البرجوازية - مدونات منصة ليلى

في ذلك اليوم المسخن من نهار رمضان..

لبنى قالت لي تعال سوط الآبري ده..

قلت ليها مابحب الآبري وما بتشرب وماقادر أفهم ذاتو كيف الشي دة إتعمل ولا العملو كان حاسي بشنو بالضبط.. اختراع هلامي جدا وفكرة غير طبيعية زي اقول ليك نزلي علب البهارات دي كلها سوطيها سوا واشربيها.. عاد دة كلام نصاح؟

قالت لي وهي بتسوط في حلةٍ ما لا اعلم محتواها: أصلاً كان في زول عندو صوامع غلال.. (طبعا نظام حبوبة ودايرة تحجيني)..

ما قدرت تتم لأني كنت متدردق بالواطة من الضحك.. صوامع غلال قلتي لي هاهاهااااااي 😂😂 دي قلتي لي بياتو لغة بللاي؟

قالت لي بالسودانيز لانقويدج..

انا كنت اتنفضت وقمت عشان اشوف الابري لكن "تسمرت يدي من هول المفاجأة وسألتها": كدي دي انا ما فهمتها.. قوليها اقين؟؟ (ااااي انا ذاتي بعرف انجليش)..

قالت لي مالك ياخ ما اسمها كدة.. طيب انت شايف اسمها شنو؟

قلت ليها صاح صاح صوامع غلال 😒😒

تجاهلتني تماما وواصلت: إنت أصلاً ماعايز تستمع للعلم الشرعي يا جاهل.. شغال بس إسفاف وعدم وعي.. المهم ركز ياخي😒 الزول العندو صوامع غلال ده قام خاتّي فيها عيش وكسبرة وأشياء أخرى كحبوب مخزنها والصومعة دي مبنية من طوب أخدَر

أنا ما قدرت اسكت هنا.. قالت لي طوب أخدَر بالتشكيل عديل.. يعني بفتح الالف والخا خروف والدال ذاتا.. طوب اخدر كيف؟ بالسودانيز لانقويدج طبعا يا جاهل..

طبعاً كالعادة فتحت فيني بنمرة خمسة وواصلت كأني ما موجود:

يللا قامت صبّت مطرة فالطوب وقع والحتة إتهدّت والبلد غرقت.. طبعاً مافي حتة يشتروا منها حاجة كان ولاحظ الوقت داك كان الأكل كلو معمول بدون مصانع والقصص دي.. يللا بعد ماالحتة شوية نشفت أي زول عنده صومعة غلال قرر يمشي يطلّع حاجاته دي فلقوها بقت زرّيعة..

انا كنت بضوق في الزفت القاعد اسوط فيهو دة تطير عيشتي انا كمان.. المهم مع الضواقة والزريعة الجاتني مشكلة تشكيلا صحيحا من خشم البرجوازية المتعفنة البتديني في محاضرة دي فالطبيعي اني عملت بففففففتتتت.. زريعة يا ابو زريعة؟ زريعة بالزا؟ زا زرافة؟

طبعا دي لئامة مني ساي لأنو حرقتني ماري انطوانيت بتاعة الكرواسان دي البتديني في لكشر عن الزريعة.. والله هانت الزلابية والفاصوليا ذاتو ياخ..

الاستاذة اتلفتت علي وقالت لي بكل هدوء: قلت شنو؟ عيد كلامك تاني..

طبعا انا ما عبيط قدر دة.. عيد كلامك؟ هأو تلقيها عند الغافل..

دة كان الحوار الداخلي.. الحوار الخارجي كان: لا لا ما قلت شي.. الابري بس مر شوية..

