بسوووم

محمد دبورة

بَسُّوووم

(شعر)

محمد دَبُورَة

العنوان: بَسُّوووم (شعر)

المؤلف: محمد دَبُورَة

تصميم الغلاف: لبنى عصام

ترقيم الكتاب بالمكتبة: 1800109015

صفحة الكتاب بالمنصة: https://laylacp.net/webaccess/book_view.php?id=1800109015

جميع الحقوق محفوظة ‫©‬ 2018 منصة ليلى الثقافية

Copyright ‫©‬ 2018 Layla Cultural Platform (LCP)

(https://laylacp.net)

هذا المُصنَّف مرخص بموجب رخصة المشاع اﻹبداعي نَسب المُصنَّف – غير تجاري – الترخيص بالمثل 4.0 دولي

Attribution-NonCommercial-ShareAlike 4.0 International

إهداء

مِن عِرفتِك .. أهديت ليكِ عُمري !! موش بس الأيام !! عارفة .. لمَّا زول يهدي روحو لي زول تاني .. دة معناهو إنو سكن جواهو .. النفس الطالع و نازل ليهو .. كُنتِ بتقولي لي أنشر شِعرك دة عشان جمييييل .. و برد عليكِ إنِّك إنتي بس الشايفاهو كدة .. هسة بحقق ليكِ طلبك .. و دي أول دفعة .. تلتين نص جزء من كتاباتي فيكِ خلال السنة الفاتت .. و بوعدك كل كم شهر أنشر شوية .. بس ..

أهااااااا ... ما بس .. بحبك !!

مُستهبِلة

مُستهبِلة !!

تتضارِي مِنْ جذوةْ هواي ..

و الريدة فِيكي مأَصَّلة !!

دايراني ديمة أَحنَّ ليكْ

و مشاعري تَطفو .. و أَبهلا !!

تِدَّسِي بين فرحي و شقاي ..

و حِروف غُناي و البَسملة !!

أَنا مِنْ عِرِفْتِكْ مِشتَهيكْ ..

و السِكَّة ليكي بَواصِلا !!

عارفِكْ كمانْ مُشتاقَة لَي ..

ممكُووونة بَسْ .. مُستهبِلة !!

شوقِك مَشحتف في الدُروبْ ..

فايت حِدود .. الهرولة !!

نارِك تَقيدْ .. راسِك عَنيدْ ..

ريدِك مَستَّفْ في الوريدْ ..

بِتْعَايني لَي .. أَنا .. مِنْ بعيدْ ..

مُشتااااااقَة ..

بَسْ مُستهبِلة !!

شَغَفْ المَودّة

عَشان خَاطر

عُيونِكْ ما تَشوفْ دَمْعَاتْ ..

و قَلبِكْ ما يَبِيتْ مَغمُومْ

و لا مَحرُومْ ..

مُمْكِن أقطُفْ النَجْماتْ

أَضَّوِيلِكْ ..

أَسَّوِيلِكْ

مِنْ شَغَفْ المَوَّدة .. هِدومْ ..

تَغَطّيِكي

و تَدَفِّيكي ..

تَقيفْ للظَالِمْ

الفِيكِي ..

و احضِنْ ..

فِيِكْ انا

المَظلومْ !!

مِنْ غير إسِمْ

لِيه عَاوزَة تَلْقِي لِيو "إِسِمْ" ؟!!

و البينا كَانْ ..

بَعَدْ "إِتْجَعلتِي" مِنْ الضِلِعْ ..

قَبْل الإِلـه

ما يَدِّي لِي آدمْ

عِلِمْ ..

ليه عاوزة تلقي ليو "إسم" ؟!!

مَا أصْلُو يا .. نُورْ غُربَتِي ..

خَلْقَ النَفِسْ

سَابِق عَلَى .. خَلْق الجِسِمْ ..

كَلِمَاتْنا ما بتَشرَح كَتِيرْ

مَرَّاتْ كَتِيرْ .. ما بتِتْفَهِمْ ..

إِحسَاسْنا ما بِعْرِفْ كِذِبْ ..

واحِدْ بِقُولْ ..

التَانِي بِي هنَاكْ

بِستَلِمْ ..

لِيه عَاوزة تَلقِي لِيو "إِسِمْ" ؟!!

نُورِكْ سَطَعْ ..

جُوَّاكْ فَرَحْ ..

مِنْ دِفْئُو

عِينيكْ تِبتَسِمْ ..

نُورِي الأَخَدْ

مِنْ نَار هَواكْ ..

و نَحَتْ مَلامحِكْ

فِيْ .. رَسِمْ ..

ما كَانْ أَكِيدْ صُدفة و قَدَرْ ..

خيط مُسْتَكِينْ

فِي تُوبْ هَوَاكْ ..

مَاخِدْ مَكانُو .. و مُنسَجِمْ ..

لِيه عَاوزة تَلقِي لِيو "إسِمْ" ؟!!

خَلِّينا زَي رُوحْ .. و إِتْلَقَتْ ..

مَقسُومَة بِين جَسَدِينْ ..

قَسِم !!

أسألَك ؟

لَو تَسمَحِي لَي

أَسْأَلِكْ !!

