبة الـ30 كيلو القالها ليهم المرة الفاتت والخلتهم يبكوا من العظمة..؟؟

دي عن شنو؟؟

حاجة قريبة لكلمة دنزل واشنطن في حفل تخرج طلاب جامعة كلفورنيا.. لكن د. ياسر قالها بالعربي.. الخطبة كانت عن اثر المشي 30 كيلو في اليوم..

وقالوا لغاية هسي مافي واحد مشى الـ30 كيلو غير دكتور شنان..

والمشوار المشاهو دة حصل فيهو شنو..؟

فقد فيو سوائل ونقلو ليهو دم وكان ح يموت لولا رعاية ربنا.. وبقى مقياس للمشي العظيم..

بس ما يكون زي مقياس كوتش خالد بيشة في الغناء..؟؟

دة منو كمان؟؟

دة كوتش اللغة الاسبانية.. في لحظة كان منداح وغنى ليهم.. وبقى مثل للغناء القبيح..

وهسي وين؟؟

اعتزل الغناء نهائي بعد الملخص الاتكتب يوم الجمعة وهسي بقى يعترض بصمت..

سؤال طيب.. الناس المعاكم هنا وقت اغلبهم كوتشِس.. الجابرهم شنو على المشي دة؟؟

التنافس هنا واصل السماء.. لو قعدت هنا ح تكتشف انو دكتور ياسر هنا اقل واحد في المشي لكن المتحديين بيريدوهو شديد..

سؤال أخير.. قبل ما نمشي على الماراثون.. البيجي المجموعة دي ح يجري زي المتحديين الهنا..؟؟

ايوة.. وكمان تنية ظهرك دي ح تختفي في أول اسبوع..

نشوف البيحصل في المقابلة..

يلا نلحق الماراثون قبل ما المقاعد تتملي كلها..

طيب..

 

يتبع..

 

✍ ✍ ✍ ✍ ✍

 

اليوم التاني في الاسبوع الخامس

 

يلا.. يلا على الماراثون..

ح نقعد وراء ولا قدام؟؟

مفترض نقعد قدام عشان نشوف لكن خايف الجري يستفزك ويحرك مشاعرك وتجري معاهم.. وبي ظهرك المتني دة لو جريت وراهم تاني الا نسوقك من هنا باسعاف..

طيب.. وصف لي عشان اكون فاهم..

يلا.. الجري بيبدأ من المغرب والنتائج بتكون في الشاشة..

والبيفوزوا بتحتفلوا بيهم ولا بتعملوا ليهم شنو بالضبط؟؟

دي دايرة ليها سؤال؟؟ بيمشوا يعملوا عمليات صيانة لنفسهم.. واحد بيمشي 30 كيلو يومياً.. في اسبوع بيقطع 180 كيلو ودايرو يستمر حياته عادي؟؟

ما شاء الله.. ربنا يبارك ليهم..

الصور المعلقة دي لمنو؟؟

ديل الفازوا ببطولة المشي.. بعدما يفوزوا بيعلقوا ليهم صورة عشان يتذكروهم.. اول صورة دي لابوبكر كاكي..

كان معاكم هنا؟؟

اي.. اتعلم المشي من اكاديمية سان عز..

الشغلة دي شكلها كبيرة شديد..

وبعدو كان ياسر شنان..

والسنة دي منو؟؟

المرة دي المارثون مستمر فترة طويلة..

اول واحدة اسمها روابي..

والبعدها دة السنجك..

والثالثة والرابعة..

الفاز بيهم اسمو المتلثم..

كيف يعني..

بيحب يكون مختفي ومافي واحد يعرف هو منو.. عشان بيمشي مشي ما طبيعي.. ماشاء الله ولهسي مافي واحد عارف اسمو..

والشعارات الكاتبنها دي شنو؟؟

أي واحد بيكتب حاجة هو مؤمن بيها..

مثلا..

 

روابي كانت بتقول..

روابي مشيها يشبه روابي..

لا محتاج مثل لا مدحة..

بتمشي الكيلوهات كل مرة..

لا خلت نجوم لا لوحة..