عاينت لي بالجنبة كدة وادتني واحد تشيييييب من حقينها ديك وواصلت: الموهيم.. ح أتم بس عشان جهلك ده😐 يللا المهم لقاها زرّيعة وطبعاً مافي أوبشن إنو يرميها قام قرّر خلّاها تنشف وطحنوها عادي وعاسوها كسرة أها ماعندهم حل.. يللا تاني يوم بعد ماعاسوها وأكلوا شال باقيها للحقل بتاعو..
انا المرة دي تجمدت يدي من هول الموقف عديل.. سألتها بنفس طريقة عادل امام في مسرحية الزعيم لمن قال ليهو "وازع من ايييه؟".. فأنا قلت ليها: شال باقيها وييين؟ قالت لي: الحقل بتاعو (انا سمعتها "من ضميري" بصوت الوزير المرحوم في المسرحية).. تاني سألتها شالها ويين؟ تاني قالت لي الحقل بتاعو.. المرة دي بزعلة كدة..

قالت لي هو اسمو شنو ياخ.. قول ما تعمل لي قصص وحوارات.. انجز..

الاختصار حرقني فقلت ليها بلماضة اسمو حقل اااي..

سكتت مسااافة عشان تجمع اني جادي ولا بتتريق عليها.. في النهاية قالت: عاين واتسوإيڤر.. ات از حقل (اي والله قالت ات از حقل عديل كدة).. مشى الحقل والصباح عادةً بشيلوا هم معاهم باقي كسرة أمبارح وبكبوا من موية النيل فيها وبسوطوها ويموصوها ويشربوها عشان تقوتُهم..
طبعا تقوتُهم دي مع يسوطوها مع الحقل مع عمو الراجل.. المصطلحات دي ما جاية مع بعض عديل وانا عشان اعمل بروسسنق للقصة اضطريت اشغل الاربعة بروسسرات كلها 😂😂 الحجة دي مالها يخوانا؟ قلت ليها انتي مجنونة ولا مالك؟ حقل شنو ياخ البتقولي فيهو من قبيل دة.. إسمو حوّاشة.. حواشااااااااه..

البت ما لميضة عاد.. هزت راسها وقالت لي نووو حواشة دي ماتبع الحقل ياخ ركز.. حواشة دي إتس لايك زريبة.. حقل ده ماحواشة.. المهم دة ما الأنا قاصداهو هنا.. قصدي ياخ.. واتسوإيڤر.. حواشة دي إتس نوت ماي بوينت هنا..

انا كان فصلت من "اتس لايك زريبة" الفوق دييك وجاني احساس نازك السلحدار واقفة قدامي.. بس وعيت مع الجملة الاخيرة..

اتس نوت يوربوينت كيف يالبنى؟😂 إيه الجهل المركب الانتي عايشة فيهو دة وايه نشر الأمية البتمارسي فيهو دة؟ وعاملة لي فيها بتكتبي بالدارجي وحكاوي سودانية طالعة وحكاوي سودانية نازلة وشنو ما بعرفو داك.. قدّيتنا قد.. واخرتها تقولي لي إتس لايك واتس ما لايك 😂😂
خلتني تميت ضحكي بنظرة (تضحك بلا سنون) ولمن نطقت قالت لي عاين أنا بجد مامركزة اسمه شنو بس هو حقل😐 وحياة نظري هو حقل ياخ.. ركز.. المهم قام شربها الزول ده وبقت آبري لأنو ثقافة السكر جات بعد داك..

انا كنت فقدت الاهتمام صراحة في قصة الهلام العمل الهلام التاني دة والمغرب قرب والاكل ما جاهز وهي دايرة تشتغل محاضرة.. زدت السكر في الجك وقلت ليها وانا بضوق في البتاع دة اتقول ما صايم: والله كلامك ده ممتاز وعلم يدرس في الجامعات عديل😌
سكتت مساااافة كدة وفجأة قالت لي ايوااااا عرفتها براي.. اتس جرووووف..
انا: 😳 هو شنو ال اتس جروف؟ انتي جنيتي اخيرا وريحتينا؟ هو شنو هو دة؟ لأني جد نسيت الموضوع البراي دة مع جك الآبري الأبى يتساط..

قالت لي بنهرة: الحقل يازفت😐

واهاهااااااا.. الحقل بقى اسمه اتس جروف؟😳

والله الليلة الا تطيري أصبري خليني بس أكتب هذا الموقف وأنزلها فيس يا طيرة😂😂.. والله الا تركبي اجانحين وتطيري..