إشتقت ليك - قصيدة
إشتقت ليك ... قبال الاقيك من زمن
وكتين لقيتك ضِعتَ في جواي
و تاه فيني الزمن
و ساعة الغياب التام و من صمت الوهن ...!!!
أدركت صوتك من مدارات الحنين جواي
و شلتك فيني اكبر من وطن
و حلمت ....!!!
حلمت إني معاك مسافر في الفرح من دون متاع
سابح مع ملكوت هواك
متجلي قدر المستطاع
شايل ملامحك جوة في عيني شراع
و انا إتخذتك قبلة في زمن الضياع
و لقيت معاك عمري اللي ضاع
ستفت بيك كل الخلايا الفيني ريد
علمت قلبي يكون معاك حلم جديد
ودفنت خوفي علي ضراك
و أبحرت في جنات هواك
لي أقصي قاع
و قبال أعرفك
كنت ما عارف أكون
عايش العمر توهان و غرقان في المجون
و متمني يوم اتحدي بيك كل الظنون
شايلك معاي قبال تكوني
حلم ملون بالجنون
ما كنت يوم قايلو بيكون
و لقيت هواك ...
لقيت هواك في آخر احساس بالوهن
اتجددت جواي عوالم
و انتفضت من الكفن
و رجعت احسن ما أكون
و اتبددت في ضي شموسك
كل تباريح الشجون
سندّت قلبي على رؤاك
و وقفت ليك
شان ابقي بيك
و وكتين بقيتك
كنتي حفنة من الغياب
سافرتي في زمن الوصول
و رحلتي في سن الشباب
و خليتي لينا الكون وحيد
ملعون بلاك بالاغتراب
كان لازمو آيه الدنيا بيك تفرح زمن ..؟
و وراك تحتضن العذاب
معناتو آيه الانتظار؟
لما الأمل بي وراك غاب
و المفردات مآبـ تكفي
حت لو قلنا فيك مليون كتاب
من ياتو باب
أهجر هواك
و انا في غرامك مستتاب
و بي يات قليب ارجع أعيش
و انا دربي في أترك رهاب
و لي ياتو زول احلم بلاك
و الدنيا من دونك خراب
............
يوسف قسم السيد عباس
14 Mar 2014
-= Share this blog post =-
