أحلام ولد ؛؛؛
كان قايل إنو بعد سنين الجامعه
حتوظف أكيد..
يفتحلو بيت
و يضم حبيبتو بعد شقا
و إتحله من إيدينو قيد..
كان فاكر إنو الدنيا لسه
قدامو سكتا من زهور
كان قايل إنو حكون سعيد...
مسكين خلاص
غبيان خلاص مغشوش شديد..
سكه الوظايف في البنوك
سكاها ما صادفلو عيد..
سكه المعاهد و الوكالات و السفر
و إتعكست ليو من جديد...
سكه المصانع والدهب سكه الحديد....
سب المسافات البدت
تبعد حبيبتو علي البعيد...
وهو لسه بحلم ما وقف
في طبعو احمق و زول عنيد...
و هو لسسسسه بيصارع الظروف
والدنيا تحفرلو وتكيد..
العمر فات نصو وسرق
غبيان إحاول حد و إعيد...
و الحل ولا داير تعب الحل وحيد ...
الحل نوحد صفنا
نمرق علي الشارع دغش
نمرق نهار نمرق عصر ؛ والليل اكيد..
نمرق نوحد صفنا
نتغنى بي أجمل نشيد..
نرفع شعار ؛ علم البلد
نصدح هتاف ضد الظلم
من حقنا العيش الرغيد..
ياخي أحسب !! بس معاي
كم هم صحابنا السافرو؟؟
كم مره في صالة الوداع
نزفت دموعك من فراق
وبكيت هناك محروق شديد؟...
احسب معاي عدد الجوازات الخروج-
احسب معاي الهاربون من الجحيم-
احسب معاي عدد الشباب الفي السجون ؟!
عدد البنات الفي السجون؟!
و العد بزيد ....
رغم الكلاب الامنجيه؛؛
و الكجر و البلطجيه؛؛
رغم الزنازين والرصاص
رغم البيحصل و الوعيد..
انا لسه ثابت و عندي راي
حلك وحيد...
ما إنت أحلامك حقوق
و عشان تعيش مرتاح سعيد..
لابد تجري الثوره فيك
مخلوطه بي دم الوريد..
*** بس داير اعيد ***
ما إنت أحلامك حقوق
و عشان تعيش مرتاح سعيد..
لابد تجري الثوره فيك
مخلوطه بي دم الوريد...
...
عدي ضياء الدين