 

السنجك كان بيكتب..

قلباً لي عنيد يا ياسر..

صابر بالسنين ما اتنحى..

ديل اسع ثلاثين كيلو..

ولليلة الجسد ما شح..

 

وتاني جاء الملثم وقال..

باكر اكمل الـ50 كيلو..

بي بركة ابوي والسبحة..

ما يهمك كلام السنجك..

ما دام النفوس منشرحة..

 

وهسي في واحد جاري ولسة ماوقف.. بيقول كلمة واحدة بس..

شهر يوليو نتلاقى تاني..

كان موعدنا عيد الأضحى..

انا واثق من كلامي القلتو..

كان باللهجة كان بالفصحى..

 

ودة ما عندو عداد.. بيمشي بس.. مرة كان شغال بعداد والجهاز علق من المشي الكتير..

 

طيب.. خلينا نركز في المارثون..

العدّاء الأول..

3 كيلو في 16 دقيقة..

العدّاء التاني..

5 كيلو في 15 دقيقة..

العدّاء الثالث..

8 كيلو في 12 دقيقة..

وديل بينتهوا متين؟؟

لما دكتور ياسر يرجع ولو ما رجع المارثون ما بينتهي..

طيب..

 

لكن في مارثون الصباح..

حق كبار السن.. لو دكتور ياسر ما جاء ممكن تحضرو..

كبار السن معاكم برضو..؟؟

ديل الناس البيمشوا 3 لـ 5 كيلو في اليوم بيعاملوهم معاملة كبار السن عشان المشي دة ما محسوب عند ناس الـ50 كيلو كل يوم..

عيني باردة.. ربنا يغطي عليهم..

 

دكتور ياسر قال ح يوصل بكرة.. ممكن تعمل المقابلة وتشوف علاج لظهرك..

طيب..

 

دكتورنا كيف حالك؟؟ انا احمد.. جاييك من طرف د. لدن.. عندي تنية في الظهر محتاج تمارين عشان ارجع امشي عديل..

تمام.. مرحب بيك.. هنا كل الناس عندنا سوا.. ما بتحتاج لوصية.. اتفضل..

عندي تنية من حرب حضرتها مع كوتش خالد السبهللي الصوتو اكعب من تمثيل الشرنويي..

الاصابة جاتك من الحرب ولا حاولت تنتحر بعدما سمعت صوت خالد بيشة؟؟

واحدة منهم.. لكن ما عارف السبب بالضبط..

طيب.. ح اشوف ليك حاجة مناسبة..

سريع عليك الله عشان ماشي الصين..

لو مستعجل مفترض تمشي كل يوم معانا لمدة نص ساعة..

دقيقة.. الغرض شنو من المشي كل يوم نص ساعة؟؟

عشان المشي بيحرق سعرات حرارية..

والفائدة؟؟

بتقلل الدهون في جسمك و وزنك ح ينقص..

ولو الواحد وزنه طبيعي او اقل زيي كدة؟؟

بيحسن المزاج ويخفف التوتر والضغوطات..

ولو انا ما ماري بضغوطات؟؟

بيحسن من طريقة التنفس..

ممكن اتنفس بالطريقة العادية بدون مجهود يومي.. المشي ما مهم بالنسبة لي..؟؟

المشي كل يوم بيقلل خطر بأمراض كتيرة منها الزهايمر..

وتاني.. في حالتي انا؟؟

المشي بينشط الدورة الدموية وبالتالي ممكن تستعيد صحتك سريع..

طيب.. معناتو كدة مفترض كلنا نمشي كل يوم؟؟

بالتاكيد.. انت قايل عز وباقي الكوتشِس قاعدين هنا لشنو.. عشان الفوائد دي..

يعني المشي ما مرتبط باي حال صحي او وزن زائد او غيرو؟؟

لا لا.. عادة صحية مهمة لكل الناس..

طيب.. ح تعالج تنية الضهر بالمشي؟؟

انت جرب المشي وبتشوف النتائج براك..

طيب.. من بكرة ح ابدا معاكم..