شُوقِي الشَديدْ

بِتْحِسِّي بيهُو .. و يَوصَلِك؟

شُوفتْ بُكَاي

و كَلامِي ..

المَسْكُوبْ شِعِرْ

بيبَرجِلِكْ؟

لَهفَة قِليبِي

عَلَى لُقاكْ

بِتلَاقِي نَارْ .. فِي مَرجَلِك؟

هَالِكنِي بُعدِكْ ..

و طَلَّتِكْ

تَهْلِك حَنَانْ الرِيدْ

هَلِكْ !!

يا غَايبَة .. حَاضْرَة

و نَايمَة .. نَاضْرَة ..

و مَاسْكَة حَبْل الوِدْ

مَسِكْ ..

وَرَّيني

أَعمَل لِيهو إِيه

قَلبي الصِبِحْ .. بِتْنَفَّسِكْ ؟

مَرَّات تَجِي

مَرَّاتْ تَجِي و مَرَّاتْ تَروح ..

مَرَّاتْ تَخَافْ

مِنَّ الجُرُوح ..

فِي حُضنِي سَكَّنْتِكْ أَنا ..

فُوق حُزنِي

بَنْسِج لِيكْ .. هَنا ..

أَنْسِي اللَيالي المُحزِنة

و تَعالِي بالأَحلام نَبُوحْ ..

يَا سَوسَنة ..

يَا نَسمَة مِنْ قَلْبَ الجِنَانْ

خَلِّيكِي دايماً مُؤمِنَة ..

مَخلُوطة مِنْ أَصْل الحَنانْ

و مَعَاهُو تَصمِيم للبُنا ..

أَنا قَلبِي وَاسِع مِنْ زَمَانْ

و مَعَاكِي زَادْ ..

عَمَّ المَكَانْ

مَا تخَافِي مِنْ ضِيِقْ

أَو ضَنَى ..

و تَعَالِي نِتْلَمْ

رُوحْ .. و رُوحْ ..

شُوكَة عِنَادي

مَعَاكْ تَلِينْ

تَفْتَحْ زُهورِي .. و تَحْضِنَا ..

يَا فَاتْحَة رُوحِكْ ضَلفَتِينْ

أَنا رُوحِي لِيكْ

خَاتْمْ المُنى ..

إِرتَاحِي مِنْ هَمَّ السِنينْ

و تَعَالِي بالشُوقْ و الحَنِينْ

تَلقِينِي مُشْتَاقْ لِيكْ

أَنَـا ..

و مَحَلْ تَقَّبِلِي بَي

بَرُوحْ ..

وَعْدْ

فَتَحتِي نَفْسِي عَلى الحَياةْ ..

قَدَّمتِي لَي طُوق النَجاةْ ..

و مَعَاكْ نَسِيمَ الدُنيا جا ..

مَا بَخْذِلِكْ ..

إِنتِي الحَنينْ المُشتَهى ..

إِنتي الأَصِلْ .. و المُنتَهى ..

إِنتِي الصَفَا

و إِنتي البَهاااء ..

مَا بَخْذِلِك ..

قَدَّمْتِي؟

مَا قَدَّمْتِي شِي ..

عَلَّمْتِي بَسْ

قَلبِي .. المَشِي ..

و حَشيتي جُوفْ الجُوفْ .. حَشِي ..

مَا بَخْذِلِكْ ..

يَكفِيني بَسْ بَسْمَة قَلِبْ ..

يَكفِيني أَرْجِفْ

أَحِنْ

أَحِبْ ..

وَاه لَو أَلاقِيكْ .. و اتْلَهِبْ ..

مَا حَاخْذِلِكْ ..

لَو حَاسَّة بَيَ .. بَسْ أَشِّرِي ..

تَلقِيني جَاري لِيكْ جَرِي ..

مَلياااااان ..

و بِي حُّبِكْ .. ثَرِي ..

و مَا حاخْذِلِكْ ..

حاْمْسَحْ قَسَاوة الدُنيا

فِيِكْ ..

و أَكُونْ رَفِيقْ ضُلْ خَطْ مَشِيكْ ..

و مَلاذِك الـ دُوم

مُشْتَهِيكى

و مَنْزَلِكْ ..

ما بَقْدَرْ

و مَااااااااا ... بَقْدَرْ !!

أَفوت عِينيكْ ؟!!

أَكِيد بَفْقِدْ .. تِجَاهاتِي ..

و أَضِيع وَسْطْ الدُرُوبْ

أَودَرْ ..

فِي عِينيكْ .. شَهَدْ

سُكّر ..

دُنيا تَتَّوِه المُشْتَاقْ ..

و نَظْرَة تَرَّكِعْ

العَسْكَرْ ..

و مَااااااااا ... بَقْدَرْ !!

بَبَارِيها

و بَضِيعْ فِيها ..

و بَحِّبَها .. كُلُّ يوم

أَكْتَرْ ..

الله .. إنتي .. و غُربَتي

إِعْتَنقتِكْ !!

فِطْرَة عِندِكْ

و عِندي لِيكْ ..

حَاجَة فِيكْ

مِنِّكْ

عَلِيكْ ..

إِكْتَشَفْتِكْ !!

قَاعدَة جُواي

زَي صَلاة ..

سَاكْنَة

دَايرَة ..