تمام.. حاول تتمشى من الصباح.. الحاجة دي ذكرها احمد حنتوب في فوائد الاستيقاظ بدري..

ح احتاج لشنو عشان ابدأ؟؟

ممكن عداد زمني تحسب بيهو الخطوات بس او ممكن تمشي كل يوم لمدة نص ساعة..

ان شاء الله من بكرة معاكم..

تمام.. منتظرنك..

 

وانت طالع تسمع واحد من المرضى..

ياسر معاهو الله هداني..

نفسي على الطريق منفتحة..

مشاوير من فتح رباني..

ما شيطان علي ألح..

 

كامل الاعتذار لمحمد احمد الحبيب شاعر العبرات..

 

✍ ✍ ✍ ✍

 

اليوم الثالث في الاسبوع الخامس

 

اشعار صباحي..

اليوم العالمي للمرأة..

احتفل معها..

 

150 استوري واتس جديد..

كل عام وانتِ بخير..

 

دة شنو؟؟

السنجك.. العيد جاء ونحن جاريين وراء تجهيزات رمضان؟؟

عيد شنو؟؟ ونحن لسة ما دفعنا مصاريف المدارس للشفع؟؟

سامع في عيد للنسوان..

لا لا.. مافي عيد بيكون عندهن قعدة شراب جبنة..

طيب..

ياعمنا.. كيف حالك ان شاء الله طيب..؟؟ شايف النسوان الليلة بيحتفلن.. اها.. رأيك في القصة

اقول شنو؟؟

خليهن يحتفلن ساي.. يوم واحد ليهن و 254 يوم لينا..

لكن ياعمنا.. هن بيحتفلن انهن انجزن في اليوم دة..

انجزن شنو؟؟

كيف يعني أنجزن شنو؟؟ مافي انجازات للمرأة؟؟

ما متذكر ليهن أي انجاز غير عواسة الحلو  مر..

ياعمنا.. انتوا ليه ما بتحتفلوا بيوم الرجل العالمي.. تتذكروا فيهو انجازات العلماء الرجال زي ناس نيوتن واديسون وغيرهم..

اولاً.. البتقولهم ديل نتائجهم ظهرت في لحظات معولقة..

كيف يعني؟؟

اولاً.. نيوتن كان زهجان وسوق علاقاتو واقف وقاعد تحت الشجرة يشرب ليهو في سيجارة وما كان لاقي الولاعة فوقعت التفاحة جنبو وقعد يفكر.. لو لقى الولاعة كان كفانا شر الفيزياء الطلعت عيننا وكرهتنا القراية..

وتوماس اديسون طردوهو من المدرسة عشان كان غبي لكنهم عشان كفار وعندهم قلب كتبوا الحاجة دي لأمو في رسالة فقعاد البيت خلاهو ينجز..

وكمان الشاب الاسمو احمد الغندور (الدحيح).. حارس غرفتو 24 ساعة ويتكلم وهسي من اعظم وانجح اليوتيوبرس العرب..

طيب الانجاز في رايك شنو؟؟ ومقياس الانجاز شنو عشان نخصص ليهو يوم؟؟

شوف حبوبتك بتكون عارفة..

 

حبوبة كيف حالك..

حباب نور عيوني ودواي..

حباب ستري وغطاي..

حبابو سعدي وهناي..

وين ياجنا ليك كم يوم..

كنت ماشي وراء دكتور شنان وهسي تعبت وجيت راجع انتِ كيفك..

نحمدو يا عشاي..

حبوبة.. انتوا الليلة عندكم عيد؟؟

اي.. عيد عواسة الحلو مر.. باكر العواسة بتنتهي ونسوان الفريق بيتلمن على عمتك بدور..

بتعملن شنو غير عواسة الحلو مر؟؟

بتجي شيماء بت كمال الصوتها بيرد الروح.. داك اليوم كنت بسمع في غناها ذكرتني جدك الحسين الله يرحمه..

الله يرحمه.. لكن غناها سمح ياحبوبة؟؟

كيفن ما سمح.. انتوا بتعرفوهو كيف يا جنا اكان سمح ولا معولق.. اياهو غناكم كلو سكلتكِ أمكِ يافتاة و خير نساء العالمين..