زَي حَيَاةْ ..

رُوحِي وَسْطِك زَي مُحِّبْ

دَرْوَشْ .. وَصَلْ

للمُبْتَدا ..

إِقْتَرَفْتِكْ !!

ذَنْبِ أَحْلى مِنَ العِبَادَة ..

سِكَّة بِتْوَصِلنِي لِيكِي

مَهمَا كَانْ قَسْوَة عِنَادا ..

نَبْقَى وَاحِدْ

الله وَاحِدْ ..

و العَمَلْ عَاوِز إِرَادَة ..

إِشْتَعَلْتِكْ

نَارْ بُعَادْ ..

عِشْقِكْ السَاكِن فُؤادِي

و مُعْتَريِني ..

يَبْقَى زَادْ ..

و اِنْتي زَي فَتْقِي البَلَمْلِمْ فِيهُو

بِي بَاقِي الرَمَادْ ..

إِعْتَنَقْتِكْ !!

و الحَصَلْ مَكتُوبْ زَمَانْ ..

فِي نَسِيج كُلَّ الأَماكِنْ

و المَشَاوِيرْ

و المَسَاكِنْ ..

و نَاسْ كَمَان لاقَتْنِي قَبْلِكْ ..

و نَاسْ شُعُورُومْ

لِسَّة سَاكِنْ ..

فِي جُوَاكْ

لِيهُم مَكَانْ ..

دِيل طَرِيقْ سِكَّتْنا أَصْلٌو ..

و ديك غُبَارْ

عَلى قَلبِي (رَانْ) ..

إِعْتَنَقْتِكْ !!

الله ..

إِنْتِي ..

و غُرْبَتِي ..

دِسّيني

دِسّيني فِيكْ !!

دَفّيني

مِنْ وجعي القديم ..

خَلّيني أرجع

أبقى غيم ..

سَوّيني في جُوّاكْ

مُقِيم ..

دِسّيني فِيكْ !!

أبقِينيي نور ..

أملِيني رِيد

إتحّكرِي ..

و إتوّكري ..

سَاويني إنسان

مِن جديد ..

شوفيني ترياق

مِن فَرَحْ ..

مخلوق عشان

وجعِك ذميم ..

دِسّيني فِيكْ

و اتبَسْملي ..

مِن كُلِّ شيطانٍ

رجيم ..

مساء النور

مَسَاكْ نُوَرة !!

كسل شُفّع ..

بَعَدْ حَمّام ..

بَعَدْ كُورة !!

حُضُنْ ماما ..

لَمّان البرِدْ ينزل ..

يجيب قِدّامو "شبّورة" !!

مَسَاكْ فرحة ..

خطوبة بِتْ

بَعَدْ بُورة !!

و حبوبات .. بِبَاركولا !!

مَسَاكْ

بسمة بِنَيّة سِغَّيرة

عِرفَتْ حَل لـِفزورة !!

و شالت دفتر الاستاذ ..

و شافْتْ الحيطة

سَبُّورة !!

مَسَاكْ

يا أغلى ما عندي ..

يكون زي أجمل

أحلامِك ..

و زايد من تمام نُورا !!

آخر صباح

آخر صباح ..

مِنّ السنة !!

و انتي و أنا ..

قَررنا نِتْخَطّى الهموم ..

و بَعَدْ وقعنا

خلاص نقوم ..

نشتِل شِتول

لي حُبّنا ..

نبني الفرح

ريد و إبتسام ..

نصنع حياتنا بِيدّنا !!

واي

واااااااااي

مِنْ قَعْدَتِكْ جواي ..

و بُعْدِكْ

في المسافة سَفَرْ !!

واي أكتر !!

مِنْ الجغرافيا

و التاريخ ..

و درس العربي

حرف الجر !!

و واي

من قسوة الأيّام ..

يوم أسود ..

و يوم اخَدْرْ !!

و واااااااي مِنِّكْ ..

حنيني

تلاقِي بي حِنِّكْ ..

جنوني

يدوخ ورا جِنِّكْ

يقُصّو أتَرْ !!

وااااي ..

مِنْ ضَجّتِكْ جُوّاي ..

سكونك جوة

جمب السِرْ !!

شَغَفِكْ حَتَّ حَدْ الخوف

و إتحّكر !!

شوقك لخبط الإحساس ..

هَيّج مخرج الأنفاس

و أسكرني .. ألّذَ سَكَرْ !!

بهاتِيبِكْ ..

أجيب اِسمك ..

أقَرِّبْ أقولو

جمب الناس ..

و أتوّترْ !!

واي

مِنْ قَعْدَتِكْ جواي ..

و بُعْدِكْ ..

في المسافة سَفَرْ !!

وااي

مِنْ زحمَتِكْ جواي ..

تلابِيبِكْ

مشربكة في تلابيبي ..

أصلو الشوق مشحتفنا ..

و ما بْتَنْفَعْنا

واي .. وووب .. كُرْ !!

بِقِيتْ مسكون ..

بِقِيتْ مجنون ..

بِقِيتْ مسجون

بِقِيتْ بِيكْ .. حُرْ !!

و واااااي

مِنِّي ..

هواك خَلّاني

ما عارف ..