انتِ يا حبوبة بتسمعي الحاجات دي وين و متين؟؟

باقي لي انت بتدور تأخرني على جمعية عمتك بدور..

لا لا ما بأخرك.. لكن الح يجي منو تاني..؟؟

كل نسوان الفريق بيجن الا خايفة بت جار النبي تجي.. البنت الصوتها زي خالد بيشة دي اصلي ما ردتها.. كجنتها وكجنت صوتها الما بتبلع.. تتفلهم كل يوم وتغني متل سواسيو جهيلات ود الماحي.. استغفر الله..

هي بتغني من متين يا حبوبة؟؟

يخربها كان بتعرف.. شافت الناس بيسمعوا في صوت شيماء بت كمال وعاجبهم وبقت تقلد فيها.. واياها خربت علينا القعدات..

 

انتوا يا حبوبة ليه ما بتحتفلوا بيوم المرأة العالمي؟؟

دة ياتو يوم في الأيام ياولدي؟؟؟ دة غير ايام الله السبعة ديل؟؟ ما يكون الأحد الفيهو عيد المسيحيين؟؟

لا لا.. يوم كل سنة بنوت الجامعات بيحتفلن باليوم دة.. بيقولن دة يوم انجازاتهن في الحياة..

يوم واحد بس.. حال السواد.. ديل بينجزن شنو يا جناي.. نحن الحلو مر بنقعد اسبوع عشان نعمل عصير لشهر رمضان..

هسي يا حبوبة الرجال الأنجزوا زي ناس نيوتن وجاليلو واديسون ما بتحتفلوا بيهم..؟؟

ديل منو البتقولهم ديل؟؟

ديل الاكتشفوا القوانين الكبيرة زي الجاذبية ولا الاكتشفوا الكهرباء ولا حاجات عظيمة مهمة في الحياة.. وبرضو ماعندهم يوم اسمو يوم الرجل العالمي..

انت قايلني فاضية افتش في عمايل الناس زي بنوت اليومين ديل.. خليني انمشي على بدور والحق اسمع صوت شمو بنتي..

طيب.. سلمي عليها..

 

✍ ✍ ✍ ✍

 

ملخص الاسبوع الخامس

 

·        كوتش خالد يتصدر الترند مرة أخرى بعد إصابته بفيروس المراقبة بصمت..

·        بعد تعافيها وخروجها من العناية المكثفة.. كوتش فئة اوريك طبك تدخل في جلسات علاج نفسي بعد خروج جميع مشتركيها من التحدي..

·        فئة المشي تحتفل برجوع كوتش شنان من مشوار الـ50 كيلو و هبة تعلق.. القبائل المريت بيها خليت ليها أكل ولا خميت كل شي؟؟

·        فئة اللغة الانجليزية 2 تتقدم بطلب لمحمد عز بضم حمدوك فرع السعودية وعز يرفض..

·        السنجك يغرد.. ها ناس خباركم صانين كدي؟؟ وصاحبة الاسمين سارة واسرار تعلق.. غيابك حار علينا.. ارجع لينا..

·        السناري يحتفل بمبيعات 20000 في اول اسبوع بعد حلاقته لأكثر من متحدي بربع القيمة واحداهن تعلق.. ما عندك make up؟؟

·        د. لدن تحصد أولى نجماتها في فئة اللغة الانجليزية وحسام يعلق.. يو ديزيرف إت بدون خلاف وحمدوك يستنكر كعادته..

·        مجموعة OMCT تحتفل بفوز اريج الشيخ بنجم فئة الوزن ود. لدن بنجم اللغة الانجليزية واحمد بنجم تحدي القراءة وشيماء تزغرد وتعدهم بحفلة خاصة..

·        خلاف بسيط بين محمد عز وكوتش هند المعروفة بقلبها الكبير يتسبب في تغيير نظرة بعض المتحديين للتحدي والقوانين..