بِقِيتْ أصغَرْ ..

بِقِيتْ أكبَرْ !!

حِسْ سِير الزمن

راح لي

و إتوَدَّر !!

لَمْعَة

نقطة الضوء في عيونِك

ليها مِليون الف لون ..

مَرَّة تَلهِمني الأماني

و مَرَّة تِتْفَّجر معاني

و مَرَّة مَرَّة بَجِيها تاني

و عِندي إحساس ما بِخون ..

نقطة الضوء في عيونِك

شَهْقَة مِنْ قَلبِك .. حَقِيقة

و نسمة بِتزيد الحريقة

و قُبلة

بس ضَلَّت طريقا

و رغبة مُمعِنة في الجنون ..

نقطة الضوء في عيونِك

قِصَّة ما اتكَتبت حروفا

و وردة فاحت في جروفا

و غُنية ما اكتَملت ظروفا

و رمز لي أقصى السكون ..

نقطة الضوء في عيونِك

لهفة لي محبوب بعيد

و خطوة لي فاصل جديد

و سَهْمِ أمضى مِنْ الحديد

في اتجِّاه قلبي الحنون ..

نقطة الضوء في عيونِك

مَسَّخَتْ كُلَّ العُيون !!

نَفْسِك تجري ؟

نفسِك تجري ؟؟

تَحضَريِ شَرْقَة شَمْسْ الرِيدَة ..

تَفْتَحي طَاقَة دُنيا جَدِيدَة ..

تَبْقِي سَعِيدَة ..

و تَسْعِدِي عُمْرِي ؟؟

قَلْبِكْ

طِفْلَة شَقِّية ... عَنِيدَة ..

ضِحْكِكْ بَسْمَة

و فَلتَتْ إيدَا ..

و حَرقَتْ صَبرِي !!

نَفْسِك تَجري ؟؟

أَنا يا سِتَّي .. صِحِيت مِنْ بَدْرِي ..

أَجْرِي

و مَافي فَكَاكْ مِنْ أَسْرِي ..

مُسْتَّنِيكْ

فِي كُلَّ الدُنيا ..

أَسْنِدي قَلبِكْ ..

و مَا تِنْكَسري !!

حُبِّكْ وَطَنْ

حُبِّكْ

وَطَنْ ..

القُبلَة تَدِّينِي النَفَسْ ..

حُضْنِك يَصِيرْ

أَجْمَل سَكَن ..

و اتْنَّفَسِكْ !!

مُوشْ بَسْ

هَواكِي يَكُونْ

هَوا !!

رِيحتِكْ تَفَرهِد فِي

البَدَنْ ..

و اتخَّبَى فِيكْ

أَسْكُنْ

و اَحِّنْ ..

لا إِنْتِي يَهدا حَنِينِي فِيك ..

لا مِنْ وَسَاعْ حُضْنِكْ

يَسَاوِرْنِي الوَهَنْ ..

و اتوَّسَدِكْ ..

أبْكِي .. و أَغُووووصْ

فِيكْ .. بالزَمَنْ ..

أَغْسِل جِرَاحَاتِي

الزَمَانْ ..

حُزْنِي المَعَّتَقْ

و الشَجَنْ ..

و اتمَّدَدِكْ ..

أَنشُر مَطَرْ

فَرَحِي الوَسِيعْ

فِي كُلْ بَرَاحَاتِك

مُزَن ..

و اتوَّشَحِكْ ..

أَجْمَل عَلَمْ

يَعْلِنْ سُطُوع تَحْرِيرِي

فِيكْ ..

بَعْدْ الوَجَع فات

إِنهَزَمْ ..

و قِلبِيي فَرهَدْ

مِنْ جَديد

بْعْدْ المِحَنْ ..

حُبِّكْ وَطَنْ ..

يَجْمَعنِي مِنْ كُلَّ الدروب ..

جَاييكْ .. أتُوبْ ..

يَمْسَح سَمَاكْ

كُلَّ الذُنوبْ ..

و أَعِيش مَعَاكْ

قِصَّة هَوَاي ..

قِصَّة هَوَاك ..

حُب

و اِحتَرامْ ..

تَعْمِير

و فَنْ ..

نَشَاف الرِيق

يَنْشَفْ !!

يِتْبَلْ !!

رِيقِي .. و شُوقِكْ !!

و الحَل ؟!!

حِلمِكْ .. حِلمِي ..

بين خُوفْ .. و وَجَلْ ..

أَرْحَلْ ؟!!

فِي النُومْ بَلقَاكْ ..

مُشْتَعْلة .. زُحَلَ ..

أَصْحَى و فِي الجُوفْ

شُوقِك .. سَجَّلْ !!

حِلمينْ ..

واحِدْ .. للشُوقْ أَشعَل !!

يَنْشَفْ رِيقِي !!

و الجُوف .. وَلْوَلْ !!

مِنْ بُعْدْ الإِيدْ ..

مِنْ نَارْ الريد ..

مِنْ دَمْعْ الرُوح

إِتْنَادَى .. هَطَلْ !!

يا آخِر حُب ..

كَان الأَوَّلْ !!

يا أَصْعَبْ حُب ..

حُبِّكْ .. أَسْهَلْ !!

يِتْبَلْ .. شُوقِي !!

يوم لِيكي .. أَصَلْ ؟!!

أَحْضِنْ عِينيِكْ ..

أَتْشَتَّتْ فِيكْ ..

ماااااا اظِنْ

يَحصَلْ !!

دخلتيني

كُلَّ الدِروب

شَالتْ شَذاك !!

كُلَّ الأَماكِن أَصْبَحتْ

مَعطُونة بِي

لَحَظَاتْ هَواكْ !!

زَوَّرتِي مَخْزٌونْ

ذِكرَياتِي ..

كَتبَتِي فِينِي حُروفِكْ

المَعْدُومة

عِنْ زُولاً سِواكْ !!

آه مِنِّك إِنتِي

و مِنْ هَواكْ !!

زَحْزَحْنِي مِنْ

جُوف بِذْرَتي ..

و شَتَلنِي فِي أَرضِكْ

غُنا !!

ما كَانْ مُنى ..

كان زي حَقيقة

مُطَمئِنَة !!

قِصَة لُقَا ..

مَا بين مَلَاكْ

سَاكْنِك .. أَنَا !!

و مَا بين أَنَا

المَسْكُونْ .. مَلاكْ !!

و كَتبتَ عَنِّكْ

فِي المَدى !!

فِي وِشْ سَحَاباتْ

الشِتَا !!

و هَمَسْتَ لِيكْ ..

فِي كُلْ مَسَامَاتْ

الصَدى !!

و غَمْسْتَ رُوحِي

و ضَحْكَتِكْ !!

و غَمْسْتِي رُوحِكْ

و ضَحْكَتِي !!

و سأَلنا .. فِي نَفْسْ الوَكِتْ

هُو مِنُو البَدا ؟!!

جَاوَبْنا فِي

نَفْسْ النَفَسْ

كَان مُبْتَدَانا قَبُلْ كِدَة !!

شُفْتِكْ مُبَعْثَرَة

فِي وْشُوشْ

كُلَّ الحَبِيبَاتْ الغِشَنْ

قَلبِي .. و مَشْنْ

خَلّنو لِيك ..

شُفْتِينِي .. فِي أَحْلَام

رُقَادِك و صَحوَتِكْ ..

مِنْ غِير إسِمْ !!

مرّات بَكُون زي مُعْتَصِمْ !!

مرّات بَفيض .. أَدّفَقِكْ

يَصْبُغْ حَنِينِي

حَبَابْ عِيْنيكْ !!

و لِقينا بَعْضْ !!

سَاقَتنَا فِي سِكَّة عُمُر

خَطَوات مَشِيتَا بَلاك زَمَانْ ..

إِتْقَاطَعَتْ

خَطَواتْ مَشِيكْ !!

إتوقّعتِك

إتوقّعتِك

هَسَّة تطِّلي !!

تَبهلي شُوقِك

فِي مٌخْلايةَ القَلْبْ الوَاقِفْ ..

تَشعِلي

عَصَبَ الرُوح

النَاشِفْ ..

و لِيهو تَبِّلي !!

عَارْفَة احْسَاس الوَردَة

النَابتَة

بِين إِحْسَاسِي

و لَمّا تَهِّلي ؟!!

قَادْرَة تَعِيشِي

شُعُور الضَلمَة ..

و جَاها النُور مُصبَاح مُتْدّلي ؟!!

عَارفَة احْسَاس العَابِد

رَاهِب

لَمَّنْ يَذْنِبْ

و يَبْكِي يَصَّلِي ؟!!

لَمّن تَفْتَحِي شُبَّاكْ رُوحِي

و تَدخُلِي تَقْعُدِي

فِينِي و تَمْلِي !!

كُلُّ حَوَاس الرُوح تِتِشَابا ..

و أَصبِح شَايلِك فِيني سَحَابة ..

تَهطِل ..

تَهدِي مَشاعرِي شَبَابا ..

و تَسقِي يَبَابا

و افَرْهِدْ كُلّي !!

لو قُلتَ لِيكْ انَا بَعْشِقِكْ

لو قُلتَ لِيكْ انَا بَعْشِقِكْ ..

فِكْرِكْ

بِكُون قَدَّرتَ صَحْ ؟

لو قُلتَ لِيكْ

جَنِّيتْ عَدِيل !!

كِيفِنْ يَكٌونْ

قُربِكْ .. مَصَحْ؟!

لو قُلتِي لَيَّا

كَلامِي صَاحْ !!

تِفْتَكرِي مُمْكِن

إكُونْ .. أَصَّحْ ؟!

ما اظِنْ .. كَتِير !!

بَسْ بَحكِي

ليكِي عَشَانْ .. تَحِّسِي

الفِينِي ..

إِتْوَّطَنْ .. سَرَحْ !!

أَنا بَسْ لِقِيتِك

فِينِي .. رُوح ..

سَاكْنَة و تَضِّجْ مِنَّ الفَرَحْ !!

مَعْطُونَة بِي

نَكْهَة بَخُور ..

و بتَشْبَهِكْ !!

شَارْبَاكِي نُور ..

نَاتْحَة و تَسَابِق

فِي قِليبِي العُمرُو ..

قَبْلِكْ ..

مَا نَتَحْ !!