·        في سابقة من نوعها.. استمرار النقاش في جملة Rules is Rules التي يستدل بها محمد عز في جميع قراراته لمدة 5 ساعات وحسام وشهد أم عمرو يعلقان.. بتقولوا في شنو في 5 ساعات.. ود. لدن تعلق Rules are Rules..

·        اصابة المتحدي نشمي بوعكة صحية بعد تعليق احداهن اسمِك سمح يا اختي واستاذة اللغة العربية تعلق نشمي على وزن رشدي وحمدي.. فما سبب اعتقادك أنه علم مؤنث؟؟ وحمدوك يبدي استنكاره على الملأ..

·        كوتش فئة اعرف حقك تستأنف قضيتها الأخيرة التي تم اتهامها فيها بنشر أسرار الدولة وتقول.. لازم الديمقراطية تقول كلمتها والأحزاب السياسية تختفي من المشهد..

·        الكاتبة امل تستعد لاطلاق روايتها الثانية من داخل التحدي وتعلق.. شكراً كوتش زينب.. وجودك معانا طلع مواهبنا الما كانت ظاهرة..

·        الملل يتسلل لبعض أروقة التحدي وكوتش خالد يعلق.. التحدي في آخر أيامه ادعو ليهو بالرحمة..

·        مجموعة ح نبنيهو تنشر تفاصيل مصروفات المبالغ المالية التي تم استلامها من تحدي عز وكوتش سارة تعلق بفخر.. شكراً عز تيم..

·        احتمالية عودة مسرح التحدي للعمل في الاسبوع الأخير بعد انقطاعه لاسبوعين..

·        كوتش فئة كورسات اون لاين تبحث عن عمل إضافي وتكتب.. مع النت الغالي دة الا نشتغل في درداقة..

·        احمد الصادق.. يتعرض لمضايقات من بعض المتحديات ويعلق انا كوتش فئة التصوير ما الفنان..

·        المصطفى.. يكمل قراءة كتابه العاشر في تحدي القراءة والعبير تكتب.. انت اكتر واحد استفاد من التحدي..

·        كوتش اللغة التركية تحتفل بنجاح المصطفى في اختبار المهن الذي تم مؤخراً وتهديه اغنيه.. عاجبني فيك انك ملاك..

·        بعد نزول الثلج على باب شرفة منزلها  كوتش اللغة التركية تعتذر عن المشاركة في اسبيس نجوم الفئات وتعلق معاكم بقلبي بس ودعاء ترسل لها شوربة كوارع..

·        فئة المشي ترشح رئيس لجنة ازالة التمكين والتمام اليومي للفوز بنجم الفئة بعد مشيها اكثر من 70 الف خطوة نحو موقع تخرجها ولم تصل اليه حتى الآن..

·        اصابة متحدي فئة الوعي الذاتي بأمراض صحية لعدم أكلهم شيئاً بعد غياب رب البيت لأكثر من 3 اسابيع وهم في انتظاره..

·        الفئة الاسبانية تحقق نجاحاً ساحقاً في شرح مصطلحات الوداع التي يطلقها الكوتش بين الحين والآخر..

·        فئة الأوراد اليومية تنشر بحثاً عن تأثير الذكر اليومي وتكتب لا تنس أن الوقت من ذهب..

·        ظهور كوتش فئة (حقك علينا يا عز) المتملقة والتي تؤيد جميع القرارات الخاطئة التي يقوم بها وتعلق Rules are Rules وعز ديمقراطي دائماً وحمدوك فرع السعودية ينظر إليها نظرة استغراب الغراب الذي أوقع الجبنة من فمه..

·        بعد اسبوعين من تحديد آلية تصويت ملخصات كتب فئة القراءة.. كوتش زينب تعلق.. لسة نفس البيعلقوا هم ناس المجموعة هنا وأمل وعبير يطمئننها بقولهن.. تصويتك انتِ وتعليقك على ملخصاتنا بالدنيا ود. اسراء تنزل دموعها تأثراً..

·        احمد حنتوب يتصدر قائمة نجوم الفئات ويعلق أول وآخر تحدي اكون معاكم وفنانة التحدي شيماء تعلق اياك تقول كدة.. كل الناس بتتمنى ليك الخير..