مَا بَسْ كِدَة ..

سَكَنْتْ مَسَامَات

جُثَّتِي ..

نَفَخَتْ .. و قَالَتْ

"إنْتا لَيّ !!"

تُفَّاح حَياتِي

نَبَتْ .. طَرَحْ !!

ما عْرِفْتَ هَل

جُوَّاكْ .. أَنا !!

و الله انْتِي

سَاكْنَانِي و خَلاصْ

مُستَوطِنة !!

شَايلَة اشتِياقِكْ

و غُربَتِكْ ..

و كَأنّو قَلبِكْ

مَا سَكَنْ .. صَدْرَاً

سِوايَا .. و لا انْجَرَحْ !!

إنِّكْ كِده

بِعْجِبني فِيكْ

إِنِّكْ .. كِدة !!

مَسكُونة بِي

حُبَّ الحَياة !!

و نَقِّيَة زَي .. قَطرَة ندى !!

مَجنُونة .. جَدْ ..

مُتعَّوِدة ..

مُترَدِدَة

و مُتأكِّدَة ..

مُتْمَسِّكَة

و مُتْجَدِّدَة ..

حُريّتِكْ

الجُوَّاكْ سَمَا ..

بِينْ البَشَر

مُتْقَّيِدَة ..

بِعْجِبْنِي فِيكْ

إِنِّكْ .. كِدَة !!

وكْتِين تَحِّبِي

تَكُونِي رُوح ..

صَافِية و أَنِيقَة

و مُسْعِدَة ..

لابْسَة الحَنان

عَدسَات عُيون ..

زَي .. التَقُول عِنْدِكْ

بَدا ..

و مَشَاعِرِكْ .. المَبهُولة سيلْ ..

وِشِّكْ بِبُوح و يْجَّسِدا ..

رعْشَة و سُكُونْ ..

تَقْطِيبة

أَو ضَحْكَة بْجُنون ..

تَسْكُن مَلامْح الكُون

صَدَى ..

إِلّا فِي عُيونِك مَسَاكِنْ

العُيون ..

لِيكِي بتَعَاين !!

و القُلوب

لِيكي بتَشَابي !!

إِلّا فِي عُيونِكْ مَسَاكِنْ

لِي قِلِيبِي

الليكِي .. حَابِّي !!

فِيها مِنْ سِحرَ الجَنايِن

سَجْعَة ..

صُوتَ المُوية .. كَابِّي !!

فِيها إِنتِي

و عِشِقِ كَايِن ..

فِيها سِر .. جَدَّد شَبابي !!

(فِي عُيونِك .. يا مَدايِن)

بَسْ بَشُوف

صَفْحَة حِسَابي !!

(يا مَدَاين الفَرْحة)

بِتْقُولْ لَي .. تَعالْ

مَا تَبقى مَابِي !!

عَارفة كِيف حُبَّ المَدايِن

للمَدَايِن

بِبْقى صَابِّي ؟!!

أَصْلِي مُنتَظْرَاكْ

و عَارفَة ..

غِير عُيونَكْ

رِيح شَقَايا

و حُزني هَابِّي !!

زي قُلوب

كُلَّ المُسافرِين

فِي السِكَكْ .. بِينَاتا

صَحْرْا !!

زَي نُجُوم .. لافَّة بتَغَازل

فِي مَجَّرة !!

بُكرة لَمَّا نَتُوبْ

و نِتْوَضأ .. و نَعَاقِر

أَحْلى سَكْرَة !!

فِي عُيونِكْ

بَرضِي شَايف

أَحْلَى بُكْرة !!

سَكْرَة فِي جَنَّة هَوَانا ..

زَي أَحَاسِيس شِيخ .. و زَانِي !!

لَمَّـا يَخْلِصْ

و يَبْكِي يَقْرا !!

فِي عُيونِكْ

بَسْ بمووووت ..

و اَندَفِنْ و ادْفِن عَذابِي !!

خَمْرَة .. مافي

مَثِيلا .. خَمْرَة !!

إنتي قَدَرْ

و بَحِّبِكْ

و اكْتَر !!

إِنتِي .. قَدَرْ !!

و بَحِّب الحُب

فِي عُيونِك .. نُور !!

و الوَله الجُوَّة

قِليبِكْ حُر !!

و بَحِّبِك سَاكْنة ..

بَحِّبِك فَاتْنَة ..

و بَحِّب إِحسَاسِكْ

لَمَّـا يَفُور

و ينَاغِمْ إِحسَاسِي ..

يَهِّزُو وَتَرْ !!

و بَحِّبِك زِينَة

و هَادِية رَزِينة ..

جُنُونِكْ جُوة

عُيونِكْ .. سِرْ !!

بَحِّبِك فَاكْهَة

زَمَنِي المُر !!

و بَحِّب إِحسَاسِي

يَهِّز أَرْكَانِي .. يَهَدْهِد سَاسِي

هَواكِي .. يَجُر !!

يَجَرجِرْ

حَبْلَ الرِيد ال قَبْلِكْ

قَلبِي طَواهُو

رَمَاهُو .. فَتَرْ !!

و بَحِّبِك نَسْمَة

و بَسْمَة .. و نَجْمَة

و كَلمَة

سِر فِي جُوفِي .. وَقَرْ !!