·        فئة اللغة الصينية تغلق ابوابها بعد اصابة جميع المتحديين والكوتش بفيروس الملل من اللغة التي تشبه مشي السواسيو..

·        كوتش اللغة الألمانية ترسل رسائل تهنئة للكاتبة أمل واحمد حنتوب على منافستهم الشريفة التي صارت مثالاً في التحدي للمنافسة ذات الطابع الأخوي والعائلي في ذات الوقت..

 

✍ ✍ ✍ ✍

 

ملخص الاسبوع الأخير

 

·        بالدموع والجرسة والمشاعر المكبوتة.. كوتشات التحدي يقُمْنَ بسلسلة من رسائل الوداع داخل الفئات وكوتش تماضر تتصدر قائمة الكوتشِس الأكثر قبولاً.. وكوتش سارة تحبس دموع الغيرة..

·        بعد انتهاء التحدي وعدم حصوله على عرض كوتش جديد.. كوتش خالد بيشة يعلن عن فتح محل اقاشي بالكدايس وميسون تستنكر..

·        كوتش طارق يبعث برسالة شكر تجعل أريج تعلق عليها بـ 36 رسالة..

·        كوتش زينب تبعث برسالة مليئة بالدموع لمجموعة غذاء الروح ودكتورة اسراء تعلق.. ما بنفارقك نهائي..

·        المتحدية عسجد والمشهورة بالمتحدث الوحيد في بلاتنيوم ستارز 2 تستيقظ في ليلة الخميس لتجد اكثر من 20 رسالة مهمة وتقوم بالرد عليها جميعاً بذات التسلسل وسط استغراب جميع الأصنام..

·        كوتش فاطمة الباهي والتي قامت باقتلاع تذكرة الطيران من أختها هند الباهي تقرر الاحتفاظ بتذكرة السفر لنفسها ونشمي يعلق تستاهليها لأنك مجتهدة معانا وحمدوك يستنكر..

·        في سابقة من نوعها.. اريج الشيخ تكتب 300 رسالة في حق المتحديين والكوتشِس وتعلق.. انتوا السند والمستند وتهدي كوتش تماضر قصيدة سرية..

·        في سابقة من نوعها.. كوتش سارة تقرر عمل منافسة بين لدن وزينب واحمد للوصول لنجم الفئة وحسام يبدي اعتذاره ويعلق.. كلكم اصحابي والبيفوز بيستحق مننا كل تقدير واحمد يشعر بخيبة امل في صديقه..

·        في سابقة من نوعها.. المتحدي مصطفى عمر يقوم بعمل ملخصين لكتب ادهم شرقاوي ويفوز بنجم فئة القراءة ووالدته الكاتبة أمل تحتفل به واحمد حنتوب يشعر بالضياع..

·        كوتش فئة الأطفال تستعين باريج الشيخ للتنسيق للرحلة التي ستقدمها الكوتش داخل فئات عز تيم..

·        شيماء تستعد لاطلاق حفلها الأول في تحدي عز تيم بعد وصول اغانيها لأكثر من 4 مليون مشاهدة وجميعهم من أصدقاء المتحديين وأقاربهم..

·        بعد قرار العفو العام عن مساجين القولد.. كوتش امتثال تصاب باعراض التوحد نسبة لفراغ المجموعة من المتحديين لفترات طويلة..

·        دكتورة رؤى عمر والمشهورة بلؤلؤ التحدي تحتفل باكمال مشوار الدكتوراة في جمهورية مصر العربية و والدتها الكاتبة أمل تهديها قصيدة بعنوان دكتورتنا والكلام منتهي..

·        محمد عز يعلن افلاسه بعد انشغاله في معالجة الكوتشِس الرقيقات من اعراض فراق المتحديين وكتابات احمد حنتوب..

·        رواية الحزن النبيل تتصدر قائمة الروايات الأكثر مبيعاً في التحدي وكوتش زينب تعلق.. فخورة اني موجودة وسط كتاب كبار زيكم..

·        كوتش فئة اوريك طبك تكمل جلسات الطب النفسي وعز يعين كوتش هبة مساعداً لها..