و بَحِّبِكْ إِنْتِي

و بَسْ .. و بَحِّس ..

حُروف الحُب .. لِي غِيرِكْ

هَدْرْ !!

و بَحِّبِك و نَاوي

أَسَافر لِيكي

و أَبدا مَعَاكْ .. فِي الرِيدَة

سَفَرْ !!

سَفَرْ لِي مُدُن الفَرحَة ..

و فِكْرَة

أَمَل لِي .. بُكْرة ..

و نَسْمة فَجُرْ !!

و بَحِّبِك

عَارْفْ الكَلِمَات خَادْعَة ..

و انا إِحْسَاسِي كَأنُّو

مَطَرْ !!

و بَحِّبِكْ .. أَحْلَى قَدَرْ

فِي عُمْرِي ..

و غِيرِك ما اظِن

عِندِي عُمُرْ !!

ما اتجَهجَهتَ معاكْ

عِشقِك جَاني

قَدَرْ رَبَّاني

و ما اتجَهجَهتَ مَعاكْ !!

يَمكِن صُوتَ الضَحْكة

رَبَكْنِي ..

و يَمكِن .. حَسِّيت بِيو

فِي بَطْنِي ..

و يَمكِن .. بُعْد السِكَّة

مَسَكنِي ..

و ما اتمَكَّنتَ ..

أَشاغلِك تاني !!

طبعاً عَارفَة قِليبِي هَوَاكْ !!

تَبْكِي !! أحِس بِي قَلبِي

اِتغَّـمَا ..

تَزْعَلي إِنتِي

تَجِيني الحُمى ..

تَفْرَحِي مَا بَقْدَر أَتلَّمَ ..

بَحِّس السَاعَة تَمُر فِي ثَواني !!

كِيف طَيِّب وَكتِين أَلقَاكْ ؟!!

لَمَّا تَنُومِي عُيونِي بتَنعَس ..

لَمَّا تَقومي .. أَنا بَتْنَفَّس ..

لَمَّن تَلمَسي قَلبي بَحِّسِك

و بَجري سَريع لِي قَلبِك

أَلمَس !!

و أَلمَس و أَلمَس

و أَلمَس تَانِي !!

و رَعْشَة بِتَهلِكْ قَلبِي

هَلاكْ !!

آه مِنْ شُوقِكْ

لَمَاّ يَهاتِي ..

وآه مِنْ شُوقِي الفَايِضْ

و عَاتِي ..

و آه مِنْ وَعْدْ اللُقيا الآتِي ..

و آه مِنْ حَرَّ الرِيدة .. شَوانِي !!

و مَافِي وُرود

مِنْ غِير أَشْوَاكْ !!

خايفة قَالتْ

خَايفة قَالتْ

و مُطمَئِّنة ..

خَايفة مِنْ وَعْد الأمانِي

و مِنْ جِراحَات تَبدا تَاني

و مِنْ تَبارِيحي و حَنَاني

و مِن هَواي عَايشاهو جَنَّة ..

خَايفة مِنَّ الشُوق

يَجُور بِيهُو الزَمَنْ .. يَسكُن يَخِّفْ

خَايفة مِنْ لَوثَة هِيامِي و عِشْقِي

تَنْضَب يُوم .. تَجِفْ

خَايفة مِنْ غُول المَلل

يَمْسِك هَوانا مِنْ الكَتِف

و يَحَّوِل الأَشواق .. مَحَّنة ..

مَجنُونَة إِنتي

و بَعشِقِكْ ..

خُوفِك مَعاي مَا بِسْتَمِر ..

انا شَايف الشُوق فِي هَواكْ

شُعلة مَشاعِر تِسْتَعِرر ..

حُرِّيتِك .. المَجبُولة فِيكْ

ما بْتَطفِي شُوقِي المُنهَمِرر ..

حافضَل أَشاغْبِك كُلُّ يُوم

لَمَّنْ نَصل آخر العُمُر ..

و نَعيش زَي العُشَّاق دَوام

و الشُوق يَكون فَرضاً .. و سُنَّة !!

إشتهيتِك

إِشتَهيتِكْ ..

إِشتَهيتِك حَاجة زَي

نُقطة مَطَر ..

زَي مَصير

مِنْ دُون مَفَر ..

فِي نِهايتُو بِدايَة أَجمَل ..

رِحلة مِنْ غِير مُستَقر ..

زَي سَفَر !!

إِشتَهيتِكْ ..

و العَلي

أَسْفَرْ ظَهَرْ ..

إِشتَهيتِكْ

زَهرة غِير كُّلَّ الزَهَرْ ..

لِي عَبِيرَا جَوانحِي تَهفُو ..

و بَس أَقُول

جُوَّاكِي سِرْ ..

إِشتَهيتِكْ ..

شُوقِي

صَار مَصدَر خَطَرْ ..

إِشتَهيتِكْ ..

حَاجة زي زغرُودة عَالية

طَالعة مِنْ آخر المَدِينَة ..

فِيها نَشوَة

و فِيها صُولَة

نَغْمة فَرحَانة و حَنِينَة ..

مَارقَة و الليل فِي سَباتُو ..

بَاقَّة .. زَي ضَو الرَتِينَة ..