·        كوتش فئة الوزن تستعد لترك منزل العائلة بعد عدم قبول اختها دكتورة فاطمة فكرة اعادة تذكرة الطيران لها..

·        الكاتبة امل تستعد لاطلاق روايتها ((مجمتع فاسد)) بالتزامن مع رواية ((الحزن النبيل)) تحت اشراف كوتش زينب..

·        في احدى سيشنات اللغة الانجليزية.. احمد حنتوب يستعيد ذكرياته مع د. جو ويقول احسن كوتش في التحدي وكانت اجمل أيام معاه..

·        احتدام التنافس بين الكاتبة أمل والكاتبة هناء جابر على رسائل التحفيز الصباحية ودكتورة فاطمة الباهي تعلق.. كتاباتك يا أمل كلها أمل..

·        كوتش فئة الوعي الذاتي ينهض من سباته ويرفع احدى يديه دلالة على انه ما زال يتنفس وحسام يعلق.. هسي جايينا في اخر يوم نعمل بيك شنو؟؟

·        محمد كمال يحتفل بحفظه 10 أجزاء داخل التحدي ويستعد لخوض امتحان الحرم المدني والتهنئات تنهال عليه من كل حدب وصوب..

·        اختفاء المتحدية هبة يعيد التساؤلات من جديد عن كيفية المحافظة على نشاط المتحديين..

·        في اسبوعه الأخير.. تحدي عز يتسم بالرقة المفرطة والمشاعر المختلطة وصمت كوتش خالد يعقد الامور أكثر..

·        حسام يقع ضحية لاختبار أريج ولجنة ازالة التمكين والتمام اليومي ويعلق.. انا اتبرلمت يا اخوانا.. وكوتش خالد يعلق.. اتبرلمت دي كانت زمان.. دي اسمها كرامتي اتعثرت وما بتتلم تاني..

·        كوتش هبة عبد الجليل المعروفة بالكوتش الما موجودة في التحدي تدعو شيماء فنانة التحدي لاحياء حفل تخرج فوفا وشيماء ترفض نسبة لتاريخ فوفا في لجنة ازالة التمكين والتمام اليومي سيئة الذكر..

 

في اسبوعه الاخير..

 

·        كوتشات عز تيم يهيجن مشاعر المتحديين برسائل الوداع كل صباح والمتحديات الرقيقات ينهمرن بالدموع واحمد وحِجار اخرون يحتجبون..

·        السناري يستعيد ذكرى اشتراكه في أول تحدي في عز تيم ويعلق.. احمد حنتوب ظبط لينا التحدي دة عشان كدة ما كان في ملل..

·        كوتش ياسر شنان يعود من مشوار الـ30 كيلو ويقرر عمل رحلة الى المالديف سيراً على الأقدام وأريج الشيخ تستنكر..

·        كوتش اسراء تستعد لارسال زيارات لمتحديي فئة اللغة التركية لزيارة معالم اسطنبول ودعاء تحجز 4 تذاكر سفر..

·        د. لدن تفوز بلقب نجمة التحدي المثالية..

·        كوتش فئة التصوير الفوتوغرافي يتنبأ بمستقبل مشرق لبعض متحديات الفئة ويعلن عن تعاقد بعض المتحديين مع قناة ناشيونال جوغرافيك ابو ظبي..

·        كوتش ياسر شنان يهدي أحمد حنتوب مذكرة يوميات جديدة..

·        المتحدية سحر تنهمر بالدموع بعد فوزها بجائزة نجم الاسبوع الأخير في فئة المشي..

·        في سابقة من نوعها.. متحديي فئة حفظ وتجويد القرآن الكريم يقومون بعمل التمام اليومي في يوم الجمعة وسط استنكار بعض الموظفين الذين اعتادوا على النوم في هذا اليوم..

·        نسبة لإعلان إفلاسه.. كوتش فئة اعرف حقك ترفع دعوى قضائية في محمد عز وتطالبه بتحقيق ما وعدها به من امتيازات ويصرح.. التحدي دة مافيهو رعاة كتيرين..

 

✍ ✍ ✍ ✍