أَحضُنِينِي

و زِيدِي حِنِّكْ ..

يا حَبييييبة

و يا حَنِينِة ..

إِشتَهيتِك ..

أَرحَمِي الرُوح

مِنْ أَنِينَا ..

مَمَّسَحَة بالغُنا

مَا خَاتِي لَو بَسْ

قُلَتَ لِيكْ

إِنِّكْ .. مَمَّسَحَة بالغُنا ..

مَا خَاتِي لَو بَسْ

قُلَتَ لِيكْ

إِنِّكْ .. أَنا ..

بَدِينَا بِالحُبْ

و اِنتَهى ..

صَلِّينا جَمْ طُورَ الحَنِينْ ..

عَدِّينَا سِدْرْ المُنْتَهى ..

و بِقِينَا ضَو ..

يا إِنْتِي لَو

كُنتِي الوَطَنْ

بَبْقَى التُرابْ ..

مَا إِنتِي مَعْنَى الإِنتِسَاب ..

و أَنا العَذَابْ

سَاكِنْ هِنَا ..

مَا خَاتِي لَو بَسْ

قُلْتَ لِيكْ

ياخ اَسرُقِينِي

و أَعرُجِي ..

مِليُونْ سَنَة ..

مَا بَتُوبْ

مَا بَتُوبْ ..

مِنْ قُمتَ بَدخُل

فِي القِلُوبْ ..

و بَحِّبْ أَغُوص

جُوة النِفُوس

أَبحَث .. أَكُوس

يِمكِن أَلاقِي المُبْتَغَى ..

و أَهنَأ و أَعِيش

مِنْ غير نُدُوبْ ..

مَا بَتُوبْ ..

التُوبة بِتكُون مِنْ ذِنُوب ..

أَنَا ذَنْبِي إِيه

غِير فَقدِي لِيكْ ..

فَاقِد عِينيِك ..

خُطُوات تَرَتِّل لِي مَشِيكْ

يَا حِلوة ... فِي كُلّ الدُرُوب ..

مَا بَتُوبْ ..

يَمكِن يَكُون عُمرِي انْتَهى

و حَياتي مَالَتْ للغُرُوب ..

بَسْ لِسَّة مُحتَاج لِيك أَنَا ..

مُحتَاج أَضُوق طَعْمْ الهَنَا ..

يَا جَوهَرة

و يَا سَوسَنة ..

يَا وَردة فِي زَمَن الحُرُوب ..

مَا بَتُوب ..

جِيتِكْ

جِيتِك

شَايِل الأَفراحْ .. وَرِدْ أَحَمَرْ ..

عَشَم لُقياكِ مَمدُود لَي

طَريق أَخَضَر ..

حَلَفْتَ أَقِيفْ

بِرُغم القَسوَة

و المَنْظَر ..

أَعَاين فِي بَحَر عِينِيكْ ..

أَتُوه .. أُودَر ..

و أَعرِف إنِي فِي الآخِرْ

مَصِيري أَكُونْ ..

مَعَاكْ عَاقِلْ

بَلاكْ .. مَجْنُونْ

و بِينَاتنَا المَحَّنَة بَحَرْ ..

هَدِيَّة عِيِد المِيلاد

مَا نِسيتِكْ ..

مَافِي عَاشِق بِنسَى نَفْسُو ..

عِيد قُدُومِك يَا مُنَايَا

حَتَّى لَو غَمْرَان .. بَحِسُّو ..

كُلُّ أَيَّامِك سَعَادَة

و الليالي الكَانُو بِقْسُو

يِنقَطِع دَابِر وُجُودَا ..

و المَحَّبة تَتِّم سُجُودَا ..

و العِشِقْ يَحمِيك بِطَقْسُو ..

العُمُرْ يا نُور عُيونِي

مَا بِيِنقَاس بِالسِنِين ..

و اليَشُوف فِرهِيد وِجِيهكْ

و لَهفَة الشُوق و الحَنِين ..

بِعْرِفْ الأَيام عَشَانِكْ

و لِيكي للأَزمَان بِعَكْسُو ..

عِيد حُضورِك لَيَّا عِيِدْ ..

أَجمَل اعيَاد السَنة ..

تَمْرَةَ القَلْبَ الوَحِيد ..

مُهجَة الرُوح .. سَوسَنَة ..

مَا نِسِيتِك و اِنتِي عَارفَة ..

يَا سَنا الرُوح .. يَا أَنَا ..

يَا ضَجِيج الكُون و هَمْسُو ..

شُوق و بِكا

مَرَّاتْ يَصَل

حَدَّ البِكا ..

شُوقِي الغَلَبْ

حَرف القَصِيدة

و شَربَكا ..

نَقَّع نُقَاط صَبرِي الكِمِلْ ..

أَنهك جَوانحِي

و أَهلَكا ..

مَرَّاتْ أَنُوح ..

كَلِمَاتي لِيكْ

مَرَّاتْ تَرُوحْ ..

فِي بُعدِك

النُوم زَي جِزَا ..

الصَحْيَة

كِمِّيَة جُروح

و الدَمعة مَا بَتْمَالكَا

الفهرس

منصة ليلى الثقافية

https://laylacp.net

2018م